بابا و ماما Take Care ! - شِفاخانة

انتوا عارفين طبعا انكو بعد ما تبقو بابا او ماما في مسئوليات كتير عليكو .. و ان الطفل الصغنن العسول ده ..  انتو مسئولين عنه مسئولية كاملة .. بدايةً من انكو تعرفو امتى جعان و امتي تعبان .. لحد انكو تقدرو تحافظو عليه ضد الامراض اللي ممكن تجيله و هو صغير .. انتو طبيعي هتاخدو بالكو منه لانكم اصلا بتحبوه و مستمتعين بكل لحظة بتقضوها عشانه ..

لكن المسئولية على اد ما هي ممتعة على اد ما هى مش سهلة .. و الأهم من اهتمامك بيه و هو لسه مولود .. اهتمامك بيه قبل ما يتولد .. اللي بيجي من شوية حاجات لازم تعلمها لنفسك و لصحة الطفل و انتي حامل و قبل ما تبقي حامل :))

طب المسئولية في الفترة دى لو استهترنا بيها ممكن تأثر على ايه ؟؟

للأسف الاستهتار في الفترة دي ممكن ميأثرش في ساعتها بس هيأثر على الطفل ادام .. الفترة دي ممكن بيجي فيها بعض الامراض للطفل و هو لسه في بطن مامته .. بتبقي متأثرة بعوامل وراثية ودي مبنقدرش نتحكم فيها اوي .. او بعض التصرفات من الام .. سواء حاجات غلط بتعملها أو حاجات صح مبتعملهاش .. و مش دايما بتبان في ساعتها .. ممكن تبان بعد ما بيتولد و في بعض الامراض بيعيش بيها

من الحاجات الغلط اللي الحامل المفروض متتعملهاش انها:

1- تشرب سجاير، أو تقعد جمب حد بيشرب سجاير

2- تشرب حاجة من الكحوليات

3- تتعرض لأشعة أو كيماويات

4-    تاخد ادوية من غير علم الدكتور .. لان مش كل الادوية بتبقي صح اثناء الحمل

والحاجات الصح اللي المفروض الحامل تعملها:

1- انها تاخد حمض الفوليك  .. ده اول حاجة الدكتور بيقوله للحامل .. بجرعته المظبوطة طول فترة الحمل

2- انها تاخد التطعيمات اللي لازم تاخدها اثناء الحمل و متكسلش

3- تاخد بالها من السكر في الدم عشان ميجيلهاش سكر الحمل .. و ده زي مرض السكر العادي بيجي للست الحامل لو مخادتش بالها من السكر بتاعها .. هو بيرجع يخف تاني بعد الحمل .. لكن بيأثر على الطفل و ممكن يتولد عنده مرض سكر

4-    تاخد بالها من صحتها في انها تغسل ايديها كويس عشان الباكتريا و تاكل اكل صحي عشان متتعرض لاي مرض لان لو جالها امراض هتدخل في مشكلة تاخد ادوية ايه

طب الحاجات دي لو محصلتش ايه الامراض اللي ممكن تيجي للطفل ؟؟

في أمراض الوراثية ملهاش تحكم فيها زي:

1- Heart defects امراض في القلب

2- و في امراض بتيجة نتيجة كروموسومات مش مظبوطة زي down syndrome و ده بيبقي تأخر عقلي أو sickle cell anemia و دي نوع من انيميا بس بيتولد بيها ..

 

و أمراض تانية نتيجة تصرفات الام و هي حامل:

1- Spina bifida  .. و ده مرض بيجي في العمود الفقري مرض عصبي بيسببه انها مبتاخدش حمض الفوليك بجرعته كافية

2- Missing or undetermined limb .. ان يكون احد اطرافه غير مكتملة و دي غالبا بتيجي لو الست الحامل اتعرضت لاشعة ضارة او كيماويات

3- Cleft lip or palate  اللي هي الشفة الارنبية .. وده عبارة عن تشوه في شفة الطفل و علاجه جراحى ..  ده بيكون نتيجة تصرفات خاطئة من الام و في نفس الوقت فيها عامل وراثي ..

4- Clubfoot و ده تشوه بيحصل في القدم مس بيحس بيه الطفل او ما بيتولد بس بيتعبه لما بيجي يمشي .. و برده ده نتيجة تصرفات خاطئة من الام و هي حامل زائد عامل وراثي .. و غالبا بيكون مرتبط بالـSpina Bifida .. لو ظهر عليه اعراض الـclubfoot  لازم يتأكد انه معندوش اي امراض كتعلقة بالاعصاب او العضلات تانية

 

مش التوتر هو الحل .. بس هي حاجات بسيطة اوى تاخدي بالك منها

اولا مطلوب تاخدي بالك من نفسك و تعملي الحاجات اللي المفروض تعمليها و تبعدي عن الحاجات اللي المفروض متعمليهاش و لو شكيتي في حاجة معينة لازم ترجعي للدكتور لان في تحاليل معينة بتعرفك لو في مشاكل في الجنين و انتي لسه حامل .. عن طريق 3 طرق

1- السونار 4D  ده بيعرف التشوهات الخلقية بدري

2- تاريح العائلة لو فيها أي مرض خلقى قبل كده

3-    ساعتها بقى عشان يتأكدو تماما لو في أي شبهة بيعملو تحليل دم للجنين و ياخدو عينة من الamniotic fluid  اللي حوالين الجنين يحللوها

 

كل ما تعرفي بدري كل ما كان الاسهل التغلب على المرض ده .. سواء بحاجة تعمليها و انتي حامل .. او تبقي عارفة خطواتك هتعملي ايه بعد الولادة ..

الموضوع ميخوفش متقلقيش .. لكن بلاش تستهون بالحاجات البسيطة اللي المفروض تعملها في حياتك عشان ابنك في المستقبل يبقي سليم .. محدش بيقدر بيتحكم في المستقبل .. بس انت تقدر تخلى الحاضر صح و مظبوط  و ده اللي هيخلي المستقبل برده مظبوط بإذن الله ..

 

عرفي صاحبتك الحامل عشان تاخد بالها من نفسها و من ابنها في المستقبل 🙂

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك