انواع و اعراض الاكتئاب

كنت عايزة افهم اكتر عن النكد والاكتئاب وهل دا دلع مننا زي ما اهالينا بيقولوا ولا مرض بجد ، فقررت ابتدي ادور على الموضوع  وشدنى عنوان بيقول العرب أكثر شعوب العالم اكتئاباً ، كنت عايزه اقوله ليه كده يا اخى احنا زى الفل وحتي بيقولوا علينا شعب ابن نكته , فدعبست ورا الموضوع واتصدمت وقررت اصدمكوا معايا عشان نلحق نفسنا او نلحق صحابنا 😀

عارف أنت الصحاب اليومين دول كل واحد طالعلي يقولي أنا عندى اكتئاب انا داخل فى مرحلة اكتئاب ، فانت هتحس انه بيافور ، هو الموضوع بقي لعبة ولا ايه؟ ولا هو اي حد مضايق شويتين يقولي ان عندهُ اكتئاب .. هو الاكتئاب دا مرض اصلا َ!!

طيب بص بقي يا سيدي  الاكتئاب مرض بجد و كمان مش نفسي بس ، دا بيبقي جسدى … باختصار المرض ده بيجي نتيجة ان مفيش توازن في المواد الكيميائية الموجودة فى المخ والجسم ، فلو أنت او حد من صحابك وصلتوا لكده فحط فى دماغك انكوا وصلتوا لمرحلة هتحتاجوا فيها علاج  زى اى مرض تانى .

خد بالك  أن فى حوالى 300 مليون مكتئب حالياً فى العالم ، ولو اتكلمنا على مصر هنلاقى ان 10% من الولاد عندهم اكتئاب و20% من البنات .

خلينا نتكلم بقى من الناحية العلمية

الاكتئاب عباره عن 3  مراحل

خلينا نربط الـ3 مراحل بشخصيات احنا عارفنها من افلام مشهورة , عشان تفهم ببساطه كل مرحلة

النوع الاول :: كآبة زينة في بنتين من مصر  

دي المرحله الأولي من الاكتئاب وممكن نعتبره كآبه اكتر من الاكتئاب نفسه ودا بتلاقيه فى صاحبك اللى على طول مِسّهِم وملامحه كئيبة على طول (ملحوظة مَتقهلوش افرد وشك 😀 ) و برضو بتلاقيه بيشتكي و بيعيط كتيير …  ودايما لو جربت تنصحهُ هيقولك سمعت من الكلام دا كتيير و هتلاقيه بيتعامل معاك بطريقة من اتنيين ::

يا اما انت هتكون الشخص اللي بيتكلم معاه علي طوول, فانت لو زهقت من كلامهُ وحس انك شايفهُ نكدي مش اكتر، هيوقف الكلام وهتكون سبب في ان الحالة تزيد عندهُ وتوصل لاكتئاب (خليك جدع واستحملهُ صح 🙂 .

او هيقرر انه مش هيحكيلك حاجة ودا متحاولش تتكلم معاه كتير وتضغط عليه عشان يحكليلك ، طيب هو أنت المفروض تعمل معاه ايه ؟! .. اقولك على حاجه حلوة تعملها معاه وتبقي عملت معاه الصح ؟ خدهُ معاك الجيم 🙂 ودا عشان الرياضه هتساعده انه ميدخلش المرحله اللي بعديها .

النوع التاني :: كريم عبدالعزيز في الفيل الازرق 

ودا اكتئاب من نوع الدرجة التانية ودا من أهم اسبابهُ الخسارة يعني الشخص دا فقد أو خسر حاجة مهمة جداً في حياته أو حاسس باحباط شديد ، النوع دا هيبقي فعلاً مريض بالاكتئاب ومش موضوع نفسى بس لأ كمان وصل لمرض عضوى وليه علاج زي اي مرض تاني .

دا بقي اوعي تقوله فى ناس اوحش منك والدنيا كويسة و ايه الكآبه دى كنت بحسبك اقوى من كده ، دا تطلعه معاك day use حلو و يا سلام لو سفرية كام يوم  ( و لو هتطلعه معاك وتقوله الكلام اللى فوق دا ملهاش لازمه السفرية وفروا فلوسكم احسن ) و لو بعد كل ده محصلش تغيير اتشقلب و وديه لدكتور نفسى عشان فى الحالة دي لازم ياخد ادوية معينة .

النوع التالت :: مني ذكي في عن العشق والهوي

ودا بيبقي التطور الطبيعي بعد الاكتئاب وهو أنه وصل للتفكير فى الإنتحار ودا لأنه فقد ثقته فى  قدرته على حل مشكلته بأى شكل فقرر ان الموت هو الحل الوحيد ، فأنت هنا خلي بالك من اللى مكتئب بقالهُ فتره وبيتكلم عن الموت دا خاف منه وخد شنطتك وروح اقعد معاه ، بس لمجرد  انك موجود جنبه ، بس  متقلبهاش كلام ومواعظ  عن الرجوع عن فكرة الانتحار والحياه حلوة زياده عن اللزوم   🙂

الخلاصة ::

خلي بالك من صحابك واعرف انك سبب مهم فانك توقفهم عند مرحلة الكآبة قبل ما يدخلوا على الاكتئاب , وتحاول تساعدهم يطلعوا من الكآبة أو على الأقل لو مش فاضي تساعدهم ابعد عنهم كلامك اللى ممكن يجيبهم ورا ، صحابك وعيلتك استحملهم وخليك جدع معاهم .. يا عم مش بيقولوا اللى ملوش خير فى اهله وصحابه ملوش خير فى حد .. ايوه هي  بتتقال كده 😀

تفتكروا ايه اللي منع كريم عبدالعزيز من الانتحار ؟

 

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك