الايدز مش قلة ادب - شِفاخانة

بس للاسف في مصر شايفينه قلة ادب ،الكلام عن الايدز كتير ، لكن مش كل الناس عارفة يعنى ايه مرض الايدز, فالاول خلينا نعرف ايه هو مرض الايدز بالظبط , هو نقص مناعه الشخص المصاب بيها لدرجة انه مش هيقدر يقاوم اي مرض تاني , فبتيجي خطورته من هنا ان اي دور برد ممكن يموته , خلينا قبل ما نكمل كلامنا نحط ادينا علي شوية ارقام, حوالي 5000 حالة اتصابوا بالايدز في مصر، توفى منهم 1358 حالة يعني في 3642 مريض عايشين معانا دلوقتي

طيب احنا بقي بنتعامل ازاي مع الـ 4000 حاله اللي لسه عايشة !!

احنا شايفينهم انهم شوية ناس مش متربيين واخلاقهم فاسدة ويستاهلوا اللي حصلهم ومش شايفين انهم مرضي وايه هو طبيعه مرضهم وحقهم في العلاج المادي والنفسي .

 ولو مخدناش بالنا من اللي بيحصل ليهم هنحولهم لمرضي نفسين  .

الايدز مش شمال ::

مبدايا احنا مش حاطين في دماغنا ان المرض بينتقل لاكتر من سبب فاحنا سِبنا انه ممكن بينتقل بالدم الملوث بالحقن او غيره ,  و ان ممكن طفل يتولد بيه لو امه حامله للمرض , وممكن ينتقل للزوج او الزوجه من بعض بدون علم الطرف التاني , ومسكنا في ان دا مرض اللي مش محترمين ودا تخليص حق ربنا منهم !!

طيب انت عارف احنا وصلنا لغاية فين فالموضوع دا؟ وصلنا لإن اللي عندوا المرض مكسوف انه يتكلم عنه, مكسوف انه يصرح بده ،، خليناه مكسوف انه مريض !! بقينا كلنا قضاه بنحاسب مرضي الايدز علي مرضهم .

      بالعكس مريض الايدز بطل

فكر معايا كده في اللي هقوله , في شخص دلوقتي بيحب الخير قرر انه يروح  مستشفي يتبرع بالدم و للاسف مخدش باله من نظافة المستشفي و كانت متفهمش حاجه عن التعقيم واتبرع، وبعدين اكتشف ان الفيرس جاله , طبعا لو قال لحد ان عنده الايدز فالكل هيشك فيه وهيلبسوا عباءة القضاه ويحكموا عليه فهيقرر انه مش هيصارح حد بمرضه ودي كانت نصيحة من صاحب جدع قالهاله عشان ميخسرش عيلته وصحابه لما يعرفوا انه مريض بالايدز ! متقلقش حل موضوع التبرع سهل اووي اتاكد من الحقنة وكيس الدم انهم لسه مفتوحين قدامك ومتعقمين .

دا مريض زيه زيك ::

ايوة هو مريض زيه زي اي مريض سرطان او سكر او ضغط وحقه في العلاج المفروض نوفرهوله , بالعكس دا احنا المفروض نهتم اكتر بيهم عشان المرض دا اخره موت يعني نهاية حياه بني ادم .

طيب هو ايه العلاج اللي المفروض ياخدهُ 

مرض الايدز هو نقص مناعه الشخص المصاب بيه لدرجة انه مش هيقدر يقاوم اي مرض تاني , فبتيجي خطورته من هنا ان اي دور برد ممكن يموته , كل ادوية الايدز الموجوده هي بتحاول تحافظ علي انه ميخدش مرض تاني فبتبقي وقايه اكتر من علاج و يقلل من فرص ان شخص تاني يتعدي منه  .

طيب ايه اللي مفروض تتابعه مع مريض الايدز لو انت موجود معاه ::

  • لازم يمشي بنظام اكل صحي  معين
  •  check up بشكل مستمر
  • المفروض ينام كويس
  • المشروبات الكحولية ممنوعه تمام .
  • لازم يعمل تمارين بشكل يومي

كل الحاجات دي المفروض ان الناس عموما تمشي عليها , بس مريض الايدز مجبر انه يمشي عليها اكتر لان مناعتهُ اقل بكتير .

هندفنه بالحيا ::

معظم الناس اول لما يعرفوا ان في حد يعرفوه اتصاب بالايدز بيفكروا علي طول جاله منين , ودي اول خطوة في بداية المرض النفسي للمصاب , طيب فكرت فيها مره من ناحيه تانيه , واللي هي هو حاسس بأيه دلوقتي  ؟!

مريض الايدز اول لما بيعرف انه مريض بيبقي معرض لكوكتيل من الامراض النفسية مع المرض العضوي , وممكن هو دا اللي يبقي سبب في موته اكتر من الايدز , فخلينا نعرف هو بيفكر في ايه وممكن توصله لحد فين

امراض نفسية كتير ممكن تجيله زي

الناس هتاخد مني جنب (العزلة الاجتماعية ) :ــ

ودا بيجي من حاجتين اساسين : الشك والتكيّف :الصحاب والاهل اللي حواليه بيخافوا من التعامل الطبيعي معاه لانهم بيبقوا شايفين انهم ممكن يتعدوا ودا طبعا مش صح (التعامل الظاهري مع مريض الايدز مبيجبش اي مرض او عدوي ) , فمش بيقدر يتكيف كمريض مع احساس الشك دا وبيحسسهم بالحسرة على نفسهم .

هصارح الناس بمرضي ولا اكدب احسن؟ :ــ

ودا لانه بيبقي خايف انو يتفضح وهو عارف ان المجتمع رافض للمرض دا فبيحس بالعار فمبيصرحش بمرضه .

القلق بقي اسلوب حياته :ــ

القلق بيبتدي من اول معرفته بالمرض وبيبقي حوالين :: الخوف من المستقبل , الخوف انه يكون نقل العدوي لشخص تاني , الخوف انه يتساب لوحده وهكذا  .

الغضب ممكن يوصله لايه :ـــ

مرحلة الغضب بتوصل لدرجة عن مريض الايدز انه ممكن يرتكب جريمة  زي السرقة أو إدمان المخدرات أو ممكن توصل للقتل عشان ينتقم من المجتمع وضغطه عليه (ودا طبعا مش في كل الحالات ) بس في حالات مع شده التعامل الغلط ورفض المجتمع ليه بيتقلب الموضوع لانتقام  .

انا مش تعبان اصلا : الإنكار:ــ

دي مرحلة صعبة وهي انه ينكر انه مريض اصلا  فبينكر التشخيص بالأيدز

واكيد بينكر العلاج فبيتحول لشخص عدواني وممكن يعمل اي حاجه يثبت بيها انه مش مريض ودا ممكن يقضي عليه .

ممكن نوصله للانتحار ::

دي بتبقي نهايه بعض الحالات لو احنا متفهمناش حالتهم النفسيه دي وازاي نقدر نتعامل معاها , مع التعب الجسدي والضغوط النفسية بيشوف ان هو دا الحل الوحيد للمشكله دي عشان يتخلص من تعبه وينهي وصمه العار اللي جابها لاهله من وجهه نظره .

دا جزء كبير من الامراض اللي ممكن يتعرض ليها مريض الايدز دا لو صرح انه مريض , المطلوب منك بس لو تعرف حد مريض ايدز انك تحط في دماغك انه بيتعرض لكل دا وانك تبتدي تتعامل علي اساس انك توصل معاه انه ميبقاش مريض نفسي .

ولو هنتكلم علي الطريقه  الغير اخلاقيه طيب هو احنا المفروض نسيبه يموت من المرض !!

اللي فيهم غلط ربنا هيحاسبه مش احنا اللي هنحاسبه ونحكم عليه، هو غلط في حق نفسه وعصي ربنا، انت ملكش دعوة بالموضوع دا ومينفعش نتعامل علي انه ميستحقش الحياة , انت ليك دور قبل ما دا يحصل وهي الموعظة والنصيحة بس بعد ارتكابها مش انت اللي المطلوب منك تحكم عليهم او المجتمع ككل يحكم عليهم بالاعدام .

سيدنا  محمد في الغزوات كان بيعالج اسري الكفار , واحنا في مننا اللي قرر انه مش هنعالج اللي ارتكب معصية حتي لو جاله الفيرس بطريقه غير شرعيه 

ياريت منحكمش علي بعض خصوصا في امراضنا , احنا اضعف من كده ولو دي فكرتك برضه عن الموضوع أعلنها ووصل الكلام لاكبر عدد  عشان نقدر نساعده

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك