[ الاكل المفيد للحامل 2017 ] تفتكري النونو يحب ياكل ايه؟ - شفاخانة

أول ما بتعرفي انك حامل في حاجات كتير و افكار كتير بتيجي في دماغك .. تبدأ من الفرحة و المفاجأة الحلوة، شوية و تفكري في المسئولية اللي هتشيليها من بعد ما تولدى ، و فجأة تكتشفى أن المسئولية دى بتبدأ اصلاً من و انتي حامل، زى مثلا انك تاخدي بالك من نفسك، وانك تعرفي الاكل المفيد للحامل

عشان سلامة البيبي من سلامتك الأول 😉

وعشان تاخدي بالك من نفسك لازم تركزي في حاجات كتيرة، بس أهمهم اللي الناس كلها بتهتم بيه هو غذاء الحامل ، لأنك بتغذي بيبي لسه بيتكوّن ، و عشان هو لسه بيتكون فناس كتير ترجمت ده ان معناه انها تاكل كتير جدا 😀

تعالى نتكلم عن يعني ايه كلمة “كُلَّى كويس”، يعني تاكلي ايه امتي عشان تبقى اخدتى أكبر فايدة ممكن و انتي حامل و تفيدتي الصغنن اللي في بطنك الفايدة الصح 😉

أول سؤال بيجي على بالك اكل اد ايه ؟ هو الحامل فعلا بتاكل لاتنين؟

انتي مبتكليش زيادة غير حاجات بسيطة زي اللي متبينة في الصورة، في الطبيعي الجسم بيحتاج 1500 كالوري في اليوم،  لما تزودي عليهم هتلاقي انك محتاجة تزودي نسبة بسيطة جدا يعني انتي مش بتاكلي لاتنين ولا حاجة 😀

يعني كده المفروض تاكلى كام وجبة في اليوم ؟

مفيش حاجة مفروضة بأعداد، بس يُفضل عشان معدتك كل شوية بتقلب و بتحسى انك عايزة ترجعي في اوقات كتير  و كده، انك تاكلي وجبات كتيرة صغيرة، يعني ممكن تاكلي من 5 لـ7 وجبات في اليوم عادي .. مش هتتخني متقلقيش 😀

بس متاخديش نص المعلومة و تسيبي نصها .. وجبات كتيرة “صغيرة”

 هي صغيرة عشان متتعبش معدتك، بس كتيرة عشان تغذيكي كويس 😉

طب لو اصلا تخينة و كنتي ماشية على دايت و بعدين حملتي، هتفضلي ماشية عالدايت ده ازاى ؟

الدايت يعني نظام غذائي و نظام غذائي يعنى أكل صحي، و اصلا و انتي حامل لازم تكوني بتاكلي الاكل المفيد للحامل و الصحي عشان البيبي ، فمتتعبيش نفسك انك تعملي دايت و انتي حامل لو بتتغذى تغذية صح،

يعني تاكلي الاكل المفيد للحامل و بتبعدي عن الأكل المضر للحامل ، لان معظم الاكل اللي ملوش فوايد هو الاكل اللي بيتخن

 يعني ساعتها المفروض تبعدي عن الاكل المضر للحامل  :

1- المقليات و كل الحاجات اللي بتتحمر .. عشان الزيت ملوش فايدة صحية مجرد سعرات عالية، التحمير الصحي اللي بالزبدة و ده ليه فوايد بس سعرات عالية برده

2- السكريات بزيادة، السكريات مش ضارة نهائي، بتدي طاقة و مفيدة صحيا بس لها كمية محددة حسب المجهود المبذول، اكتر من كده مش هتفيدك في حاجة.

3- الأكل من بره ، الفاست فوود و كده 😀 لانه مش بس متحمر ده كمان مش مضمون اصلا 😀

بس كده ! ده كل الأكل اللى ممكن يسببلك تخن و ملوش فايدة صحية فمتكليهوش و انتي حامل

وده بقي الاكل المفيد للحامل :  

ولازم تزودي اكلات معينة عشان الفوائد اللي فيها اللي بيحتاهجا الجنين .. زي مثلا ..

1- الخضار و الفاكهة فى العموم و الحاجات اللي فيها ألياف، عشان الهضم يبقى كويس و متديش لجسمك فرصة يجيله امساك لأن علاجه و انتي حامل صعب، كل ما تزودى من الخضار و الفاكهة كل ما كان افيد ليكي 😉

2- السبانخ و البتنجان .. كترى منهم، عشان الحديد اللي فيهم، و ميجيلكيش انيميا ، بتحتاجي ضعف الكمية من الحديد اللي كنتي بتاخديها و انتي مش حامل،

و ده بيمتص أحسن لو معاه فيتامين سي، يعني تعصري عليه ليمونة او تاخدي معاه عصير برتقان فريش 😀

بتحتاجي و انتي حامل 27 ميللي جرام حديد يوميا، سهلين مش صعبين 😀

  • كوباية فول فيها 5.2 مجم حديد
  • 85 جم فراخ فيها 1.3 مجم حديد “متسألنيش تتحسب ازاى دي” 😀
  • مقدار كوباية سبانخ فيها 2 مجم حديد

لو مقدرتيش تاكلي كل ده لحد ما توصلي لـ 27 ميللي جرام، متقلقيش الدكتورة هتكتبلك على اقراص حديد، بس الأكل طول عمره افيد من الدوا و اريح ^_^

3- كالسيوم، لانه مصدر الكالسيوم للبيبي اللي في بطنك جاى منك، فلو معندكيش كفاية هو كده كده هياخد اللي يكفيه، لكن  انتي هيجيلك هشاشة عظام بعد كده، فمن الاول تاخدي كالسيوم كفاية .. عشان كده كوباية اللبن بتاعت كل اليوم اللي الدكتورة قالت لك عليها 😉

انتي بتحتاجي 1000 ميللي جرام في اليوم، هتلاقي في:

  • 250 جم من الزبادي = 415 مجم كالسيوم
  • 250 جم لبن = 300 مجم كالسيوم
  • كوباية عصير برتقان = 250 مجم كالسيوم

يعني محتاجة تشربي لبن الصبح و عصير برتقان مع الغدا و علبة زبادي بالليل 😀

4- بتحتاجي كمية كبيرة من حمض الفوليك اللي موجود في العيش البلدي و الورقيات الخضرا زي الجرجير و الفجل و الخس و السبانخ،

يس  مهما اكلتي مش هيبقى الكمية الكافية و الدكتورة هتلاقيها قايلالك على اقراص فوليك تاخديها كل يوم، و عشان تبقى عارفة بتاخديها ليه فدي بتحمي اعصاب الطفل و بتاساعدها تتطور في النمو بتاعها

انتي بتحتاجي يوميا 600 مايكروجرام من حمض الفوليك، هتلاقيهم فين:

  • البرتقانة الصغيرة 30 مكجم
  • مقدار كوب من البروكلي 90 مكجم
  • كوب من السبانخ 200 مكجم
  • كوب من الكورن الفليكس او الحبوب عموما 400 مكجم

شوفي هتظبطيها ازاي بقي 😀

5- البروتينات، طبعا ده طفل بيتكون فاكيد البروتينات م الحاجات الاساسية جدا، زي اللحوم و الفراخ و السمك و البيض و الفول،

كل ده حلو ومن الاكل المفيد للحامل جداً ، بس اللحوم و السمك و الفراخ لازم تكون مطبوخة كويس 😉 و مستوية عالاخر من باب الاحتياط عشان الحاجات النص سوا ممكن يكون فيها باكتيريا و الحامل مش حمل عيا، عشان كده تبعدي عن التونة، و المعلبات اللي مش مضمونة كلها

حاولى تظبطي امورك تاكلي 70 جم بروتين يوميا، برده هتلاقيهم بسهولة ..

  • 85  جم فراخ = 27 جم بروتين
  • بيضة واحدة = 6  جم بروتين
  • كوباية لبن = 8 جم بروتين
  • معلقتين زبدة فستق peanut butter = 8 جم بروتين

 كده عرفتي الاكل المفيد للحامل  بكميته و الغذاء الصحي للحامل موجود فين  ..  بس في كذا حاجة كده هتيجي في دماغك احنا بنتكلم عن الاكل  .. زي مثلا ..

  • ازمة احساس انك عايزة ترجعي، دي بتحصل لكل الحوامل، اوعي يجي في بالك انك متاكليش عشان مترجعيش، الفكرة دي غلط تماما، قلنالك تاكلي وجبات صغيرة هتريّح الموضوع ده ، و كمان لو اكلتى بقسماط على الصبح هتبقى مستريحة جدا و هيقلل الترجيع
  • الحموضة 🙁 اللبن بيحل كل المشاكل 😀 يعني في كالسيوم و فيه بروتين و في فوايد كتير و زيادة عليهم ان كوباية لبن بارد بتريّح المعدة جدا و بتخليكي تحسي براحة و انتي بتاكلي
  • تاني ..  نعيدها تاني 😀 انتي مش بتاكلي لاتنين ! اي والله 😀
  •  حاجة مهمة جدا متكلمناش عنها و مينفعش تعدى واحنا بنتكلم عن اكل الحامل .. بس سبق و اتكلمنا عنها فى بوست قبل كده الوحم 😀 .. اتكلمنا عنه قبل كده اقرأيه  من هنا  الوحم وسنينه

  ، دلوقتي اقدر اقولك “كلي كويس انتي حامل” لانك بقيتي عارفة تاكلي كويس ازاي 😉  ، وممكن تدخلي هنا  لو عايزة تعرفي ازاي جمالك ميضعش وانتي حامل

يا ترا فاضلك كام شهر على تلك اللحظة اللي هتشوفي فيها النونو اللي معذبك من و هو جوه 😀 ^_^ ؟؟

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك