ـ 11 فكرة غلط عن الشخصية الانطوائية (وطرق التعامل معاها)- شفاخانة

هو مين فينا مكنش معاه في الفصل الواد الإتم اللي مابيكلمش حد! – آسفة طبعاً لو كان ده انت 😀 –
بس بجد ، انت عمرك فكرت ليه بنقول على الواد ده إتِمّ؟
أكيد طبعاً هتقولي ما هو اصله ما بيتكلمش مع حد و بيقعد لوحده ، مع انه بعد فترة بقى ليه اتنين صُحاب بيقعد معاهُم على طول. و كلنا بنقول…. “ما هما عيال إتمة زيه 😀 “

البداية كانت من هنا

بصوا الخناقة اصلاً بدأت من ايام زيوس و ده في الاساطير اليونانية يبقى أبو البشر و الآلهة كلهم.
المهم إن الراجل ده كان عنده عيّلين 😀 ، واحد كان هادئ وعقلانى وبيحب التأمل جداً و ده اسمه أبولو ، اما التانى فكان اسمه ديونيسوس و ده كان معروف انه شقى و بيخرُج كتير و عامل زى فرقع لوز كده و مابيهمدش.

بعدها جيه دكتور نفسي اسمه Carl Jung و ده يبقى اول واحد صنف شخصيات الناس بكلمة “انطوائية” و “اجتماعية” و توصيفه ده كان باعتماده على شخصية أبولو الانطوائية – إله الموسيقى –  ، وشخصية ديونيسوس الاجتماعية – إله الخمر- .

الناس شايفة الشخصية الانطوائية ازاى ؟

الناس كلها فاكرة أن الانطوائي ده واحد بيتكسف او اتقفل عليه جامد و هو صغير فطلع معقد نفسياً و مش بيعرف يتعامل مع الناس. و كل اللي بنشوفُه في الشخص ده انه واحد…

  • مكتئب فلو حبيت تخرُج مثلاً أو حاجة يقفّلها في وشك و مايرضاش يخرج معاك
  • مُعقد لأنه لو قال رأيه في حاجة بيبقى ثابت جداً و صعب قوى رأيه ده يتغير
  • غامض و الكلام بيطلع منه بالعافية
  • مش بيعرف يتكلم فلو اتكلم و قال رأيه في حد بيقول كلام دبش و يا سلام بقى لو أنتِ بنت و حساسة شوية ، خِربِت -_-
  • ماعندوش خبرة في الحياة فلو سألته رأيه عن موقف حصلَك في الشغل مع حد مثلاً ، مايقدرش يفيدك جامد.

من الآخر كُلنا فاكرين ان الانطوائي ده شخصية صعبة و مش أى حد يطيق العيشة و التعامل معاه. و الغريبة أن كُلنا شايفين الاجتماعية دى ميزة و الإنطوائية عيب و آرائنا غلط فى الموضوع ده.
و ده تقريباً علشان……

  • الانطوائي لو كلمته ممكن مايردش عليك او يختصر في الكلام و طبعاً دى منتهى قلة الذوق إنما الاجتماعي لو كلمتُه في اى بتنجان هيرد عليك =D
  • الإجتماعي من كتر ما بيتكلم مع أى حد لو قال فكرة مجنونة أو غريبة هيأثر في الناس بسرعة ، إنما الانطوائي لو قال فكرة جامدة مش كتير هيهتموا.

لو خدت بالك هتلاقيها حصلت معاك مرة عالاقل و شوفت واحد انطوائي قال رأي حلو او كلمة صح فى لَمّة و ماحدش خد باله منها ، انما في نفس القاعدة لو الاجتماعي لقط الفكرة و قالها تاني الناس كلها هتتحمس لها جداً .. الشخص الإجتماعي بيبقى مؤثر أوي في الناس اللي حواليه.

  • لو متدايق جداً و عايز تاخد رأى حد مش هتروح تكلم الانطوائي ، غالباً هتكلم الإجتماعى لأن هو اللي هياخد باله منك و هيحسسك باهتمام ، انما لو فكرت تروح لحد انطوائي هيفكر في المشكلة و ازاي يحلهالك مش هيهتم قوي باحساسك زى ما هيهتم انكوا تحلوا المشكلة نفسها.
  • لو عايز تخرج و تنبسط مش هتكلم الانطوائي ، ده راجل ملوش في الهلس ، بس الاجتماعي ليه 😉

الكلام ده بيلمس ناس كتير و شايفين انه بيحصل ده لو ماعشوهوش فعلاً بس ماحدش يعرف ان ¾ معتقدتنا دي غلط.

الشخصية الانطوائية مش معقدة و فاشلة  

اللى فهمناه ان الانطوائية مش عيب ، ده مجرد نوع شخصية بتستمد طاقتها من التأمُل ، ده غير انها بتكتسب المعرفة بمراقبتها للى حواليها و ملاحظتها للنتايج. على عكس الشخص الاجتماعى اللى بيستمد طاقته من لمة الناس حواليه و بيكتسب المعرفة بالخبرة اللى بياخدها من دخوله فى تجارب كتير.

يعني لو بصينا على الانطوائي من المنظور الجديد ده هنشوف ان:-

 1)معظم المبدعين إنطوائيين لأن اصلاً طاقتهم “بتكون” فى التفكير و التأمل على عكس الاجتماعي اللى تفوّقه بيبان فى التنفيذ

2)الإنطوائي مش بيطيق الكلام عالفاضي و على المليان ، اصلاً الكلام بياخد من طاقته فيوم ماهيتكلم هيتكلم في حاجة تستاهل طاقته دي 😉

لو فتحت معاه “اي كلام” فعلاً مش هيرد عليك و هيقفلك بس دى مش قلة ذوق ده بس علشان أنت بتفتح “أى كلام” فعلاً ، بس لو كلمته في موضوع حيوى و مهم و من اهتماماته هيتكلم عادى و مش هيقفلك ولا حاجة

3)بيتفصل جداً لما حد يقاطعه فى الكلام ، اصل إعقلها الكلام بياخد من طاقته فلما حضرتك تشد الفيشة هيتفصل فصلان السنين.

4) الانطوائي شخصية دوغرى قوى و مالوش في تذويق الكلام والحبشتكنات دى مش علشان هو مابيتكلمش كتير قد ماهو علشان ملوش في الهرى و المجاملات اللى ملهاش معنى.

5)رأيه قبل ما بيقولوا بيفكر فيه كويس قوى علشان كده صعب جداً يغيره و بيبقى ثابت جداً عليه.

6)الإنطوائي بيتعرف على الناس ببطء لأن ده بياخد من طاقته بس لما بيختار أصحابه بيختارهم كويس جداً ، بمعنى انه ماعندوش صحاب نص نص ، صحابه واحد او اتنين آه بس صحابه قوي.

7)صعب جداً تسمع الإنطوائي بيقول “مش عارف أنا فيا ايه” لأن الانطوائيين بيركزوا قوي مع نفسهم و تصرفتهم فبيكتشفوا نفسهم و شخصيتهم أسرع بكتير من الشخص الاجتماعي ، لأنه فى أغلب الأوقات بينتظر الناس هى اللي تعرفه قبل ما هو يعرف نفسه.

8)الإنطوائي مش بيعرف يتكلم زى ما بيعرف يفكر فلما بيتكلم بيقول أقل بكتير قوى من اللي هو عارفه فعلاً.

9)الانطوائي بطبعه بيركز في تفاصيل التفاصيل – تأمُل بقى 🙂 – فلو اتكلمت معاه هيبقى منتبه ليك جداً و بيبص في عنيك و ده لانه بيسمع أحسن ما بيتكلم بمراحل.

10)الإنطوائي بيعشق احترام خصوصيته و أن حد يشاركه بمساحة قريبة لفترة طويلة ده بيرهقه جداً ، علشان كده الضيوف في مرحلة مُعينة بيبقوا مُتطفلين في نظره.

11)مش بيظهر مشاعره و مش بيعرف يحدد اللى جواه للناس اللى بيتعامل معاهم.

كيفية التعامل مع الشخصية الانطوائية : 

في دكتورة بقى اسمها Carmella قالت أن التعامل مع الانطوائيين سهل جداً.
عارف كورة الهامستر؟! عايزاك بقى تعتبر ان الانسان الانطوائى قاعد فى واحدة منهم بس على مقاس بنى آدم =D
مابتريقش والله بس دى اسهل طريقة ممكن تفهم بيها اهمية المساحة الشخصية بالنسبة للشخص الانطوائى.

اولاً:- الانطوائي زيه زى اى حد ، بيطير من الفرحة لما بيلاقي اهتمام فلو عايز تتعامل معاه ابدأ بسلام عليكم ، صدقني دي كفاية قوى في البداية كمان علشان تبيّن له انك بتحترم مساحته دى.

 ثانياً:- حاول تستشعر الموضوع اللي ممكن يهمه و اتكلم معاه فيه و لو مفيش حاول تاخد رأيه فى حاجة حيوية و حقيقية و كده هتبقى بتديله فرصة انه يفكر و يرد عليك.

 ثالثاً:- افضل محافظ على مساحته دى حتى لو بقيتوا قريبين جداً من بعض و ماتخليش علاقتكم تفرض عليه انه يتنازل عن مساحته دي.

الخلاصة

الفكرة كُلها في إن الانطوائية و الاجتماعية دول نقطتين على سطرعلاقتاك باللي حواليك و اللي موجود في حياة كل واحد فينا.

هقولك ازاي….

السطر ده هو علاقاتك بالناس اللي حواليك كلهم من اول اهلك في البيت لغاية بواب العمارة و تعاملك مع كل واحد فيهم هو مكانك على السطر ده .  و ده تفسير أن كتير مننا بيتقال عليه رغاى و شقى قوى جوا البيت و هادي برا _و انا أولكُم ^_^ .

يعني الانطوائية مش عيب علشان كل ما تشوف حد كده تحاول تغيره ، ولا هي توتر و خجل من الناس … الانطوائية نوع شخصية و طريقة تعامل يا هتقدر تتقبلها و تتعامل معاها يا مش هتقدر.

 ايه اول موقف حصل ببينك و بين صاحبك الانطوائي؟

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك