معايير اختيار حضانة الطفل

مع أول طفل بالذات بيبدأ الأب و الأم يحتاروا كتير و هما بيختاروا حضانة ابنهم ! المشكلة أن غالباً الإختيار فى الحالة ديه بيبقى معتمد على ترشيح الصحاب أو القرايب ، أو معتمد على قرب المسافة أو بعدها !

بس الحقيقة أن الإختيار على أساس الحاجتين دول مش كافى خالص عشان تختاروا على أساسهم المكان اللى هيقضى فيه الطفل أهم سنين فى حياته .

امال نعمل ايه ؟!

المفروض إنك قبل ما تختاروا حضانة ابنكم أو بنتكم تبدأو قبليها بفترة تشوفوا الخيارات المتاحة و تقارنوا ما بينهم عشان تقدروا تختاروا صح و بطريقة علمية .

ايه هى الحاجات اللى هنقارن على أساسها ؟!

مبدئياً الإختيار مش هيكون من خلال بس السؤال ، لأ أنتم المفروض قبل ما تختاروا بتروحوا الحضانة و بتتأكدوا من الحاجات الجاية ديه بنفسكم ..

درجة الأمان بالحضانة: 

أهم حاجة طبعاً لازم نطمن أنها موجودة فى المكان اللى هيقضى فيه طفلنا حوالى 6-8 ساعات يومياً أن يكون المكان آمن و مفيش خوف على الطفل فيه ، و ده بيكون عن طريق أن احنا نتأكد من كذا حاجة :
1- نسأل إذا كان الحضانة فيها أفراد متخصصين فى الإسعافات الأولية ولا لأ ؟ عشان -لقدر الله- لو حصل أى حادث يقدروا ينقذوا الموقف

2- لازم نتأكد بنفسنا إن مبانى الحضانة كلها مؤمنة لإسخدام الأطفال ومفيش أى حاجة ممكن تأذيهم ، يعنى مفيش حواف حادة فى أى مكان و الأرضية مفروشة بمادة عازلة عن البلاط أو السيراميك عشان الصدمات زى السجاد ، المووكيت أو الفيلين (خصوصاً لو الأطفال أقل من 5 سنين)

3- ممكن تطلبوا أنكم تشوفوا أماكن اللعب فى الحضانة وعلى المساحة بتاعتها و خامات الأرضيات و نوعية الألعاب و عددها وهل كل ده مناسب لعدد الأطفال اللى جوه الحضانة و لا لأ ؟ كمان نتأكد أن أماكن اللعب لو كانت “اوت دوور” تكون مجهزة ضد عوامل الجو زى الشمس و الأمطار عشان متأثرش سلبياً على أطفالنا!

4- نتأكد أن فى تأمين على باب الحضانة أو أنه على الأقل مقفول كويس طول الوقت عشان نضمن أن الطفل مش هيخرج للشارع بدون علم المشرفين

5- لو هتشتركوا فى خدمة الأتوبيس فلازم تتأكدوا من أن الأتوبيس مناسب لنقل الأطفال سواء من ناحية عدد الأطفال اللى هيبقوا فيه ، أو من ناحية جودة الأتوبيس نفسه .

 الصحة :

أكيد مكنش ينفع حاجة تيجى كتانى أهم عنصر و أنت بتختار حضانة ابنك حاجة غير الصحة ، لأن الأطفال فى مرحلة الحضانة أكيد لسه مناعتهم مكتملتش و بالتالى محتاجين عناية خاصة و اهتمام مستمر ، و عشان نتأكد أن الحضانة هيهتموا فعلاً من صحة ولادنا لازم نتأكد من أنهم بيطبقوا كل النقط ديه :

1- الحضانة فيها طبيب أو على الأقل ممرضة متواجدين بصفة دائمة جوه الحضانة و بيعملوا كشف دورى على الأطفال .

2- الكشف الدورى مش بس للأطفال لكن كمان على كل العاملين بالحضانة لأن للأسف ممكن يبقوا هما سبب رئيسى فى نقل العدوى .

3- الحضانة فيها نظام ثابت لتنظيف و تعقيم الأدوات و الأماكن اللى بيبقى موجود فيها الأطفال .

4- الحضانة بتهتم بأن الأطفال يغسلوا ايديهم أكتر من مرة فى اليوم خصوصاً بعد الوجبات او فترات اللعب .

5- فى نظام خاص للتعامل مع الأطفال اللى بيعانوا من أمراض مزمنة ، و فى متابعة مستمرة لنظام الدوا بتاعهم .

6- لو الطفل أصغر من سنتين فلازم نتأكد أن الحضانة فيها مكان لتغيير الحفاضات .

7- أخيراً لازم نتأكد أن الحمامات فيها ماية جارية باستمرار و كمان فيها صابون يد سائل و أوراق تنشيف.

 جودة الطعام:

وده نقدر نتأكد منه من الإجابة على كذا سؤال مهمين ..

1- يا ترى الحضانة بتقدم وجبات أصلاً ولا لأ و كام وجبة فى اليوم ؟

2- لو الطفل عنده حساسية هل يقدروا يوفروا وجبات خاصة ليهم ؟

3- هل فى قايمة واضحة للطعام ولا الموضوع حسب رغبة الطفل و مش منتظم ؟

4- شكل الأدوات المستخدمة و فى نظام معين للتأكد من نظافتها ؟

5- هل ينفع الأطفال يروحوا الحضانة بأكل من البيت و لا لازم يلتزموا بأكل الحضانة ؟

المناهج الأكاديمية :

أكيد مهما كانت الحضانة كويسة فى كل النقط اللى قولناها فوق مش هنختارها لو حسينا أنها مبتعلمش الطفل حاجة ، لأن كمية المعلومات اللى الطفل مستعد يستقبلها فى السن ده بتبقى كبيرة جداً وبالتالى بتكون فرصة كويسة أنه يتعلم صح فضرورى منضيعهاش .. و عشان نتأكد أن النظام التعليمى صح فى الحضانة لازم نسأل على المناهج الأكاديمية اللى بتدّرس للأطفال و هلى هى فعلاً مناسبة لسنهم و لا لأ ؟! كمان نعرف عدد الاطفال فى القاعات و طريقة المتابعة والتواصل ما بين الحضانة و البيت

المواعيد :

أخر حاجة هى المواعيد خصوصاً لو الأب و الأم بيشتغلوا فلازم نسأل عن مواعيد الحضانة و هلى فى ساعات إضافية ممكن الحضانة تستقبل فيها الأطفال لو الأب و الأم اتأخروا لظرف طارئ .

قوللنا ايه أكتر مشكلة بتواجهكم و انتو بتختاروا حضانة لولادكم ؟

 

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك