ظبطي سكرك و انتى حامل - شِفاخانة

الحمل مسئولياته كتير ، و مسئولياته مش بس في انك تاخدى بالك من نفسك، ده انتي بتاخدي بالك من اتنين من نفسك ومن الجنين اللي لا حول له و لا قوه، اللي لسه بيتكون جواكي

و من ضمن الحاجات الكتير اللي لازم تاخدي بالك منها “السكر”.. مش السكر المسكر اللي بيتاكل اللي بيخلى البيبي مهيبر  و بيتحرك  كتير جواكي 😀 لكن السكر التاني مرض السكر :/ او كما نطلق عليه سكر الحمل

ليه اسمه سكر الحمل:

لانه مرض سكر مبيجيش غير و انتي حامل حتى لو انتي اصلا قبل الحمل مش مريضة سكر، لو عرفتي تظبطيه سكرك كويس فترة الحمل يبقى ان شاء الله البيبي مش هيجراله حاجة و يتولد سليم. هو بيدي احتمالية انك تبقى مريضة سكر بعد الولادة بس مش شرط

اسبابه (هي مش اسباب صريحة و لكنها عوامل بتخلى يجيلك سكر الحمل)

1- ان يكون وزنك زايد قبل الحمل

2- ان يكون مرض السكر وراثة في عيلتكم

3- ان يكون سكر بيعلى بالفعل في الطبيعي بس مش لدرجة انك تبقى مريضة سكر

4- يكون سنك عند الحمل فوق الـ35 سنة

طب هو ايه اللي بيحصل اصلا؟

الاكل لما بيتهضم بيتحول لجلوكوز، اللي بيمتصه الجسم و بيتوزع جوا الخلايا عن طريق الانسولين، الانسولين ده بيتحكم فيه هرمونات، و عشان الحامل هرموناتها بتتلخبط فساعات بتأثر على الانسولين .. و ده نقطة الخطر لو انتي عندك اصلا عوامل من اللي فوق اللي تخلى مرض السكر يجيلك بسهولة 🙁

طب ايه المشاكل اللى ممكن يعملها سكر الحمل؟

بالنسبة لطفلك ..

1- لما يكون سكرك عالي الطفل هيوصله سكر عالي و هيبقى وزنه كبير .. ساعتها هتضطري تولدي قيصري لان وزنه ميسمحش بولادة طبيعية زائد ان ممكن يفضل وزنه عالى علطول.

2- احتمال ان الطفل يكون سكره قليل طول عمره موجود، (اللي هو عكس مرض ارتفاع السكر) لان جسمه و هوجنين اتعود يفرز انسولين كتيرعشان يقلل سكر الام اللي واصله، فساعتها هيفضل يفرز انسولين كتير مع انه بيدخله كمية مناسبة من الكر فهيخلي سكره واطي علطول.

3- احتمالية مشاكل الرئة عند الطفل اول ما يتولد مش قليلة، لان الحامل اللي عندها سكر بيخلي عميله نمو رئه الجنين اصعب.

ليكي كحامل:

1- اوضحنا ان وزنه الكبير هيخليي تولدي قيصري، ولو ولدتي طبيعي فده ممكن يعمل مشاكل صحية ليكي بسبب حجمه

احتماليه انك تولدي قبل الـ9 شهور عالية

2- هيبقى كده عندك مرض السكر بطريقة مزمنة بعد ما تولدي 🙁

3- ممكن يقلب بمرض تاني، بيؤدي الى ارتفاع ضط الدم، و ده بيأثر عالتغذية اللي بتوصل للجنين ، و ممكن تقلب معاكي بان الجسم يبقي فيه انتفخات او يقلب بتشنجات

الموضوع على اد ما هو خطير و اضراره كتيرة الا ان علاجه سهل جدا!

هو اصلا طبيعي بيخف لوحده لو خدتي بالك من نفسك 😉

  • اولا: اكل صحي ثم اكل صحي ثم اكل صحي 😀
  • ثانيا: رياضة الحمل مهمة جدا .. بس دي تسألي دكتورك فيها الاول عشان لو الحمل مش ثابت مش هينفع معاكى  كل الرياضات 😉
  • ثالثا: قيسي السكر بانتظام من اول الحمل لاخره و ده بتابعيه مع الدكتور عشان على اساس سكرك ممكن يحددلك نظام غذائي معين لو سكرك عالي بنسبة معينة
  • رابعا: حاولي يبقى وزنك مظبوط قبل الحمل
  • خامسا: لوالدكتور كتبلك اي دوا للسكر الفترة دي متستهتريش بيه 😉

خدي بالك من نفسك .. الصحة متتعوضش 😉 و الحفاظ عليها مش صعب على اد ما هو محتاج حد مهتم ^_^

عودى جسمك على الاكل الصحي فى وقت الحمل و بعد الحمل كمان.

قوليلنا بقى ايه تانى محتاجه تتعلميه عن فتره الحمل ؟؟

 

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك