علاج حب الشباب.. محتاج فك شفرة مش علاج - شفاخانة

خلينا متفقين من البداية أن عشان نوصل للنتايج اللي احنا محتاجنها مع جسمنا لازم نكون قبلها فاهمينه كويس و فاهمين أسباب ظهور الحاجة دي من البداية..

عندنا مشكلة مفاهيم مع اي حاجة بتضايق مظهرنا و بنسميها مرض و ندور لها على علاج زي مثلا البشرة الدهنية و البشرة الجافة و طبعا فوق كل دا حب الشباب و سنينه

..!طبيعي جدا أن نوعية المشاكل او خلينا نسميها الظواهر بتاعت حب الشباب و الرؤوس السوداء لها اضرار نفسية و اجتماعية اكتر ما تكون صحية

..الجسم عامة كل ما كان التعامل معاه باهتمام كل ما كانت النتايج أنجح

تفتكروا مين في دول وقعه علينا احسن؟

  • اننا نبقى مضطرين نستخدم 50 كريم و دواء لعلاج حب الشباب ؟
  • ولا اننا يبقى كل اللي علينا مجرد تعديل في العادات اليومية من الاكل و الشرب و المجهود؟

..سيبنا من الاولى و نمسك في التانية، و عشان نعدل العادات دي في حاجات بسيطة محتاجين نفهمها مع بعض

حب الشباب و البشرة الدهنية مش توأم ملتصق:

حب الشباب من أكتر الحاجات اللي مرتبطة في ذهننا بالبشرة الدهنية و مشاكلها، و طبعاً الواحد مش محتاج يتكلم عن معاناة الواحد من مشاكل حب الشباب و مشاكل البشرة الدهنية، بس المفاجأة أن حب الشباب حمادة و البشرة الدهنية حمادة تاني خالص ! و إن كانت البشرة الدهنية لكونها بشرة حساسة دا بيخليها معرضة اكتر للموضوع دا

..اللي مخليهم مرتبطين ببعض في ذهننا بس هو المسببات الرئيسية لحب الشباب و هي الأتى

حالات ظهور حب الشباب المتعارف عليها:

الجينات

عملية تكوين حب الشباب و الحبوب في البشرة بشكل عام متحكم فيها بعض الجينات الوراثية زي مثلا نسبة خلايا الجلد اللي بتموت و تسد المسام. و ازاي مناعة الجسم بتتعامل مع الباكتيريا اللي بتصيب الجلد أو البشرة.

و كمان نسبة التهاب البشرة و احمرار حب الشباب مرتبطة بدرجة لون البشرة، البشرة الفاتحة دايما بيظهر عليها احمرار اكتر و بتتأثر بالمواد الملتهبة اكتر من البشرة السمرا و في نفس الوقت البقع الفاتحة اللي بيسببها بعض حالات حب الشباب بتظهر في البشرة الغامقة اكتر من الفاتحة.

الهرمونات

اضطرابات الهرمونات بتبدأ مع سن البلوغ عند البنات و الولاد. و الهرمون الأساسي المسئول عن المرحلة دي هو هرمون الأندروجين، و من صفاته انه بيكبر الغدد اللي بنفرز دهون في الجسم، بيزود من افراز الزيوت و نتيجة لكترة افراز الدهون مع خلايا الجلد الميت بيبدأ تكوين حب الشباب.

في البنات و الستات .. الإضطراب في معدلات افرازه بالصورة العادية زي في حالات الدورة الشهرية / الحمل بيظهر حب الشباب. 

أما في الرجال .. هرمون التيستوستيرون عند الرجال ازيد في الجسم و بيخلى طبيعة جلد الراجل سميك و بالتالي نسبة تعرضه لحب الشباب مع اي اضرابات هرمونية ( غير البلوغ ) نادرة

الضغط النفسي

عند الشعور بالضغط و الإنفعال، هرمون الكورتيزول بيُفرز بشدة مع الاندروجين و الاتنين بنفس الصفات و ان كان الشخص في ضغط متواصل بيكون سهل جدا ان جلده يُصاب بحب الشباب

.و السبب دا أساسي عند الستات أكتر من الرجال نظرا لكونهم عاطفيين اكتر و بيستجيبوا لمشاعرهم و انفعلاتهم أكتر من الرجال

دي في الأغلب الأسباب البديهية المتعارف عليها في الموضوع، بس احنا هنا عشان نعرفكوا اللي مش بديهيي و نعرفكم أن في أسرار لحب الشباب كتيرة هتعرفكوا اكتر عن جسمكم

أسباب ظهور حب الشباب للبالغين الغير متعارف عليها:

    1. لعنة الـSLS:

      بعض مستحضرات العناية بالشعر و الصابون و معجون الأسنان بتكون مكونة من sodium lauryl sulphate او sodium laureth sulphate  (سلفات لورييت الصوديوم) الإتنين توأم مش فارقة كتير ، و دا ميزته انه بيعمل رغوة كتير من اللي بنحبها دي في الصابون و بتحسسنا بالنضافة و في نفس الوقت تكلفته في الإنتاجية قليلة جداً. 

      بس الفكرة بقا أن محدش عامل حساب لأن أضرار سلفات لورييت الصوديوم خطيرة لا يستهان بها..

      أ) مصدر مباشر للسموم في الجسم:

      مع المياه السخنة بيطلع بخار في نسبة سموم (toxic sodium oxides) و (sulphur oxides) و دا كافي ان الدش مع اي منتج من دول بيتراكم اثار سلبية على الجهاز التنفسي و اللي هنتاكد من مدي خطورته في نقطة ب! 

      ب) الـSLS مادة مسرطنة:

      اثاره خبيثة بتظهر على المدي البعيد مع صفة انه يقدر يتغلغل في العينين/المخ/القلب/الكبد مع دراسات كتير بتشير لكونه مادة مسرطنة و التفاصيل العلمية الدقيقة ورا الكلام دا اعلنت عنها Mercola (احد اهم مصادر الاخبار الطبية و الصحية تحت رعاية د/جوزيف ميركولا) و من خلال 16000 دراسة على الـSLS

      ج) أحد الأخطار المباشرة على العيون:

      بالنسبة للأطفال ممكن يكون له دور في اي طفرة في تكوين العين، و للبالغين هو من أحد مسببات اعتام عدسة العين (بتعمي).

       

    2. بعض مكونات مستحضرات التجميل:

      هنا في خبر حلو و خبر وحش، الحلو ان مش كل المستحضرات التجميلية مضرة ولا ممنوعة بالعكس في منها بيكون مفيد و مغذي للبشرة و بيحفظها من اضرار الجو و الشمس و غيره

      الخبر الوحش ان في مكونات و كيماويات في المنتجات دي بيكون ليها صفتين مضرين للبشرة الحساسة او اللي فيها حب شباب (irritant: مثير للحكة) و ( comedogenic: يساهم في انسداد مسام الوجه)..

      من مكونات مستحضرات التجميل الحساسة على البشرة:

      أ) Oxybenzene:

      دا بيساعد أي كيماويات أنها تتشرب في الجلد و دا ممكن يتسبب في حساسية أقرب ما يكون للاكزيما في الشكل و الشعور بالحكة، و كمان بعض خبراء التجميل و دكاترة الجلدية (نقلا عن FDA) شاكّين في كونه بيسبب “اضطرابات في هرمونات الجسم” و اللي اصلا من المسببات الرئيسية لحب الشباب.

      ب) Retinyl Palmitate:

      بيقوم بنفس فايدة فيتامين أ للجسم، بيحسن و بيأخر علامات كبر السن على الوجه و بيخليه نضر اكتر! طب فين الضرر في كدا؟

      المشكلة انه تركيبة ما بين ريتينول و حمض البالمتيك (موجود في الفواكه الاستوائية زي جوز الهند) ، و دول لما بيكونوا على الوجه و يعرضوا للشمس بيطلعوا اشعاعات سامة للجلد ممكن تؤدي للسرطان مع المدى البعيد

      ج) و دي قايمة مكونات مسببة لحب الشباب:

      Octocrylene

      Paraben Preservatives

      Homosalate

      Laureth-4

      Isopropyl Myristate

      Potassium Chloride

      Hexadecyl Alcohol

      Isocetyl Stearate

      Myristyl Myristate

      Wheat Germ Oil 

      Red Algae

      Acetone

      Cotton Seed Oil

    3. الكربوهايدرات و السكريات المصنعة:

      شرح الموضوع دا يتبسط في ان أكل الأصناف دي من الأكل مرتبطة بمؤشر نسبة السكر في الدم، أكل الكاربوهايدرات بصورة مفرطة و السكريات الكتير و خاصة زي الصودا و الأكل المصّنع بيعلي من نسبة انتاج الإنسولين في الجسم و بعض الهرمونات و دا بيرجعنا للأسباب الرئيسية لحب الشباب و هي الإضطرابات في الهرمونات.

      كل الدراسات مأثبتتش علاقة واضحة و صريحة الا من خلال العملية دي و أن كل انظمة الأكل اللي بتستبدل السكر بالعسل و بتمنع الصودا و تفضل القمح الكامل و هكذا، ليها عامل أساسي في العلاج لحب الشباب و التقليل من نسبة الحبوب في البشرة.

      و دي مقترحات بسيطة للأكلات اللي فيها نسبة أقل من الكربوهيدرات:

      – كل منتجات الألبان خالية الدسم

      – كل المخبوزات بالقمح الكامل و الشوفان

      – بروتين الأسماك و المأكولات البحرية

      – خلي الفاكهة و الخضار يسيطروا على الوجبة

      – تجنب أى منتجات مصنعة و استبدال السكريات بعسل النحل

      – ماتسيبش نفسك لمرحلة الجوع 

      – ماتاكلش قبل ما تنام

      – الماية الماية الماية

       

    4. الـ“Acne Mechanica”:

      يعني ايه المصطلح دا؟ دا نوع من أنواع حب الشباب اللي بينتج نتيجة للاحتكاك أو الضغط أو الحرارة الشديدة على البشرة مع طول المدة و العرق بيعمل حبوب في الجسم. أكتر الأماكن اللي بيظهر فيها حبوب نتيجة لـلـAcne Mechanica بتكون الاكتاف و الضهر و داير ما يدور الوجه و ممكن بسيط على الخدين.

      ا) أماكن الحبوب في الجسم في الحالة دي بسبب:

      – شنطة ضهر بصورة روتينية

      – لبس طقية او خوذة او حجاب

      – استخدام الموبايل لفترات طويلة

      – الملابس الضيقة

      – الخامات الغير طبيعية

      ب) علاج حب الشباب في الحالات دي بيكون محتاج:

      – تنضيف للجسم باستمرار و بصورة مكثفة و الاستهتار فيه مضر جدا

      – استخدام الأقمشة القطنية في الطبقة الملامسة للبشرة و الطرح بيقلل من الاحتكاك المؤذي للبشرة و الجسم

      – استخدام غسول فيه salicylic acid ( في حالة عدم وجود حساسية منه)

      – استخدام سماعات الموبايل في حالة المكالمات الطويلة

    5. تغييرات الجو و الرطوبة:

ازاي دا بياثر على حب الشباب و ظهوره؟ الرطوبة و الحر بيخلوا البشرة تعرق أو تكون رطبة بنسبة أعلى نتيجة للجو اللي محيط بيها و دا بيساعد في تواجد و نشاط البكتيريا و الأتربة في المسام اللي بتسهل عملية تكوين حب شباب و رؤوس سوداء.

و عامة محدش يحبط اوي من السبب دا لأنه الحقيقة بيصيب حوالي 85% من البشر في سن من 12 – 25 اللي عايشين في بيئات فيها رطوبة او حر شديد .. يعني دي في الأغلب طبيعة بشرية مش اكتر ولا اقل.

من أكتر المسببات في الظروف دي لانتشار حب الشباب و كترته هو لمس البشرة أو مسحها جامد، الموضوع مش بيعمل اي حاجة غير انه بيزود انتشار البكتيريا و الأتربة في الوجه و بيخلي الايد تعدي من مكان من التاني .. 

فالحل الأمثل أن يكون في منديل نضيف باستمرار بيمسح بلطف على الوجه من غير “كحت” لحد ما يتواجد الشخص فى مكان لغسله و تنضيفه بعناية، و هنا نبدأ نتكلم عن ازاي ممكن نهتم بنضافته..

مبدئيا، تجنب اي غسول به كحول لأن الفترة دي بتكون البشرة في حالة اجهاد و الكحول هيزود حساسيتها مع الأتربة، و ثانياً و دا الأهم استخدام ماية فاترة للشطف لأن المياه الساخنة هتكون بتدي وهم للجسم انه زيوته الطبيعية هتجف فا هيفرز اكتر كرد فعل للحماية و كمان المياه الباردة هتكون فارق درجة حرارة صادم ممكن تسبب قشف على المدى الطويل ..

أماكن ظهور حب الشباب في الوجه و دلالتها:

مش كل الناس ركزت أن أماكن الحبوب وراها سبب، بس في الحقيقة أن دايما الجسم بيبعتلنا اشارات و بيحاول يحذرنا من أي حاجة مجهدة فيه او على وشك المرض .. يمكن بس الموضوع يكون محتاج فك شفرة!

الحبوب في الأغلب بتظهر في أماكنها لأسباب معينة و لو ركزنا معاها ممكن نعرف الأعضاء المحتمل تكون تعبانة أو الأكلات اللي بتأثر في جسمنا بالسلب او أي عادات بنمارسها و مش فاهمين انها مش مناسبة لينا..

طبعا خلينا متفقين أن الأمر بيختلف من شخص الى أخر بس دي أمثلة عامة مع أغلب الناس بتكون حقيقية!

هنا هنتكلم عن أماكن الوجه اللي بتصاب و نصايح عامة لعلاج حب الشباب فيها:

  • الجبهة و ما بين الحواجب:

الحبوب في الجبهة ممكن تكون اشارات لاضطراب في وظايف الكبد أو المثانة. و ممكن يكون نتيجة لمعاناة الشخص من الضغط النفسي. 

بالنسبة للضغط النفسي فهو قصة كبيرة، و لكن خلينا متفقين ان الحل مش اننا “مانزعلش” و خلاص..

أبسط الحلول هو تضبيط عدد ساعات النوم بحيث ما يقلش عن 7 ساعات يومياً و ممارسة الرياضة نص ساعة يومياً على الأقل.

في أحيان كتير بيكون بسبب التقصير في شرب كمية الماية المناسبة على مدار اليوم، و شرب منتجات صودا كتير.  الطبيعي ان الواحد يشرب من 8-12 كوبايات على حسب وزنه.

ممكن برده زيادة الأكل في منتجات الألبان عند بعض الاشخاص تدي نفس التأثير. التقليل منها و خاصة كاملة الدسم و السمنة و الزبدة.

  • الأذنين و الدقن

نتيجة للاضطرابات الهيرمونية في حالات الدورة الشهرية و الحمل و حبوب منع الحمل و غيرها كتير. و دي بتكون حالات مؤقتة بيفضل الصبر عليها و بتروح مع زوال الحالة.

يا إما مشاكل في الجهاز الهضمي كمعدة و قولون و  الكلى تعبانة و دا نتيجة للأكل من الشارع و استهلاك منتجات مصنعة ( من المكونة بزيوت مشبعة و زيوت نخيل و مواد حافظة .. ) كتير و شرب الصودا الكتير.

الحل لتقليل حب الشباب في الودان بيكون “تاني” تضبيط شرب الماية و تقليل الصودا و دا حل ممكن ناخده على كل الأماكن عشان مانفضلش نكرره تاني ، بالإضافة لتجنب باكتات اللاتيه و الموكا و الكوفي ميت و المنتجات المعلبة بشكل عام.

  • الخدود

عادة اننا نتكلم في الموبايل فترات طويلة اصبحت جزء من حياتنا خلاص. و الفكرة انه لو بيتحط على الوجه لفترات طويلة يبقى المشكلة أن كل مرة بينقل بكتيريا من خد للتاني للجو للأماكن اللي بيتحط فيها و هكذا ! 

المشكلة مش بس في نقل العدوى، الفكرة كمان في أن في حب شباب بينتج عن الاحتكاك و اللي اتكلمنا عنه فوق ( acne-mechanica )، المسبب التاني في الأغلب بيكون بسبب مشاكل في الجهاز التنفسي و دا بيكون ناتج عن التدخين او العيشة في بيئة ملوثة. 

زيادة الأملاح من الحاجات اللي ممكن تزود الحبوب في الوجه و خاصة الخدين، و دا بيودينا في اتجاه اننا نقلل من الاكلات و المشروبات اللي بتقلل الماية في الجسم و بالتالي بتزود نسبة الاملاح ، زي شرب الكافيين و القهوة كتير و تقليل الملح على الاكل، و التقليل من الاكلات المصنعة عشان اغلب المواد الحافظة بتعلى الاملاح.

و اخيرا و ليس اخرا، الاهتمام بالرياضة أو بالأخص المشي، لأنه بينشط الكلى و هي دي المسؤولة عن تنقية الجسم من الأملاح الزايدة

  • الأنف

ظهور حب الشباب على الأنف ممكن يكون بسبب ضعف في الأعصاب أو ضغط الدم مش مضبوط .. ضغط الدم بيتظبط مع تظبيط النوم و الشرب و الحركة و أهم حاجة تقليل التوابل و مشاكل الاعصاب كدا كدا مالهاش كتالوج، هي بتكون محتاجة تناول فيتامين ب بكترة.

– و دي قايمة اكلات غنية بفيتامين ب:

فيتامين ب 12: كل المنتجات الحيوانية 

مخبوزات القمح الكامل

السبانخ

الحبوب كالعدس و البسلة

المأكولات البحرية

البيض و الالبان 

و البديل بيكون فيتامينات اقراص او حقن 

و الخلاصة من كل الكلام دا لعلاج حب الشباب:

انكوا تطمنوا للموضوع و ما تعتبروهوش مشكلة كبيرة لانه اغلب مسبباته ياما مؤقتة، ياما بسبب عادات و سلوكيات لا تتناسب مع طبيعة الجسم . و بمجرد اننا نهتم بالتلات نقط اللي جايين هيتحسن الوضع مع الوقت:

  1. – تنظيف الاكل بأكتر صورة صحية ممكن و تجنب الاكل من الشارع
  2. – الاهتمام بمستوي نضافة البشرة و التدقيق في مكونات الغسول
  3. – مراعاة وجود عادات يومية لحركة الجسم و استراحة العقل و الفصل عن الضغوط.
شاركنا

عن الكاتب :

شارك بتعليقك