الدايت "مش" عشان تخس - شِفاخانة

من الحاجات الكتير اللي بتضايق البنات – و الولاد ساعات برده – فكرة الدايت ! الدايت من اسخف الحاجات اللي في الوجود سواء عشان تخس او عشان تفضل على وزنك :/

بس للامانة هي الازمة مش في الوزن او في ان الواحد يخس على ما الازمة انه اسمه دايت ! اه والله 😀 الواحد ممكن يقعد يومين مياكلش ميضايقش لكن لو مبياكلش عشان عامل دايت بتبقى حالته النفسية رخمة جدا 🙁

طب على فكرة دايت اصلا اللي هي diet  يعني نظام غذائي و دي حاجة كلنا عارفينها بس مش بنقنع عقلنا الباطن ان سواء بتخس او بتخن .. طول ما انت بتاكل يبقى اننت on a diet  بنظام معين 😀

ايه اللي رسخ في دماغنا فكرة ان الدايت وحش و متعب و بيجيب نفسيا متضايق ؟

  • بتكون مستعجل و عايز تخس و بتعمل دايت بس مش بيجيب نتيجة سريعة -و ده طبيعي – فتقوم تضايق من الدايت رغم انه ملوش ذنب والله 😀
  • ان في دكاترة كتير بتدي دايت ليك تعمله و مش عاملة حسابه على مكونات معينة في الاكل لو موجودة بتدي احساس بالسعادة، بهدف انها يا سعراتها عالية او انها بتفتح النفس للاكل، مبيشيلوها من الدايت خالص، و ده اللي بيخلى اللي بيعمل دايت ممكن يدخل في اكتئاب :/
  • احساس انك محروم من حاجة بتحبها 🙁 الاكل ذو الطعم الذيذ 😀

التلات اسباب اللي فاتو دول هما المفاهيم الغلط عن الدايت .. اللي الناس كلها شايفاهم مسلمات ..

امال الصح ايه ؟

نمسك كل ازمة من ازمات الدايت و نفر فيها 😉

  • ازمة انك مستعجل و مبتخسش 🙁

الدايت مش العامل الوحيد  و ساعات مش الاساسي في انك تخس اصلا، اه والله ممكن تعمل رياضة من غير دايت تخس و ممكن الدايت لوحده تخس، و ممكن تكون محتاج عوامل كتيرة جدا عشان تخس .. فبالنسبة للاستعجال، فلما تحب تستعجل متظلمش الدايت 😀

لان غالبا انت مش حاطت الحسابات بتاعتك صح ، يعني انت لازم تبقى عارف نسبة خسسانك اد ايه فلما تعمل دايت تبقى حاطت نسب مظبوطة عاوز توصلها لكن جو 10 كيلو في الاسبوع و ترجع تحبط يبقى العيب اكيد مش عالدايت 😛

غير اصلا انك غالبا برده مش ملتزم بالدايت لكن متكدر بس 😛 من المبدأ ان الدايت هو انك تاكل براحتك و تحس بتأنيب الضمير 😀

نخرج بره الدايت بقي خلاص و نرجع للاصل .. انت اصلا تخين ليه ؟ الجسم الطبيعي بيحتاج اكل من  1000 لـ 1500 كالوري في اليوم، و الحركة الطبيعية بتحرق الـ 1500 دول ، يبقى انت بتتخن امتي، لو الجسم بيدخله سعرات اعلى او بيحرق سعرات اقل

بيدخله سعرات اعلى ازاى ؟

  • اكل كتير
  • اكل نوعه سعراته عاليه
  • اكل بيفتح النفس يخليك تاكل تاني و تالت و رابع 😀

بيحرق اقل ازاى ؟

  • بيتحركش خالص من البيت او يكون عمله مكتبي
  • طبيعة جسم
  • ياكل و ينام

يبقى متبدأش دايت غير لو انت عارف ايه المشكلة عشان تحل المشكلة نفسها، يعني لو المشكلة في طبيعة الجسم في الحرق قليلة لو عملت دايت مهما عملت انت محتاج حركة كتير اوي و ساعات بتحتاج ادوية تساعد عالحرق، لان اصلا مشكلتك مش في اللي داخل لكن في الحرق

كمثل تاني يمكن تكون مش محتاج تاكل كل اكلك بنظام بس محتاج تبطل تاكل و تنام 😉

الموضوع لازم يكون ماشي باسباب و تتحل لان الدايت مش الحل الوحيد .. فلو عايز توصل لنتيجة دور عالمشكلة الاول 😉

  • الازمة الاكبر و الاهم انك تعمل دايت يكن ممنوع عنك حاجات كتير و يجيلك اكتئاب الدايت:

من مسسبات السعادة اللي في الاكل زي الحاجات اللي فيها سيرتونين زي الموز و الشيكولاتة لان السيريتونين مش بس بيساعد على افراز هرمونات تخلي مودك حلو بس كمان بيفتح الشهية :O و دي اخر حاجة يعوزها الشخص اللي عامل دايت 😀  

فدي تعوضها بانك تاخدها من السمك 😉 و ساعتها لما تفتح الشهية هتاكل سمك برده 😀 و دي حاجة متتعرضش مع الدايت 😉 غير بقى اني عايزة اوضح ان الشيكولاتة انواع .. و في حاجة اسمها الشيكولاتة الغامقة، دي السعرات بتاعتها قليلة متتعارضش مع الدايت 😉 اكيد مش هتاكل منها بوكس كامل و تقول مبتعملش حاجة -_- انا بقول سعرتها قليلة ممكن تاكل منها و انت عامل دايت 😀

طيب يبقى كده معناها ان في حاجات معينة في الاكل لازم تكون موجودة في الدايت بتاعك عشان تبعد عن الاكتئاب:

  • لازم يكون في نسبة كربوهايدرات في الاكل (وهي فيها سيريتونين عشان ميقلش من جسمك تماما)
  • خد بالك من فيتامين ب 6 و ب 12 و د
  • الماجنيسيوم .. هو عامل اساسي في انه يعمل توازن للمشاعر، فركز انه ميكونش ناقص في اكلك
  • متفوتش وجبات عشان ده بيقلل السكر في الدم و بيغير في الحالة النفسية
  • السكر الزيادة و الملح الزيادة .. ابعد عنهم لانهم بيأثرو على الموود برده
  • الأزمة الاخيرة و اهمهم عالاطلاق ! هنبطل ناكل الاكل اللذيذ 🙁 😀

هو الحقيقي ان الاكل الذيذ نوعين:

اكل الفاست فوود:

ده من النوع السئ على الاطلاق لان نسبة الدهون فيه عالية فسعراته عالية دي نقطة والنقطة التانية ان الدهون اللي فيه من الاكلات اللي بتسبب الاكتئاب :/ كتر الدهون المشبعة بتأثر عالحالة النفسية، فحتى لو بتدي عرض انك مبسوط في ساعتها و مستمتع بالاكل .. فعلى المدى الطويل بيجيب اكتئاب 😉

و ده مش معناها اننا منكلوش .. لكن اكله يكون بـمعدل قليل جدا جدا .. او يتعمل في البيت على نضيف مع استخدام كل ما يمكن عشان تقلل سعراته، زي انك بدل ما تحمر تشوي .. بدل ما تستخدم العيش العادي استخدم العيش الغامق (البني) .. و هكذا 😉

أكل البيت زي الرز و المكرونة و البشاميل 😀 :

الاكل ده مش ممنوع، بس ليه كميات معينة، ممكن تزود الكميات طبعا عشان هو طعمه لذيذ ^_^ و قصاده لازم تزود الحركة وتعمل رياضة تحرق الزيادة الي كلتها دي 😀 شفت الموضوع بسيط ازاى 😀 مفيش حاجة من غير مقابل 😉

و اخيرا ..

فهمنا عن الدايت هيتغير اول ما نقتنع بان اكبر مفهوم خاطئ حوالين الدايت  “اليوم الفري” -_- .. انا معرفش مين اللي اخترع اليوم ده، اكيد كان عنده وجهة نظر انا معرفهاش 😀 .. اللي هو يوم فري بتاكل كل الاكل من اللي ممنوع اثناء الدايت .. بس مهم تسأل نفسك، هو ممنوع عشان سعراته عالية و على عشان مش صحي، لان الهدف من الدايت مش بس عشان تخس لكن عشان  تبقى صحي، يبقى تعمل الدايت اللي يخليك تبقى صحي 😉 و تبدأ تؤمن بفكرة ان بتستفيد من الاكل مش مجرد بتاكل عشان تاكل 😉 اول ما يبدا عندك مبادئ حوالين الدايت ساعتها هتلاقيك ملتزم بالمفاهيم الصح بتاعته، و بتنفذ على اساس مش مجرد طقوس، و ساعتها مش هتحس ان عاملك ازمة و انه اكيد مش بيعض 😀

في ايه تاني بيضايقك في الدايت 😀 ؟

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك