إيه علاقة الإكتئاب بالانتحار ؟ - شِفاخانة

في ناس لحد دلوقتي فاكرين ان الإكتئاب دلع او سهوكة، و أن لما تلاقي حد متضايق و  دخل قوقعته يقولك “سيبه اصلهُ واحد كئيب يا عم” و “هو كده شخصية درامية و يعمل من الحبة قبة” رغم ان الحزن ده اول مرحلة من مراحل الإكتئاب و لو فضل لمدة طويلة هيبقى اكتئاب شديد اللي بسببه الناس بتنتحر اليومين دول.

المشكلة اننا اتعودنا نعيش من غير ما نهتم بنفسنا، فحتى الامراض بنستهتر بيها لحد ما نسمع عن حد انتحر فنبدأ نفوق و نسأل “هما دول بينتحروا ليه؟!” .الإكتئاب مرض بجد مش اختيار، محدش بيختار يعيش متضايق وانهُ يشوف كل حاجة في حياته بطريقة سلبية، لما بتوصل للمرحلة دي و تبدأ تشوف كل حاجة وحشة ده اسمهُ الـ”Blue Mood” و فيها بتبدأ تحس انك:

  • مش قادر تساعد حد، و مش شايف ان في امل انك تنجح.
  • انك عايز تاكل كثيرجدا على غير العادي، او يبقى ملكش نفس تاكل خالص.
  • مرهق بطريقة شديدة، و حاسس على طول بالتعب
  • على لطول متوتر، و اعصابك مشدودة
  • عندك صداع في الراس و الم في الضهر
  • عندك فراغ و علطول متضايق
  • مش قادر تفكر في اي موضوع ولا تاخد اي قرار
  • حاسس ان ملوش لازمة تعيش و لو مت هترتاح اكثر
  • بقيت حساس بطريقة زيادة

و من غير ما تحس هتلاقي ده بيأثر عليك زي ان غصب عنك هتهمل في شغلك، والـproductivity  هتقل. وساعات- بس ده في الإكتئاب الشديد- هيبدأ جسمك يحصله اسهال و امساك.

طب هو أي حد بيجيله إكتئاب كده ؟

مش أي حد بيجيله إكتئاب أكيد، لأنه مرض زي اي مرض و عشان يجيلك ممكن يكون بسبب كذا حاجة منها:

Genetically – وراثيا:

انتوا عارفين ان ساعات الأطفال بيتولدوا بمرض السكر و بيكون وراثي من اهاليهم؟، هو الإكتئاب كده، ممكن الانسان يتولد بيه و يورثه من اهلهُ.

Biochemical – كيميا جسمه:

عارفين انتوا كيميا السعادة ؟ اهو كل واحد فينا عنده كيميا متظبطة في دماغه علشان يا يعيش مبسوط يا يعيش قرفان، الناس المتفائلة دي كيميتها متظبطة على الاخر:D. عقل الانسان فيه زي اوضة كده مسئوله انها تخلي الانسان يا مبسوط يا متضايق، ناس كثير ممكن يحصل عندهم خلل فيها. وقتها هيحتاجوا يروحوا لدكتور.

Hormonal – هرمونات:

يعني هو ينفع تاكل أكلة حلوة و هي ملحها زيادة او ناقص لازم يكون الملح مظبوط!، اهو نفسية الإنسان بالظبط كده، متتظبطش الا لو الهرمونات مظبوطة، و لو عندك هرمون زيادة او ناقص هياثر على نفسيتك.

Seasonal – مواسم:

دايما الناس بتحب الشتا اكثر علشان بتحس فيه بالدفا و الغريب ان في الشتا بيكون في ركود للمشاعر، النوع ده بيكون الإكتئاب فيه بسبب انهم بيحسوا ان اليوم بيجري و بيخلص بسرعة (علشان الشمس بتغيب بدري) فبيحسوا انهم مش بيلحقوا يعملوا فيه حاجة.

Situational – ظروف حياتية:

الإكتئاب ده بيكون بسبب موقف معين صعب الانسان مرّ بيه، مش مهم ايه الموقف قد ما مهم انه يكون حرك مشاعره جامد و خلاه يمرّ بنوبة حزن، ممكن تكون ذكرى طفولة صعبة مرّ بيه، او حادثة بالعربية، او حياته اتغيرت مرة واحدة يعني كان مدير شركة مثلا و اتطرد مرة واحدة، او موقف مرعب زي اي حادثة انتحار سمعنا عنها اليومين اللي فاتوا، ناس كثير اتأثرت بيه و مرت بإكتئاب بسببه و انا منهم.

الإكتئاب للراجل و الست :

طبعا انت فاكر ان الأنواع دي بتيجي اكيد للستات بس عشان هما الـover reacting و نكديين و هكذا.. لكن أنت عارف ان الإحصائيات العالمية بتقول ان أكثر ناس بتنتحر هما الرجالة؟ عشان التقاليد العالمية و الإعتقادات أن الراجل مبيعيطش، مينفعش يشتكي، لازم يكتم جواه علشان ده معنى تحمل المسئولية و الرجولة!!

اما فوزية بتمر بالإكتئاب اكثر من سي السيد لكن مش بتنتحر بسهولة، و ده لأن الست بتحب تشارك جوزها  في زعلها و تشتكي لو متضايقة مع عيلتها و تزعق و تعلّي صوتها عشان تخرج كل اللي جواها، الست دايما بتتأثر أسرع و لأن الـهرمونات عندها بتلعب عامل مهم و ضغوط المجتمع عليها و تربية العيال و هكذا..

الإكتئاب في منه انواع:

1- الإكتئاب الذهني:

فاكرين احمد حلمي في فيلم اسف على الإزعاج هو كان مصاب بالإكتئاب الذهني بسبب وفاة والدهُ.

هنا زيادة انه هيحس طبعا بالأعراض اللي قولناها فوق هيزيد عليهم كمان

  • الهلوسة: انك تتخيل شيء مش موجود اصلا، زي ما أحمد حلمي كان بيتخيل ان والده بيكلمه و انه معاه في الاوضة و هو مش موجود.
  • الأوهام: أن لما حد يكلمك او يعدي من جانبك تتخيل انه اهانك او ضايقك وهو مجاش جانبك زي احمد برضو لما كان بيتخيل ان البواب بيشتمه كل يوم الصبح.
  • جنون الشك او جنون العظمة: أحمد حلمي برضه  بس في فيلم الف مبروك لما كان بيشك في مامته و اخته ما ده جنون الشك. و هتلر لما قتل الناس اللي من وجهة نظره ميستحقوش يعيشوا ده كان بسبب جنون العظمة.

2- الإكتئاب النفسي:

في نوع الإكتئاب ده الشخص بيحس بأعراض الاكتئاب الطبيعية زي:

  • انه يبقى مفيش تركيز، و يحس بأن مفيش امل.
  • يبقى منعدوش ثقة في نفسه، و يحس انه معملش حاجة في حياته و مش هيعمل.
  • يحس انه ملوش لازمه انه عايش علشان كده تلاقيه بيبعد عن اي مشاكل، لأن حاسس ان ملهاش لازمة المشاكل و مفيش حاجة تستاهل.
  • معندوش القدرة انه يدخل في اي نقاش علشان هو طبعا مش شايف ان الموضوع ده مهم ولا عنده القدرة على انه يقنع حد بحاجة.

3- الإكتئاب للحومل:

ستات كثير بسبب تغير الهرمونات بعد الحمل، و مع وجود مسئولية جديدة عليها و بيبقى احساس ان معاها شخص جديد هي مسئولة عنه بيزود احساسها بالإكتئاب لأنها بتحس انها عايز تتخلص من كل ده و ترجع تعيش لوحدها ثاني من غير اي مسئولية.

الـشِفا

علاج الإكتئاب مش بس بالأدوية او الطب النفسي زي ما الناس بتفتكر، ممكن الطب البديل دلوقتي و لو أنت لسه في مرحلة الإكتئاب البسيطة (اللي هو قبل ما الموضوع يبقى مرض)، تغير روتين يومك بيبقى كفاية وبيساعد جداً. اللي بيحدد نوع العلاج دايما بيكون الدكتور النفسي، ساعات نوع واحد بيكون كفاية و بيحصل تحسن و ساعات بتحتاج تستخدم ادوية مع علاج نفسي. العلاج النفسي دلوقتي مبقاش بس انك تروح لدكتور علشان تاخد جلسة و تعدي، لا دلوقتي بقى في ما يسمى بالـtherapy groups و ممكن meditation كمان.

  • الصحاب!! .. تصدق ان الصحاب من أهم طرق علاج الإكتئاب، ان يكون في حياتك ناس تدعمك و تقدر تعتمد عليها و تسمعك و في نفس الوقت متحكمش عليك ده احسن علاج للإكتئاب اللي هيخليك تفضل دايما على بعد امتار منه.
  • وجود روتين في حياتك(هتقولي ما الروتين بيجيب اكتئاب، لا الروتين بيجبي ملل فبتحتاج كل فترة ان تكسره، لكن لما تصحى كل يوم و أنت عارف تعمل ايه في حياتك ده بيخليك تعرف هدفك من يومك ايه)، و انك تعمل تمارين كل يوم دي من الحاجات اللي بتساعد انك متكتئبش.

في دلوقتي applications  على الـmobile  بتساعد انك تعالج الإكتئاب لو لسة في اوله او انك تبعد عنه خالص زي:

Positive Thinking:

لو أنت لسة مدخلتش في الإكتئاب ده هيساعدك أنك تبعد عنه لأنه بيقدملك inspirational quotes  و افكار بتساعدك على انك تخلق امل جواك و حالة من السعادة.

Depression CBT Self-Help Guide:

اما لو أنت بدأت تدخل في مراحل الإكتئاب البرنامج ده هيساعدك انك تحدد سببهُ وهيديك حلول و طرق تقدر تساعد بيها نفسك علشان تبعد عنهُ قبل ما يتمكن منك و يبقى مرض.

في الأخر

الإكتئاب مرض، و لازم يتعالج، انك تكتئب كل شوية و تفتكر ان ده عادي لو الموضوع اتكرر و حسيت انك  مع اي مشكلة بتحصل عندك تكتئب يبقى أنت محتاج تتعالج، واوعى تفتكر ان الدكتور النفسي للمجانين وتتكسف تروحلهُ، هو أنت بتتكسف تروح لدكتور السنان؟ أكيد لأ لأنك شايف انه عادي عشان سنانك وجعاك، المرض مش عيب ولا فيه حاجة تكسف، ولو عندك أطفال خد بالك منهم كويس جداً و لو حسيت ان عندهم اي حاجة من اللي فانت كلم الدكتور علطول.

لو عايز تعرف انت مكتئب ولا لاء تقدر تدخل هنا و تعمل depression test.

حجات ممكن تهمك :

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك