افهم مخك ! - شِفاخانة

الزهايمر مرض، بس كل واحد بيبدأ يحس ان ذاكرته بتضعف او انه بدأ ينسى شوية تلاقي يقولك شكل بقى عندي زهايمر و لا ايه، هل ده فعلا زهايمر و لا الذاكرة بتضعف ليه ؟ دي مش بس بتضعف ده كمان تلاقيك فاكر حاجات من و انت عندك سنتين و فاكر كل تفاصيلها و مش فاكر اتغديت ايه امبارح !

طب تعالى نفهم من الاول خالص ..

  • هي ايه الذاكرة دي؟
  • الواحد بيبدأ تتكون ذاكرته و هو عنده كام سنة و بتأثر عليه ازاى؟
  • هي الذاكرة بتضعف فعلا مع السن ؟
  • هل كل ضعف في الذاكرة زهايمر؟

هي ايه الذاكرة ؟

الذاكرة مش مجرد انك تفتكر حاجة من زمان، الذاكرة معتمدة على 3 خطوات بيحصلو جوه المخ،

1- الترجمة

2- الحفظ

3- التذكر

يعني لما يحصل موقف انا فيه دلوقتي، يبدأ المخ يترجمه بلغة يفهمها المخ، و بعدين يحفظها في ذاكرتي، فلما اجي بعدين يحصل موقف تاني او احاول افتكر الاقي الموضوع في دماغي

بتتقسم الذاكرة بكذا طريقة

  • ذاكرة طويلة الامد .. التذكر لسنين فاتت و ذكرياتك الطفولة و المدرسة و كده 😀
  • ذاكرة قصيرة الامد .. انك تفتكر الكام يوم اللي فاتو 😉
  • ذاكرة فورية .. تفتكر و تنسى علطول، زي اللعب اللي على الكمبيوتر بنقعد نقلب فيها الورق و نفتكر الورق اللي شبه بعضه 😀

او ممكن نقسمهم عن طريق الحاجة اللي بتخليك تفتكر اكتر

  • ذاكرة سمعية .. دي الناس اللي بتفتكر الحاجات اللي بتسمعها اكتر من اي حاجة . يعنى و انت بتذاكر اللى بيخليك تفتكر انك تسمع .
  • ذاكرة بصرية .. دول بيفتكرو الصوراكتر، تلاقيهم ايام المذاكرة يقولو كانت في الصفحة الشمال تحت 😀 و ميفتكروش غير كده 😀
  • ذاكرة حسية .. دول بيتأثروا باللمس و بالحوادث الحركية اللي بتحصل، زي مكان معين بيعدو فين، و يفتكرو احنا كنا ماشيين ساعتها .. كده يعني

طب نبدأ من اول ما الطفل يتولد، تبدأ ذاكرته تتكون امتى ؟

الطفل اول ما بيتولد – و من و هو في الرحم كمان – بتتكون عنده ذاكرة التعود، اللي هي ذاكرة رد الفعل، بتبان الذاكرة دي لما بتلاقي انه عارف ان وضعية معينة معناها انه هيرضع، فلما الام بتقعده في الوضعية دي بيستعد للرضاعة، حتى بنلاقي اطفال عندهم ايام او اسابيع قليلة و لما بيجو ياخدو حقن اول يوم عادي،بس بيحسو بألم، لكن المرة اللي بعديها بيبقى متأهب لان ذاكرة التعود عرفته ان وضعية معينة ليها معنى معين  اللي هو هنا الألم.

اول حاجة بتدخل ذاكرته ان بيتعرف على صوت أمه اول ما يتولد، و يقعد اسبوع دي الحاجة الوحيدة اللي بتحفظها ذاكرتها و بعد كده يبدأ ريحتها، و مع الشهور الاولى يبأ يميز الاشخاص الاخرين.

طبعا كل ده و ذاكرة التعود برده بتلقط 😉 ذاكرته اللي بجد مبتبدأش الا و هو عمره سنة و نص تقريبا، بيبقى فاهم أحداث و فاكر ايام و ناس بيغيبو و بيرجعو و بيبدأ يتعلم كمان، بس الذاكرة دي بتكون ذاكرة ضمنية لا شعورية، نقدر نقول انها عاملة زي الذاكرة المؤقتة، او زي ما فرويد شايف ان الواحد لما بيكبر بيجيله ” فقدان الذاكرة الطفولية” بيبنسى الكلام ده لانه متخزن في الذاكرة الضمنية، مش الذاكرة الأساسية، لحد تقريبا سن الرابعة

هل ده معناه ان الطفل لما يكبر بينسى كل الحاجات دي و مبتأثرش فيه؟

اكيد لأ، لاننا بنلاحظ في حياتنا العادية ان في اشخاص بيكبرو متأثرين بحاجات معينة في حياتهم مرتبطة بسنهم لما كانو اصغر من 4 سنين، طب بيفتكروها ازاى ؟

في اشخاص ساعات بتفتكر فعلا و في اشخاص بتألف 😀

يعني ايه ؟ يعني في اطفال المواقف دي لما حصلت رجعت اتحكت تاني قدامهم لما كبرو شوية، فعلقت الحكاية في دماغهم  فافتكرو انهم فاكرين 😀 لكن في اطفال تانية بتفتكر لما تيجي تكبر و حد يجي يحكي الموضوع اللي حصل من و هو صغير من قبل ما يكمل بيكون هو افتكر، هو الفرق بينهم بسيط اوي، بس الفكرة يعني انه احتمالية انه يفتكر موجودة عادي جدا ،  فلازم ناخد بالنا من اطفالنا اقل من الـ4 سنين كويس جدا رغم اننا عارفين ان ذاكرتهم مؤقتة لان ممكن حاجات تعلق في ذاكرتهم  بالذات لو حاجة نفسية 😉

طب بعد ما الواحد يكبر و سنه يكبر اوي هل فعلا لازم يقلب بضعف الذاكرة ؟

لا طبعا مش شرط نهائي، اولا الذاكرة طويلة الأمد مبتضعفش عندهم تلاقيهم فاكرين كل حاجة و مدكنين 😀 بس ممكن تضعف الذاكرة قصيرة الأمد، و هي مش بتضعف بدافع السن، لكن بتضعف عشان العوامل اللي اتعرض ليها لحد السن ده، زي مثلا الضغط العصبي و التوتر، او قلة النوم او عادات كتيرة مش صحية بتخلى المخ مش في ابهى حالاته.

أمال الزهايمر ده ايه ؟

مرض مش سهل.. ممكن يكون العرض الأساسي اللي بيبقى واضح فيه موضوع فقدان الذاكرة، بس ده مش العرض الوحيد، فقدان الذاكرة بيبدأ بانه بينسى مواعيد و الحاجات البسيطة دي، و بعد شوية بينسى كلمات ! يعني بينسى الحاجات العادية اللي محفورة في دماغه و بينسى حتى الحاجات البسيطة اللي قعد سنين من عمره يعملها زي قفل الزراير بينسى هي بتتعمل ازاى، لحد المرحلة المتأخرة منه انه بينسى الحاجات الفيسيولوجية زي دخول الحمام مثلا، و مبيعرفش يعيش لوحده نهائي.

مش هندخل في تفاصيل المرض ده و نرجع للتاني لفقدان الذاكرة الطبيعي و النسيان.

امال الناس الشباب اللي ذاكرتهم بتضعف فعلا – مشكلتهم ايه ؟

مشكلة الشباب اللي بينسو الحاجات الصغيرة زي مواعيد او حطه القلم فين و الحاجات البسيطة دي، و بيكونو ناسيين فعلا كأنها انمحت من ذاكرتهم، هي نفس مشكلة الشخص اللي كبر في السن و بدأ ينسى، عوامل حياتية غير صحية بتخلى الذاكرة تضعف، و بما انها حياتيه يبقى قابلة للتغيير

ازاي بقي اقوى ذاكرتى  ؟

اولا: المخ ده عضلة، طول ما انت بتنميها طول ما هي بتنمو معاك 😉 و تنمية المخ بالتفكير والقراءة، عشان كده الناس الكبار لما يبدأو يريّحو بقى دول ذاكرتهم بتضعف شوية لانهم مش بيحاولو يستخدموها

ثانيا: العوامل اللي بتاثر على ضعف الذاكرة:

  • النوم القليل، النوم من الحاجات اللي بتساعد على التذكر، بترتب افكار المخ و بتخزن كل حاجة دخلت له في الذاكرة
  • التوتر و العصبية و الضغط النفسي، الحاجات دي بتخلى الذاكرة متبقاش في ابهى صورها

ثالثا: فى اكلات بتساعد على انها تكون قوية، عن طريق انها بتحسن الجهاز العصبي او بتحسن حركة الدم عند المخ فبتخلى المخ كعضلة مستريحة و فيها الغذاء الكافي.

من اهم الأكلات دى الاكلات اللي بتحتوى على فيتامين B12 (زي الخميرة و البيض و الفراخ ) و زيوت السمك (اكيد طبعا موجودة في انواع السمك المختلفة 😀 )

 

و تفتكر ايه العوامل اللى بتخلى ذاكرتك انت تضعف ؟

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك