جمالك اثناء الحمل - شِفاخانة

كل بنت اول ما بتتجوز بيبقى نفسها في البيبي و قاعدة مستنية تحمل و اول ما تحمل من هنا و يبدأ شكلها يتغير ، تقعد تندم انها كان نفسها في بيبي و بيبقى نفسها تولد عشان تخلص من التحول الرهيب اللي حصلها .

اول ما تحملي في حاجات كتير هتتغير في شكلك ، لازم تعرفي ايه هي و تعالجيها ازاي عشان تقدري تتقبلي شكلك و تتبسطي بالحمل و تستني الطفل الجديد و انتي مبسوطة .

1-  تشققات البشرة :

لازم تعرفي ان كل حاجة مرتبطة ببعض، مع زيادة حجم بطنك عشان البيبي بيكبر، و انتي بشرتك جافة (دي مشكلة معظم السيدات)  فالبطن تتمدد عشان تقدر تكبر. فيحصل الشتققات دي.

العلاج : خدي بالك من وزنك كويس جدا احنا كنا قولنا قبل كدة ان انتي محتاجة تاكلي حوالي 400 كالوري زيادة بس عن الطبيعي، و كمان من اول الحمل واظبي على انك تدهني مرطبات فيها فيتامين  “اي” و تاخدي بالك ان اكلك يكون صحي في فترة الحمل و بيحتوى علة فيتامين C, E.

2- الكلف و اصطباغ الجلد:

رقبتك و وشك و خدك عليه بقع غامقة كدة و او لونها فاتح لو انتي بشرتك سمرا و بيكون بسبب زيادة في انتاج الهرمون المسئول عن صبغة الجلد و هو هرمون الميلانين.

العلاج: مفيش علاج للكلف،هي بتروح لوحدها كده كده متقلقيش، بس تاخدي بالك انها بتزيد لو اتعرضت للشمس كتير فأستخدمي صن بلوك يحمي بشرتك شوية و ملهاش طريقة انك تمنعيها تجيلك، بس بعد الحمل هتخف علطول.

3- تساقط الشعر:

في الحمل احسن حاجة بتظبط هو شعرك هبتقل و ينعم و يبقى حلو و التساقط بتاعه هيقف خالص بسبب زيادة هرمون البروجيستيرون عن معدله الطبيعي.، لكن بعد الولادة بقى هتلاقي شعرك بقى بيقع بطريقة كبيرة. بس متخافيش دة شيء عادي جدا و متوقع، برده ده مؤقتا لانها مجرد تغيرات هرمونية.

العلاج: حافظي على شعرك عادي جدا و الطرق الصحية الطبيعية للإهتمام بالشعر، عشان بعد 6 شهور لما يكون بيرجع تاني يرجع صحي

4- لينا نيغرا (الخط الغامق اللي بيظهر عند البطن)

عند سرة البطن هتلاقي ان في خط طويل بطول البطن و عريض لونه بني و ده بيحصل بسبب تمدد عضلات البطن.

العلاج: هتلاقي انها بتروح بعد الولادة تلقائي زي الكلف بالظبط لكن افركيها بأي نوع سكرب عشان الجلد الناشف اللي عليها يروح و تساعديها انها تختفي بسرعة اكتر.

5- البقع و البثور:

بعد ما تتجوزي تلاقي وشك رجع يطلع فيه حبوب زي فترة المراهقة بالظبط، و طبعا دة بيأثر على نفسيتك بطريقة سلبية  اكتر في الحمل و دة بيكون نتيجة الهرمونات المرتفعة، بس خالي بالك على قد ما البثور دي مؤذية لوشك الا انها في نفس الوقت دة معناه ان بشرتك بتفرز دهون كتير و دة هيساعد انه يخلي بشرتك طرية و كدة تشققات البشرة هتقل.

    العلاج: قللي من استخدامك للمكياج، و حافظي على بشرتك نظيفة علطول، و متستخدميش الكريمات العادية للحبوب  من غير استشارة الطبيب وخليكي عارفة ان ده شئ طبيعي جداً بياخد فترة معينة وبعدين بيختفي تماماً .

6- تورم القدميين:

اخر الحمل الطفل بيبدأ ينزل في الحوض و راسه بتضغط على اوردة الرجل  و دة بيخلي الدم يتجمع في الرجل و طبع ده سبب تورهم، بس مش كل الحوامل بيحصلهم التورم ده .

العلاج: متوقفيش لفترات طويلة و اول ما تحسي ان رجلك هتورم البسي رباط ضغط و ريحي على السرير، اخر فترات الحمل يفضل فيها انك تنام على السرير فترت طويلة، ارفعي رجلك على اي كرسي، متحطيش رجل على رجل.

7-  انتفاخ البطن بالغازات:

في الحمل حركة امعاء البطن بتقل و بتكون ضعيفة، عشان كدة لو الحامل اكلك اكل مقلي كتير او بقوليات او انك تبلعي هوا (ده بيحصل مع اكلك العادي و زيادة كمان لو بتاكلي لبان)، فده بيسبب انتفاخ للبطن و انها تصدر اصوات و بتزود الغازات.

العلاج: زودي شرب الاعشاب الطبيعية وي النعناع  الينسون، قللي الاكل الغير صحي و ابعدي عن الاكل المقلي.

8– تضخم الثدي:

مع الحمل الاستروجين و البروستيجون بيزيد افرازهم في الجسم و دة بيخلي غدد افراز الحليب يحصلها تضخم و طبعا دة بيأدي لتضخم في حجم الثدي.

العلاج: بعد الولادة هيحصل التضخم دة هيبدأ يقل شوية شوية و اللي ببيساعد على كدة الرضاعة الطبيعية.

9-  الأظافر:

مع نهاية الحمل هتلاقي ضوافرك بتطول بسرعة، بس بسبب هرمونات الحمل زائد لوعندك انيميا فبتكون الضوافر ضعيفة و بتتكسربرده بسرعة.

العلاج: الاكل الصحي عامة هيساعدك و الموضوع مش محتاج علاج لأن مع الولادة الموضوع هيرجع طبيعي جدا.

الحمل مش بيخوف، كل الحكاية انك لازم تاخدي بالك من صحتك و متقلقيش، و شوية تضحيات عشان خاطر البيبي و هترجع كل حاجة لطبيعتها بعد لما تولدي.

ايه اعراض تانية شوفتيها في الحمل و قلقتي منها ؟

 

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

تعليق واحد

شارك بتعليقك