الصلع ليه علاج و لا بيضحكو علينا ؟ - شِفاخانة

فاكر قبل ما تقرع لما كان شعرك حلو و بتسرحه بقى و تطوله و كده 😀 كانت ايام 😀 و كان كل اللي يشوفك يسألك سؤال مميز “هو بابا او حد من عيلة ماما اقرع” ! حقد بعيد عنك -_-

فكرة لو بابا او حد في عيلة ماما اقرع تأثر عليك ازاى ؟

حته معقده سنه فا ركز معايا .. طيب هو عموما بابا واضحة يعني، يعني عندك الجينات اللى تخليك اقرع .. لكن “حد من عيلة ماما” ما هى ماما شعرها كويس خلاص يبقى مفيش مشاكل 😀 ؟؟

بص يا سيدي، الصفات نوعين، و الصفة بيمثلها الجين، والجين متقسم نصين، الصفة السائدة بتبان حتى لو نص الجين بس موجود، و الصفات النادرة لازم يكونو النصين موجودين عشان الصفة بتاعتهم تظهر 😉 الا القرع 😀 صفة نادرة بس لو نصها موجود تبان علطول 😀 هتقرع هتقرع 🙁

نص ده بيجي من عند بابا و نص من عند ماما .. بديهي يعني 😀 بالنسبة للراجل لو عنده نص واحد هيقرع خلاص مفيهاش فصال 😀 بالنسبة للست لازم يكون عندها النصين عشان الصفة نبدأ تظهر و في الاخر مش بتقرع ده شعرها بيبقى خفيف بس ^_^ احقدو عليهم بقي 😀 يعني ماما ممكن يكون عندها الجين و بتورثهولك و هي مش باين عليها .. فعشان كده بندور على حد من عيلة ماما يكون اصلع 😉

ملحوظة: لو حد دارس جينات فده شرح مبسط انا مش قصدي اهين الجينات بالطريقة دي 😀

امتى القرع بيتعالج و امتى متتعبش نفسك معاه ؟

  •  الصلع الوراثى: لو بابا اصلع او حد من عيلة ماما زي جدو او خالو برده حد منهم اصلع، يبقى انت هتصلع لا محالة .. بتبدأ تظهر من اول العشرينات مع الاسف .. متحاولش تعالج شعرك 😀 انت بتتعب نفسك عالفاضي 🙁

امال الحل ايه: متخليش نفسك نص و نص 😀 احلق عالزيرو خالص و اهي موضة و شياكة 😀

  •  كمرضي عضوى “الثعلبة”: بيكون مرض في المناعة بيظهر ان شعر الراس بيقع، في الرجالة او في الستات، و مش بيبان شكله زي الاصلع العادي، لكن بتلاقي جزء “patch” من الشعر مش موجودة .. و ده ممكن يكون نتيجة حالة نفسية

العلاج: في دهانات و علاج ليه، بس بيقعد فترة شهور على ما يروح، و لازم يكون متابعة مع دكتور، عشان اللوشنز اللي هتستخدمها ليها تركيزات، و ليها مواعيد، ومينفعش توقفها مرة واحدة، فالموضوع محتاج علاج طبي و متابعة مع حد متخصص.

  •  الصلع مع العمر: طبيعي لما تكبر في السن كل حاجة في الجسم بتضعف، منها كمان الشعر، فده بيسبب تساقط شعر كتير عند الرجالة و الستات، و ده اللي بيخلى ان الصلع عند الكبار ازيد من الشباب

الحل: دي بقى الحالة اللي لو  حافظت على شعرك و غذيته و اهتميت بيه مش هتحصلك 😀

  •  الصلع نتيجة وجود ندبة: هو مش صلع بالمعنى الصريح، و لكن اختفاء الشعر من المنطقة دي، بس عارف لما تتجرح و ترجع تلئم تاني الحتة دي بتموت فيها بصيلات الشعر و مش بيطلع فيها شعر تاني، ممكن الجرح ده يسببه جرح مكنة الحلاقة او حرق بسيط او كده

الحل: اختار الحلاق اللي بتحلق عنده عشان ميبهدلش دماغك 😀

يبقى النوع اللي يهمنا و محتاجين نتصرف و نلحقه “الصلع مع العمر” تحافظ على شعرك و تغذيه ازاى عشان متصلعش لما تكبر 😀

تغذية الشعر من الحاجات المتعبة حبتين، و مش بيان نتايجها على المدى القصير بتحتاج على الاقل شهر عشان تحس بفرق، بس الموضوع ده مش هيأزمك لو خليته جوا جدولك اليومي العادي، مجرد حاجات روتينية تزودها في يومك هتخليك لما تكبر شعرك ميقعش 😉

زي مثلا الأكل:

في اكلات معينة فيها فيتامينات معينة بتساعد جدا ان الشعر يكون صحي و قوي، و ميتساقطش علطول، اصله زيه زي اي حاجة في الجسم التغذية فيها شئ اساسي و سهلة شوية و و مؤثرة،

افضل الاكلات اللي تفيد شعرك:

السمك: عشان فيه اوميجا 3 و ده بيحسن تغذية الشعر و بيحسن فروة الراس انها متجفش 😀

الفول:  فيه زنك من اهم فيتامينات الشعر

المكسرات: فيها سيلينيوم 😉 و ده مهم جدا للشعر وهو عموما مضاد للاكسدة مفيد لكل خلايا الجسم

البروتينات:  ده في العموم سواء دجاج او فول او بيض او سمك 😉

فيتامينات:

لو صعب عليك تهتم بالتغذية و لونها هتفيدك في حاجات كتير مش شعرك بس 😉 بس ممكن تعوض عنها بفيتامينات، الفيتامينات اللي مهمة للشعر فيتامين A و فيتامين B6  و الزنك، كبسولات فيتامين بتتاخد مرة يوميا و في كبسولات مخصصة فيها كذا فيتامين مع بعض مخصص للشعر بس 😉

بس من عيوب الكبسولات دي انها بتزود الشعر في الجسم كله مع الوقت .. معتقدش دي حاجة بتضايق الرجالة 😀

تحسين دورة دموية:

تحسين الدورة الدموية اللي رايحة للرأس من العوامل الاساسية جدا، بس ازاي يعني ؟ هتعمل لرأسك رياضة ازاى 😀 ؟ الموضوع بسيط، ألا و هي التدليك لفروة الراس، عارف لما تشتري اي منتج للشعر و يقولك يدلك لمدة 5 دقائق، اهو التدليك ده اصلا ليه هدفين، انه يحسن الدورة الدموية و انه ينشط الغدد الدهنية اللي في بصيلات الشعر فيخلى شعرك احسن 😀 يعني التدليك اهم من المنتج نفسه على فكرة 😀

بس انت سيبك من الكلام ده 😉 ده مفيش احلى من الراجل الاقرع 😀 و اهو بتوفر وقت في تسريح شعر و فلوس حلاق و فيتامينات و زيوت و بلاوى يا راجل 😀 ده كفاية تصحى الصبح تنزل من غير ما تضطر تبص في المراية 😀

قولنا بقى عندك كام صاحب اصلع ؟؟ اعمل mention لاتنين فيهم عشان يعرفوا اصل الموضوع 😀

 

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك