الذين ناموا في المواصلات :D - شِفاخانة

“الأستاذ اللي نايم ورا احنا وصلنا”

“مكنتش عارف اني عايز انام غير لما ركبت الميكروباص .. و مكنتش عارف اني عايز انام اوى كده غير لما صحيت اخر محطة و محطتي فاتتني”

حصل معاك قبل كده الموقف ده 😀

طب حصل معاك ان اخر محطة جت و اللي جمبك لسه نايم  😀

النوم شيء جميل جدا .. انا شخصيا مبحبوش .. بعتبره مضيعة للوقت .. هل فوايد النوم تستحق منك انك تنام 8 ساعات يوميا !! تلت عمرك في النوم ؟؟ ليه ميبقاش النوم مجرد الساعتين تلاتة اللي بتقضيهم في المواصلات يقضو الغرض ؟؟

تعالو نفكر في الفايدة من ورا النوم و نشوف لو هتنطبق على المواصلات ..

اهو يا سيدي نام و استفيد من فوايد النوم 😉

1- النوم فكرته الأساسية انك تفصل خلايا مخك عن التفكير .. لما بتنام في المواصلات بتفصل و لا مبتفصلش ؟؟ بتفصل طبعا .. يبقي مخسرناش

2- النوم بيقوي الذاكرة .. يعني بيرتب المعلومات جوه دماغك و اخر حاجة بتقرأها قبل النوم بتثبت في دماغك .. يعني تخيل كده تخلص محاضرة في الكلية و تركب ميكروباص و تنام .. المحاضرة كده مش محتاجة مذاكرة يا بني .. زي بالظبط لما بتذاكر بالليل و تنام بعدها .. بس هنا انت هتفضل فاكر المحاضرة .. الحاجة اللي عمرك ما كنت هتفتكرها باي طريقة تانية

بس للاسف بيقولو ..

3- ان النوم من 6 – 8 ساعات بيطول العمر .. ما هو حتى لو طوّل العمر هقضي تلته نايم .. على ايه انا أعيش عمر قصير و انام قليل

4- النوم الكويس المريح بيخليك شخص مبدع .. بس اصلا معظمكم مجرب الافكار المبدعة اللي بتطلع في الميكروباص عموما .. يعني الوجود في الميكروباص في حد ذاته بيخليك مبدع .. مش مستاهلة كمان النوم الكويس المريح .. ابداع وا حدكفاية 😀

 

يعني انا مستفيد من نوم الميكروباص و اللي خسرته مستغني عنه 😀

 

طب مش يمكن يكون النوم في المواصلات ده مش نوم حقيقي .. طب هو أصلا النوم عبارة عن ايه ؟؟

النوم بيتكون من مرحلتين ..

1- الـNon REM

2-   الـREM 

دول المراحل اللي بيمر بيها النوم .. ما بتنام بتدخل في الـnon REM stage  .. بتبدأ بانك نص نايم و نص صاحي .. شوية نبضات قلبك تبطئ و درجة حرارتك تنخفض .. و أخيرا  تتعمق في النوم و يحصل الفوايد اللي بستفيدها في النوم من تجديد الخلايا و تقوية المناعة و كل فوايد النوم بتظهر هنا.

تبدأ الـREM stage  ودي تعتبر فترة الاحلام ^_^

المرحلتين تقريبا بيقعدو من 60 دقيقة  لـ  120  دقيقة .. و تتعاد المرحلتين دول مرارا و تكرارا لحد ما تصحى ..

امتى تنام 8 ساعات و تحس انك منمتش و امتي تنام ربع ساعة و تحس بنشاط رهيب ؟؟

الفكرة تعتمد على انت صحيت في انهي مرحلة .. انت لو صحيت و انت في خلال مرحلة منهم هتصحي مأريف جدا .. لكن لما تصحى بعد ما المرحلة كاملة خلصت هتصحي نشيييط جداا و مستمتع بالحياة ^_^

يعني من الاخر انت ممكن تنام في الميكروباص في المسافات الطويلة أو الزحمة لحد ما تحلم .. بعد ما تخلص حلمك اصحي .. معظم الناس بتصحى لا اراديا بعد ما تخلص الحلم 😀 و هتصحى نشيط جدا .. كأنك كنت نايم على كنبة بيتكو بالظبط 😀

بس بلاش تقعد في النص عشان محدش يقطع راحتك 😉

كلامنا ده ميقللش من أهمية النوم في الليل .. في الضلمة .. على مرتبة مريحة 😀 بس الغرض انك تستغل وقت المواصلات في حاجة مفيدة وتنام مستريح .. عشان توصل فايق  ^_^

بس لو اتسرقت و انت نايم مترجعش تشتكلنا 😀 كل واحد مسئول عن نومه 😀

كام مره فاتت عليك المحطه عشان كنت نايم؟

 

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

تعليقان

شارك بتعليقك