ما هي اعراض ارتفاع الضغط | الدليل الكامل لضغط الدم 2017 - شفاخانة

قبل ما نبدا الكلام فى موضوع  اعراض ارتفاع الضغط  .. خلينى اقولك ان ضغط الدم سواء كان حالة مؤقتة او مرض مزمن .. فعلاجه سهل  ، لكن مينفعش نهمله او نستخف بيه.

انا عايزك تكون متطمن وانت بتقرا المقالة دى،  بس لازم تعرف ان 26% من المصريين عندهم اعراض ارتفاع الضغط عشان متطمنش اوى وتفكر ان الضغط مش مستاهل انك تقرا المقالة دى كلها .

لكن انا جاى النهاردة اقولك ازاى تتحكم فى مرض الضغط وتسيطر عليه وتقلل من خطورته وتمنع مضاعفاته ، وبأكد عليك انك لازم تسيطر عليه قبل المضاعفات” .

خلينا الاول نعرف معني ارتفاع ضغط الدم ؟

الضغط عبارة عن عملية جهد بيعملها الدم على الاوعية الدموية ، والجهد ده بيكون سببه انقباض وانبساط القلب .. على سبيل المثال نقدر نعتبر الحنفية هى القلب ، والمياه اللى نازلة منها هى الدم ، والخرطوم هو الاوعية الدموية .. ولما بنفتح الحنفية ، المياه بتتحرك جوة الخرطوم “فينبسط” .. ولما بتقفلها الخرطوم “بينقبض” .

وكل حاجة فى جسم الانسان ليها مقدار طبيعى .. ومستوى ضغط الدم الطبيعى لاى شخص هو ما بين 70/110 و 80/120 .

طب هو ليه ضغط الدم له رقمين ؟ ومعناهم ايه ؟

كل رقم فيهم بيقيس عملية مختلفة ، القلب بيضخ الدم الى الشرايين وبيستقبل الدم من الاوردة عن طريق عملية ( الانقباض و الانبساط ) .. ولو قلنا ان الضغط بتاع فلان هو 80/120 .. فرقم 80  بيقيس ضغط الدم فى عملية الانبساط ، وده بيتسمى “ضغط انبساطى” ، اما رقم 120 فده قياس ضغط الدم فى عملية الانقباض .. واسمه “ضغط انقباضى” .

طب هو ازاى يعنى اتحكم بقى فى ارتفاع ضغط الدم ؟

كل عملية حيوية فى جسم الانسان بيبقى ليها عوامل محددة بتاثر عليها .. والعوامل المؤثرة على ضغط الدم هى :-

  1. معدل ضربات القلب ( لو بتجرى ضربات قلبك هتزيد ، لو نايم ضربات قلبك هتقل)
  2. معدل سريان الدم الوريدى ( لو اتقفل على صباعك الباب .. بيظهر لونه ازرق ، ده معناه ان الدم الفاسد اللى هيخرج عن طريق الاوردة اتحبس جوة الصباع وده بياثر على معدل سريان الدم الوريدى)
  3. انقباض وانبساط الاوعية الدموية ( الاوعية الدموية بتبقى مرنة يعنى تقدر تنبسط وتنقبض يعنى زى خرطوم المياه لما بتفتح المياه بيتمط ولما بتقفلها بينكمش ،  فلو حصل تجلط فى الاوعية فده هياثر على مرونة الاوعية الدموية ويخليها تبقى ناشفة ، وبالتالى حركة الدم جوة الاوعية الدموية هتبقى صعبة)
  4. لزوجة الدم ( كل ما يكون الدم لزوجته عالية كل ما ضغط الدم يقل يعنى بيبقى عامل زى العسل كدة بيبقى ماسك نفسه وبيتحرك بصعوبة .. والحالة دى بتبقى واضحة اكتر فى مرضى السكر )

طب هل ضغط الدم مرض مزمن ولا حالة بتروح مع الوقت ؟

هو مرض مزمن، وحالة بتروح مع الوقت .. الاتنين .. وده معناه ان فيه ناس بيجيلها الضغط  كمرض مزمن، وناس بيجيلها الضغط فى وقت معين وبعدين بيروح .

ودى اسباب ارتفاع ضغط الدم بشكل مزمن :

  1. الكحوليات .
  2. التدخين .
  3. السمنة (ودى ممكن تجيب تصلب فى الشرايين)
  4. الملح (يعنى الناس اللى بتحب الملح كتير فى الاكل محتاجة انها تقلله)
  5. مرض السكر (وده بيكون نتيجة لمضاعفات مرض السكر نفسه)
  6. اسباب مرضية (زى امراض القلب)
  7. اسباب وراثية (السبب ده نادر انه يحصل ، لكنه بيحصل)
  8. العصبية (العصبية هنا معناها التوتر والنرفزة والضغط والقلق ، لان الحاجات دى من اهم اسباب الاصابة بمرض ارتفاع الضغط المزمن وامراض تانية)
  9. وجود اورام بالكلى .
  10. اورام بالغدة الكظرية
  11. عيوب خلقية بالاوعية الدموية
  12. ادوية ومواد مخدرة
  13. مرض السكر وتصلب الشرايين

طب دى اسباب الحالة المزمنة ، فيه اسباب تانية بتبقى للحالات المؤقتة .. اللى هو ارتفاع ضغط دم لساعة او اتنين وبعدين الضغط بيرجع لحالته الطبيعية.. والاسباب هى :

  1. التوتر والضغوط النفسية .
  2. التعرض لخوف شديد .

وزى ما قلنا فى الاول ان مرض الضغط سهل وعلاجه بسيط ، وان المريض ميقلقش لما يجيله ضغط  لكن برضه مينفعش يتجاهله .. هنا بقى فى شوية حاجات هنقولها عشان المريض يعرف ان تجاهل المرض  ممكن يعمل اضرار زى  :

  • ذبحات الصدر .
  • ذبحات القلب .
  • نزيف المخ .
  • فشل وانفجار القلب .
  • انفجار الاوعية الدموية .
  • الفشل الكلوى الحاد .
  • تمزق وتليف شبكية العين .

الهدف من اننا نقول لك الحاجات دى هو انك تكون عارف اكتر عن المرض ، عشان تاخد بالك ولو تعرف حد من مرضى ارتفاع الضغط المزمن تنصحه .

خلينا ندخل على مرحلة التصنيفات ، يعنى نقسم مرضى ارتفاع الضغط المزمن لنوعين .

النوع الاول .. وده بيمثل 95% من المصابين ، وبيكون نتيجة  لكل الاسباب اللى قلناها فوق عدا الكلى.

النوع التانى هو النوع الثانوى .. وده بيمثل 5% فقط من المصابين ، وده بيكون نتيجة (اضطرابات الكلى – اضطرابات الغدد – الحمل – الانيميا – الحمى – الاورام السرطانية) .

  واهمال ارتفاع الضغط المزمن .. هيؤدى الى مضاعفات خطيرة زى اللي هقولكم عليها دي :

اعراض ارتفاع الضغط :   

  1. صداع مع دوخة .
  2. نزيف انفى .
  3. الم فى مؤخرة الراس عند الاستيقاظ .
  4. الم فى الصدر .
  5. مش قادر تتنفس كويس  .
  6. قلة تركيز  .
  7. ضعف فى الاطراف .
  8. تشنجات .
  9. زغللة وضعف بصر .
  10. العرق زيادة عن اللزوم .
  11. تشنج عضلات .
  12. ضعف عام .
  13. تبول بشكل متكرر .
  14. القلب ضربات قلبه سريعة  .

و اعراض ارتفاع الضغط  دى مش هتظهر الا لو دغط الدم المزمن عندك وصل لمراحل خطيرة .

 الاجراءت اللى المفروض يعملها معاك الدكتور لـ علاج ضغط الدم : 

احنا اتكلمنا عن مضاعفات المرض .. لكن متكلمناش عن اعراض المرض نفسه ، فى الحقيقة  ان مرض ارتفاع الضغط المزمن اعراضه مش بتبقى واضحة وصريحة .. عشان كدة لو كان عندك سبب من الاسباب اللى كتبناها تخليك تُصاب بارتفاع الضغط المزمن يبقى المفروض تتابع مع دكتور .. ومن المفترض ان الدكتور هيعمل معاك الاجراءات دى :-

  • يقيس الضغط بتاعك ، وخلّى بالك ان لو ظهرت شعيرات دموية حمرا رفيعة فى العين .. فده معناه ان ضغطك مرتفع ولازم تقيسه .
  • يسالك عن التاريخ الوراثى عشان لو فيه حد من عيلتك كان مريض بارتفاع ضغط الدم المزمن .
  • يطلب منك تحاليل للتأكد من وظائف الكلى عشان يقدر يحدد نوع الضغط اللى عندك .
  • تحلل الاملاح فى الدم ، السكر فى الدم ، الكوليسترول فى الدم .

و حسب اخر الابحاث الطبية اكتشفوا ان مرض الضغط بيزود من خطورة  الاصابة بالسرطان ،.. والموضوع ده عند الرجال هيزود خطر اصابتهم بسرطان الفم والرئة والمثانة والكلى والقولون والمستقيم والجلد .

وعند النساء هيزيد من خطورة اصابتهم بمرض سرطان الكبد والبنكرياس وعنق الرحم .

فيه طرق مختلفة تانية لـ علاج ارتفاع الضغط المزمن ، وهنقولك على شوية منها :

  1. لو المريض مصاب بالسمنة ، يبقى لازم يخس شوية .. زى ما اتفقنا فوق ان السمنة ممكن تؤدى الى تجلط الدم وزيادة لزوجة الدم .
  2. ممارسة الرياضة لانها فوق كل شئ هى النصيحة الاهم عشان الواحد يعيش حياة صحية وسليمة .
  3. قلل من التدخين لان مادة النيكوتين بترفع من ضغط الدم .
  4. بلاش توتر وعصبية .
  5. متكترش من الملح فى الاكل .
  6. المريض بارتفاع ضغط الدم المفروض يقلل من القهوة والكافيين .
  7. بالاضافة الى بعض الادوية اللى ممكن يوصفها لك الدكتور عشان تساعد فى ابقاء مرض ارتفاع الضغط المزمن تحت السيطرة .

الكلام ده كله طرق للوقاية ومعرفة الاسباب عشان الناس تتجنبها .. لكن فيه ناس بيتصنفوا كاكثر عرضة للاصابة بمرض ارتفاع الضغط المزمن وهم الاشخاص فوق الـ60 سنة .. واكتر من 90% من الحالات دى غير معروفة السبب .

طيب لو فيه شخص اتصاب بارتفاع الضغط ، تفتكر ايه اكتر اعضاء بتتاثر بالمرض ده ؟!

1- القلب : وبيظهر التاثير فى انسداد الشريان التاجى والنوبات القلبية ، مضاعفات التاثير ممكن تؤدى الى الوفاة .

2- الدماغ : وده بيظهر فى شكل نوبة فقدان مفاجئ للقوة والاحساس بالشلل والسكتة الدماغية

3-الكلى : ولو اتاثرت بارتفاع ضغط الدم المزمن هتقل قابليتها للتخلص من الفضلات والسموم .. وبالتالى هترتفع نسبة السموم فى الدم .

الوصفات الطبيعية فى علاج  اعراض ارتفاع الضغط

كدة احنا وصلنا لمرحلة اننا نكلمكم شوية عن اهم الوصفات الطبيعية الفعالة فى علاج ارتفاع الضغط المزمن والتحكم فيه :-

  1. شرب المياه كتير بيساعد على خفض ضغط الدم .
  2. الكمثرى فيها فوائد كتيرة جداً وننصح بيها مرضى ارتفاع ضغط الدم المزمن والسكرى .
  3. الكاكاو فى الاطعمة والمشروبات بيساعد على خفض ضغط الدم ويحافظ عليه فى مستواه الطبيعى .
  4. الفواكه عموما زى البرتقال والموز وعصير العنب والبطيخ والكاجو .

لكن بالتاكيد مش دايما بيحصل ارتفاع فى ضغط الدم ، فيه حالات تانية بيحصل فيها انخفاض فى ضغط الدم  .

و اعراض انخفاض ضغط الدم هى :-

  1. دوخة .
  2. لو حد ضغطه انخفض فيه احتمالية كبيرة انه يحصله حالة اغماء .
  3. صداع مستمر من غير اى سبب .
  4. مشاكل فى الرؤية والنظر .
  5. قلة تركيز .
  6. حالة ضعف عام للجسد بتوصل احيانا لدرجة انه ممكن ميكونش قادر يقف .
  7. غثيان وقئ .

طب ايه بقى الاسباب اللى ممكن تخلى الواحد ضغط دمه ينخفض ؟!

  • ان الواحد يخرج من بيته عشان شغله او دراسته من غير ما يفطر مناسبة .
  • المجهود الكبير من غير راحة .
  • التعرض للشمس لفترات كبيرة ، بالبلدى “ضربة شمس” .
  • اذا كان الشخص عنده انيميا مزمنة فهو معرض لانخفاض ضغط الدم .
  • العرق الشديد .

لو عندك مرض الضغط قولنا اسم الدوا اللى بتستخدمه ؟

_

مواضيع ممكن تعجبك :

13 لغز في روشتة دكتور الضغط 

أهم 10 تحاليل دورية لمرض السكر

 

شاركنا

عن الكاتب :

تحت هتلاقي نصايح تقلل اضرار الحشيش بس ده مش بنقوله عشان الناس تشرب اكتر، احنا بنقول كده عشان اللي كده كده مش هيبطل يتضر اقل لأن هي دي مهمتنا والله، اننا نرفع المستوي الصحي عند المصريين.

شارك بتعليقك