[ افضل ادوية التخسيس 2017 ] و حقيقتها ( خدعة هتدمر صحتك ) - شفاخانة

  هي افضل ادوية التخسيس فعالة فعلاً و بتحيب نتيجة؟ يعني ينفع تاخد دوا وتخس من غير رياضة ولا نظام غذائي؟ ،

دول تقريباً أهم سؤالين هنجاوب عليهم في المقالة دي  وهنجاوب كمان عن الأسئلة دي  :

ازاي بنخسر الوزن الزايد ؟

اضرار ادوية التخسيس 

  افضل ادوية التخسيس الامنة سريعة المفعول

ازاي بقا بنخسر الوزن الزايد؟

المتعارف عليه انه الدهون بتتكسر و تتحول لطاقة، او بتخرج في صورة مياة زيادة (العرق) لكن في الواقع الوزن الزيادة بيخرج من الرئة على صورة ثاني اكسيد الكربون، لان الدهون لما بتتكسر بتتحول لاوكسيجين و هيدروجين و كربون، اللي لو اتجمعو سوا بيتحولو لـذرات ميه و كربون دايوكسايد و النتيجية اان 85 من الـfat اللي بتخسها بتخرج من الجسم عن طريق الرئة و الـ15 اللي باقيين عن طريق المية سواء عرق او دموع او دخول الحمام ، فالحل المعروف دايما اننا نعمل رياضة .. فيدخل اوكسيجين كتير و يطلع ثاني اوكسيد الكربون كتير فالواحد يخس اكتر و الحل التاني انك تاكل كاربون اقل!

 خلونا نشوف بقى ادوية التخسيس بتشتغل ازاي و نقارن

ادوية التخسيس بتشتغل على 3 طرق مشهورين :

1- ماتحسسش بالجوع (تقليل الشهية من خلال مراكز الشبع في المخ):
من خلال التاثير علي مراكز الجوع و الشبع الموجودة في المخ عشان هي بتأثر علي المواد الكيميائية التي بتقوم بنقل الاشارات العصبية في المخ

2- بيحرق كثير (زيادة العصبية).
النوع دة من الادوية بيشتغل برضو على المخ و بيلعب على انه يلعب على اعصاب معينة يخليك energetic اكثر، عشان بيزود سرعة نبضات القلب و يخليك تحرق اكتر.

من امثلة الأدوية اللي بتسبب ده:

3- ماتتخنش (أمتصاص المواد الغذائية من الجهاز الهضمي).
الأدوية دي بتشتغل على تقليل امتصاص الدهون من الأكل اللي داخل الجسم، لكن في المقابل الفتيمانات الصحية اللي موجودة في الدهون الجسم مش بياخدها و الحل البديل هو ان الدكتور يديكي ادوية فاتمينات زيادة.

طب الدهون هتخرجي ازاي؟ هتخرج على هيئة براز و هيسبب اسهال (يمعروف بالاسهال الدهني)

 

فايدة الدهون ايه:

  • بتحافظ على مستوى الكليسترول في الدم.
  • بتحمي الجلد من الجفاف.
  • مصدر مهم للفيتامين الـ أ، د، ه، ك و هي اللي بتحفز الأمعاء على امتصاص الفيتامينات دي.
  • الدهون هي مصدر الطاقة الأولى.
  • بتساعد الجسم على الأستفادة من الكربوهيدرات و البروتينات.

 

أنواع الدهون:

الدهون المشبعة:

  • هي الدهون اللي تعتبر غير صحية بس بما ان مفيش حاجة كبيعية غير صحية! احنا بس اللي بنخليها كدة، فأستخدامك ليها بنسبة تزيد عن 10% من كمية الأكل اليومية، ده اللي بيحولها لدهون غير صحية.
  • الزيادة منها بيرفع الكليسترول و بيكون سبب في ترسب الدهون في الشرايين.
  • الدهون المشبعة موجودة في:
    • الزبدة، زيت جوز الهند، الفول السوداني، زيت الخضار، الأكل القلي و الأكل المتفرزن.

الدهون الغير مشبعة:

  • الدهون الصحية، بس برضو زيادة عن نسبة معينة هتقلب مش صحية، فأكثر من 30% من نسة الأكل هو زيادة عن حاجة الجسم.
  • طول ما انت محافظ على نسبتها في الأكل و مراقب الكيسترول فمش هتكون مضرة عليك.
    • زيت عباد الشمس، افوكادو، اللحم الأحمر، زيت السمك، زيت الزيتون و الـflax.

: كل شئ عن افضل ادوية التخسيس و اضرارها

دي مش كل ادوية التخسيس لكن دول المتعارف عليهم في مصر و ممكن تبعتلنا اي دواء لو مش متواجد هنا و احنا هنساعدك نعرفك هو بيعمل ايه بالظبط و تأثره على الجسم. 

1- الأورليستات او الزينيكال:

 بيُقال انه من افضل ادوية التخسيس اللي بتشتغل على تقليل امتصاص الدهون، و اتعمل عليه اكتر من بحث، في بحث اثبت ان اللي هيستخدم اوليستات و يكون بيتبع نظام غذائي و بيعمل رياضة هيخس 2 او 3 كيلو بس زيادة!

  • دراسة تانية اثبتت ان بعد التوقف عن الدواء وزنك هيرجع يزيد بنسبة 35% في وقت قليل جدا.
  • ارتفاع نسبة اصابتك بأمراض الكلى 3 مرات و دة لأن بسبب عدم امتصاص الدهون حصل تراكم لمواد ضارة على الكبد.

 

دي تجربة لواحدة استخدمت الاورليستات بيأكد على كل المعلومات اللي اتكلمنا عنها فوق لمن المشكلة ان الدوا كل اللي كان بيعمله انه بينزل الدهون اللي بتتاكل في النظام الغذائي – اللي المفروض معمول من غير دهون و اكل صحي و بيساعد الجسم انه يخس و بيديله احتيجاته المطلوبة فقد مش زيادة- فتخيل بقى لما يكون جسمك داخلة 3 انواع فيتامين مثلا و بكمية محدودة و الدوا يمنص امتصاصهم، و في الاخر كل اللي بينزله زيادة هم 2 او 3 كيلو في خلال السنة!! فطبعا الجسم حاول يخس و بيأثر على صحته كمان!

دة لأن فوق قولنا فايدة الدهون ايه، تخيل الكمية الصغيرة اللي هي المفروض تكون الحاجة الاساسية في الجسم، ثلثها ميحصلوش امتصاص.

 

2- الشيتوكال:

هو من الأدوية اللي ملهاش اي لازمة حتى اللي 2 او 3 كيلو بتوع زينيكال مش بتعملهم و هو بيتكون من مادة تسمى الـشيتوسان و هي مادة بتستخدم في الدهانات و السماد و المبيدات الحشرية!

 

مأظنش اننا محتاجين نتكلم عن الاعراض الجانبية للشيتوكال كفاية مادة اللي بيتكون منها و ان منظمة الغذاء الأمريكية رفضت الموافقة عليه.

في حين ان نسبة مبيعات الشيتوكال في مصر وصلت لـ30 مليون جنية في السنة!

3- أتريم بلس zotreem extra:

المفروض ان اوتريم مصنوع من زرع في اليونان مشهور بأنه بيساعد على التخسيس، و موقع Best Slimming Pills بيرشحه جدا على اساس انه من الأدمية الطبيعية و مش بتحتاج موافقة من الدكتور،

و ان الاعراض الجانبية بتاعته بسيطة زي سدة النفس – و دة المطلوب- و غير كدة هو بدون اضرار جانبية. لكن على موقع Health Care Magic هتلاقي ان دتور راكش قال انه له اعراض جانبية، زي الاسهال و الترجيع و كمان الجفاف و مشاكل في المعدة و ممكن يعمل تفاعلات مع ادوية تانية، فالمريض لازم يكون حذر لو بياخد ادوية تانية.

4- Metformin المتفورمين:

دة دواء لعلاج السكر!، هو بيخسس طبعا و في ابحاث اثبتت انه بيخسسس من حوالي 5- 7 كيلو و دة بسبب انه بيزود افراز الأنسولين في الجسم فطبعا بيهضم اكتر، لكن بيخرب السكر في جسمك في المقابل و ممكن تجيب لنفسك مرض السكر بسبب الموضوع دة!

5- clenbuterol الكلينتبرول:

من الأدوية اللي بتتاخد بكثرة جدا في السوق المصري و الجيم بينصح بيه اكتر من واحد. كلينباترول من الأدوية اللي متكنتش معمولة للانسان في الأول، كانت دوا للحيوانات و للاحصنة بالذات و كان بيستخدم عشان يعالج امراض الرئة في الحصان، و بعديها اتعمل عليه دراسات و استخدموه كدوا للتخسيس و اتشهر بأنه “skinny pill”  و ليه تأثير قوي جداً.

الكلينبترول بيشتغل على انه بيحرق الدهون و يحول الشعرات الحرارية اللي بتتاكل يوميا لعضلات بدلا من دهون و دي طريقة علميا اسمها “repartitioning” .

زي اي حاجة عكس طبيعة الجسم، في تجارب كثير اتعملت على الحيوانات و اثبتت انه تسبب في امراض كتير و منها طبعا ازمات قلبية للحيوانات. و في الصين مجموعة من الناس اكلت لحم لحيوان كان متعالج بالكلينبترول و كان سبب في ازمات قلبية و وفات مجموعة الأشخاص دول.

دِول كثير منعت دخول الكلينتبرول لبلادهم لعلاج الحيوانات و طبعا لبني ادم، و في دول مسموح بدخول الدوا لكن المدربيين المحترفيين قدروا مخاطره على جسم الإنسان و منعوا الرياضيين عنجهم من اخدهُ.

في مصر للأسف الامر العكس!، كثر من المدربيين بيرشحوا الدوا على انه دوا هايل و مالوش اي تأثير سيء على الإنسان.

لو انت بتاخد الدوا و برضوا مصمم عليه على اقل الجرعة تكون من 20mg لـ125mg، و تزويد الجرعة ماينفعش يكون بمزاجك، لازم يكون تحت نصايح من متخصص، و يكون في وقت الليل، عشان يساعد العضلات على التكوين.

اعراض الكلينتبرول الجانبية:

زيه زي كل الأدوية اللي بتشتغل على انها تزود احرق،

  • زيادة في سرعة نبضات القلب.
  • رعشة، خاصة للأيد.
  • ارتفاع ضغط الدم.
  • زيادة التوتر، صداع .
  • زيادة العرق و صعوبة في التنفس.

6- Ephedrine الأفيدرين:

هو في الأصل مش علاج للتحسيس ، هو دوا بيستخدم لعلاج مشاكل التنفس و ضيق الصدر و حالات الربو.

و كمان هو مش من الأدوية القوية و عشان كدة مش بيستخدم كتير في الحالات دي، لكن للأسف منتشر كـدوا للتخسيس!
الأفيدرين من الأدوية اللي بتشتغل بطريقة علميا اسمها Sympathomimetics و دة النوع التاني اللي هو بيساعد الجسم على انه يحرق كتير.
الإفاديرين مش من الأدوية اللي بتستخدم لمدة طويلة، بينصح دايماً انه مايُستّخدمش اكتر من 7 ايام متتالية.

في النهاية الإفاديرين اتمنع من السوق و منظمة الأغذية و الأدوية الأمريكية FDA US سنة 2014  ادت عدم موافقاتها النهائية عن الدوا دة.

قبلها عملوا بحثيتن،

  • بحث سنة 1995، 330 واحد عانوا من اعراض جانبية شديدة جدا للدوا و 12 منهم ماتوا!  
  • بحث سنة 1996،  800 واحد عانوا من اعراض الإفاديرين الشديدة و 17 منهم ماتوا!

عشان كدة اضرار الإفاديرين  قوية جدا و مش اي دكتور بيصفهُ، و في بعض الحالات المرضية اللي بيتوصف فيها بيبقى بسبب رؤية الدكتور ان احتياج المريض ليه اقوى من اعراضه الجانبية.
في مصر طبعا بيستخدم عادي جداً على انه من احسن ادوية التخسيس و عشان يكون الإفاديرين فعال، بيتخلط بطريقة ما الجرعة بتاعته مع الكافيين، و اي حد بياخد ال\وا دة عارف انه تأثييره اقوى مع الكافيين.

اعراض الإفيديرين الجانبية:
شبيه جداً من أعراض الكلينتبرول الجانبية، و أقوى أعراضهُ اللي كانت سبب في منعه هي:

  • ازمات قلبية
  • سكتات قلبية
  • نوبات قلبية
  • 7- Chromium الكروميوم:

 الكروميوم هو حديد موجود اصلا في جسم الإنسان و بيستخدم بس بكميات قليلة عشلان يساعد في عمليات بتحصل جوة الجسم زي عملية الهضم، و بنقدر نحصل على الكروميوم من حاجات كتير طبيعية زي الزبادي و اللحمة و البطاطس و القمح و حاجات ثانية كثير..
عشان كدة الكروميوم يعتبر من الفاتمينات و منه أدوية و بتكون للناس اللي عندها السكر و بيشتغل على انه بينقل الجلوكوز اللي في الدم  لخلايا الجسم عشان تديها طاقة و يحول الكربوهيدرات و الدهون و البروتين لطاقة و مايتخزنوش في الجسم.
دايما بيتقال ان الكروميوم هو حديد اصلا في الجسم، فمالوش اضرار، و دة غير حقيقي لأن الجسم بيستخدمه بنسبة قليلة و اصلا هو بيقدر بكتسب النسبة القليلة دي من الأكل اليومي الطبيعي بتاع الإنسان. عشان كدة يستخدموه كدواء للتخسيس، و دة عن طريق انه يعلي نسبة السكر في الدم و يزود الحرق للدهون و الكربهيدورات و البروتين!
لكن لو الإنسان معندوش سكر و دة بيكون في اغلب الحالات، الدكاترة في الحالة دي بيأذوا جسم الإنسان اكثر ما بيفيدوه، عشان بيخربول نسبة السكر في دمه! و رغم انه مكون طبيعي من جسم الإنسان الا انه ليه اضرار على كدار الوقت جسيمة.

الأعراض الجانبية لدواء الكروميوم:

  • بيدمر الكبد و الكلى و الأعصاب
  • مشاكل في المعدة و انخفاض في مستوى الدم.
  • عدم انتظام في دقات القلب

المتعارف عليه ان الأعراض الجانبية للكروميوم مش منتشرة و دة حقيقي، بس أدوية التخسيس كلنا عارفين انها ادمان و لو الدكتور وصفهالك لفترة معينة، مش هتمسكي نفسك و هترجعي تاخديها، و اخدان الكروميوم فترة اطول من الللازم او بشكل زيادة هيتسبب في الاعراض دي بدون شك.

Green Tea الشاي الأخضر :

تقريباً الشعب المصري كله او العالم كمان مُجمع على ان الشاي الأخضر “بيخسس” و الناس بتشرب يوميا اكتر من 5 مرات غير  حبوب الشاي الأخضر.
دكتور كريستفور أوكر بيقول ” الشاي الأخضر من اكثر الأشياء الصحية الي ممكن تفكر تشربها”، و أن لو كل كوباية صودا استبدلناها بكوبايتين شاي أخضر. على مدار السنة نقدر نوفر 50,000 كالوري.

مميزات الشاي الأخضر:

  • بيحسن الدورة الدموية.
  • بيقلل الكليسترول.
  • و للمخ بيمنع تكون الخلايا اللي بتساعد على مرض الزهايمر.
  • بتحافظ على توازن السكر في الدم.

دة معناه ان الشاي الأخضر فعلاً بيخسس؟!
الشاي الأخضر بيتكون من إنزيم اسمه catechins، و الانزيم دة بساعد على عملية التمثيل الغذائي (metabolism)، علشان كدة  بيشتغل على انه يرفع الـ فيزود من حرق الدهون و السعرات الحرارية.

أعراض الشاي الأخضر السلبية:

  • بيعمل غثيان.
  • ترجيع.
  • غازات.
  • اسهال.
  • أرق.

الأعراض دي طبيعية جداً لأي حاجة بتشربها بكمية كبيرة حتى لو أعشاب طبيعية.

طب في الأخر الشاي الأخضر بيخسس؟؟
لاء!!، للأسف بعد ابحاث كثير الشاي الأخضر مش بيخسس هو بيساعد تحسين عملية الهضم و تدفق الدم في جسم الإنسان و بيخلي في المجمل صحته احسن. و في الأخر أكيد انتي لما هتشربي شاي اخضر هتكوني استبدلتيه بحاجة بتشربيها في يومك الطبيعي و الشاي الأخضر مش بيتخن و الكالوريز بتاعته قليلة جداً.

طب هو مالوش تأثير خالص؟!!
رغم ان مواقع عالمية زي Body building كاتبين ان ليه تأثير سحري الا ان تأثيره محدود جداً، هو بيساعد ععلى احساس الشبع بسبب انه بيعمل غثيان للبطن و مالوش اي تأثير لو اتشرب عادي من غير ريجيم يساعد الجسم على خسارة الوزن، او رياضة.

أدوية الشاي الأخضر:
هي مالهاش ايي فايدة و فلوس على الفاضي، تأثيرها اقوى بنسبة بسيطة عن الأعشاب الطبيعية. و في الأخر احسن حاجة هو عشب الشاي الأخضر الطبيعي بدون اي كماويات.

Ginger الجنزبيل:

الجنزبيل من الأعشاب المعروفة عالمياً و في مصر هو مش مجرد عشب بيتعمل بيه شاي الجنزبيل، لا بنستخدمه كتوابل في انواع كتير من أكلنا، و دة شيء كوس جداً نظراً لفوايد الجنزبيل.

مميزات الجنزبيل:

  • بيخفف من توعكات المعدة.
  • بيقلل من الغثيان.
  • بيودي احساس الترجيع.
  • مفيد جدا في حالات الغثاين اللي نتيجة للعلاج الكميائي.
  • بيقلل من الم الدورة الشهرية.

بيستخدم كعلاج قوي لآلام:

  • هشاشة العظام.
  • العضم و المفاصل.
  • الصداع.
  • الريموتويد.

و في أبحاث بس غير مؤكدة بتقول انه بيساعد في:

  • تقليل السكر في الدم.
  • تقليل الكليسترول.
  • تقليل تجلطات الدم.
  • احتمالية الأصابة بالزهايمر.

في أكتر من كدة مميزات للجنزبيل؟!، متهيألي لاء من احسن الأعشاب الطبيعية بس نيجي للنقطة المهمة..

هو الجنزبيل بيخسس؟
في دراسة تمت في معهد تغذية الانسان في جامعة كلومبيا عن الجنزبيل و اثبتت ان الجنزبيل مالوش اي سعرات حرارية، و ان كتر الجنزبيل بيقلل الاحساس بالجوع. ففعلاً الجنزبيل بيساعد على التخسيس مش بيخسس.
ملحوظة مهمة جداً: الكمية المسموحة للجنزبيل يوميا هي أقل من 5mg اكتر من كدة هيكون مضر لأنه بيعمل سيوولة في الدم، و عشان كدة خطر جدا على الحوامل خاصةً في الشهور الأولى من الحمل.

Cinnamon القرفة :

أي حد بيحاول يخس هو عامل زي الردار لكل الحاجات اللي ممكن تكون بتخسس، فبالطبيعي عارف ان القرفة من الأعشاب اللي بتساعد على التخسيس، رغم انها مش مشهورة اوي زي الجنزبيل و الشاي الأخضر، مع ان القرفة من اكتر الحاجات اللي اتعمل عليها أبحاث كانت نتايجها ايجابية الى حد ما و اقروا الدكاترة انها فعلا بتساعد على التخسيس.

القرفة فعلا بتخسس؟!

في أبحاث كثيرة جداً اتعملت في موضوع القرفة و علاقتها بالتخسيس، عشان كدة تعالوا قبل ما نتكلم في الأبحاث دي، نعرف معلومة مهمة عن طبيعة الجسم و ازاي بيتخن.
أول ما بناكل و الجسم يدخله كاربوهيدرات كثير بيحصل حالة تسمى بالـ metabolic syndrome، الحالة دي نتيجة لحالة بتحصل لجسمنا اسمها Insulin resistance.
الـinsulin resistance بيحصل لما الكربهيدورات تدخل في انزيم الهضم بيكسر الجلوكوز بسرعة في الجسم و في المقابل بيبدأ الجسم يضخ انسولين عشان يوصل لخلايا الجسم السكر اللي هي محتاجاه (احنا عارفين ان وظيفة الانسولين انها تساعد الخلايا على ان يوصلها السكر اللي هي محتاجاه عشان تقدر تنتج طاقة).
بعد شوية بيحصل زي تخدر لخلاي الجسم و بتبدأ تفقد احساسها بالانسولين و ماتستقبلش تاني سكر منه. و دي حالة الـ insulin resistant
الأنسولين بقى هو هرمون قوي جدا اول ما بيبدأ يتضخ في الدم، بيحفز الجسم على انه يخزن دهون، و طول ما الخلايا مش بتستقبل الأنسولين دة معناه وجود الانسولين بكمية كبيرة جدا في الدم، و بالتالي جسمك بيتحفز بطريقة قوية على انه يخزن الدهون
القرفة دورها ايه هنا بقى؟، دوره انه بيقلل الـmetabolic syndrome، و بيحاول يقلل نسبة وجود الجسم في حالة التخزين.

الأبحاث اللي بتؤكد على ان القرفة بتخسس:

  • Journal medical food 2009 عملت بحث و كانت نتايجه ان القرفة فعلا بتساعد على تقليل الـinsulin resistance و عشان كدة في احتمالة كبيرة ان القرفة تكون بتخسس.
  • European Journal of Applied Physiology عملت تجربة على 8 مشتركين و اخدوا 3 جرام من القرفة و في اليوم الـ14 لقوا ان نسبة الـ insulin resistance قالت بنسبة 27%.
  • Journal of Diabetes, Obesity and Metabolism عملوا تجربة على شخصين، الأثنين اخدوا 5 جرام من القرفة واحد اخده قبل الـتجربة علطول و نسبة الـinsulin resistance  قلت بنسبة 13% و التاني اخده قبل التجربة بـ12 ساعة و نسبة الـinsulin resistance  قلت بنسبة 10%.
  • أبحاث ثانية كثير بتقول ان القرفة مش بتخسس، و دة مش علشان النتايج مختلفة عن الأبحاث اللي فوق بس هما من وجهة نظرهم شايفين ان الأرقام اللي فوق دي مش بتفيد بأي حاجة.

في الأخر  لو بصينا على مجهتين النظر للأبحاث اللي فوق هنعرف الفايدة من القرفة و الأعشاب ككل، ان الأعشاب ذات نفسها مش بتخسس، قد ما ان هي بتنظم عمليةٌ ما  جوا الجسم و بتساعده على انه يهضم بشكل صحي اكثر او انه يقلل نسبة تخزين الدهون في الجسم . و هو ممكن يكون عامل مفيد جدا وقت ما بيتعمل نظام غذائي للتخسيس. و ايً كان هو مش هيضر الجسم بأي شكل من الأشكال و بالعكس لو حتى مفادش الجسم في التخسيس هيفدهُ على مستوى الصحة العامة.

النتيجة بعد المقال الطويل ده:

في مقولة على لسان دكتور أرثر اجتاستون  ” مفيش ادوية تخسيس ليها تأثير على المدى الطويل ولا امنة”
و دكتور ستيفين نيسين قال ” حتى لو ادوية التخسيس دي خسست اول ما توقفها هترجع تكتسب الوزن تاني و هتواجه خطورة الأزمات القلبية”.
تقريبا مفيش دوا فوق الا و ليه اثار جانبية مُضرة جداً و في منهم اللي متوافقش عليه من منظمة الأغذية و الأدوية الأمريكية. و بدل ما أحنا بنخس عشان صحتنا او شكلنا الخارجي هنأذي حاجات ثانية في الطريق معانا، عشان كدة أهم الجملة الشهيرة اللي سمعناها من كل  م الناس اللي بيفهم و الي بيتفلسف و خلاص و هو مش حاسس بمعاناة اللي عايز يخس ” النظام الغذائي مع الرياضة على و انك تعيش حياة صحية هي الحل الوحيد”. وممكن تقراء المقالة دي ، هتيغير وجهة نظرك عن الدايت من هنا

*(U.S. Food and Drug Administration (FDA

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك