[ فوائد الحشيش 2017 ] وما هي اضراره وتأثيره علي العقل - شفاخانة

المقال ده مكتوب عشان يعمل توعية للناس اللي مبتشربش حشيش   و الناس اللي بتشرب بس مش فاهمة ايه بالظبط تأثير الحشيش وايه اللي بيحصل في جسمها لما تدخله مكونات الحشيش الكميائية 
مش هتلاقينا بنبالغ في تشويه الحشيش عشان نبعدك عنه لان فوائد الحشيش فعلاً موجودة ،
بس أكيد برده مش هنبسط اضرار الحشيش  لدرجة انك تروح تشرب !!،

كل اللي احنا عايزين نوصله من المقال ده هو انك تفهم و تُدرك الموضوع من ناحية طبية و نفسية لأن ده هيخليك تتعامل مع الموضوع بطريقة احسن ،

اه ممكن تحس اننا بنستخدم لغة و مصطلحات دارجة في الشرح و ده عشان يكون الموضوع اسهل في التوعية و توصيل المعلومة، ودي الأجزاء اللي هنتكلم عنها : 

 ما هو الحشيش؟ و ايه مكوناته

اثار الحشيش لاول مرة ، وايه الي بيعمله في جسمك مفعول الحشيش

فوائد الحشيش

اضرار الحشيش

نصائح لـ علاج ادمان الحشيش

 

 

 ما هو الحشيش؟ و ايه مكوناته :

مكونات الحشيش عبارة عن خلطه من حوالي  500 ماده  كميائيه بتحتوي التركيبه دي بقي علي ماده اسمها THC و ماده اسمها CBD  (الماده التانيه دي بستخدم بصوره اساسيه في اغراض طبيه )

و هي دي الماده اللي بتسبب الدماغ عند اللي بيشربوا، ماده الـTHCدي بقي ليها رحله في دماغ اللي بيشرب و الرحله دي هتعرفها دلوقتي و هتفهم كل حاجه بيحس بيها اللي بيشرب و بيحس بيها ليها.

بس قبل شرح رحله المادة المنيّلة دي في جسمك محتاجين نعرف الاول الدماغ بتاعتنا شغالة ازاي عشان نعرف الحشيش بيفرق في دماغنا في ايه بظبط .

مبدائياً المخ بتاع الإنسان مكون من حوالي 100 مليار خلية عصبية بتنقل نبضات كهربائية بينها و بين بعض و هو ده  بطريقه مبسطه اللي بيحصل في مخنا و احنا بنفكر او مركزين في حاجه معينه او بنتحرك. 

النبضات الكهربائية دي بتتنقل من جسم الخلية العصبية و تمشي في “ديل” الخليه لحد اخرها و اخرها ده بقي بيكون ملمس مع بدايه خلية جديدة و هكذا .

  الصورة الاولى هي صورة لخلية واحدة، الجزء المكعبر ده هو جسم الخلية و الديل ده ممكن نعتبره رجليها،

طبعاً الاسماء الطبية لأجزاء الخليه لو ذكرناها دلوقتي مش هيكون الموضوع ممتع خالص و مش هتستفيدوا اي حاجه و عشان كد محتاجين نكوّن صورة تخيلية بدون الدخول في مواد كليه طب.

المهم ان احنا حاطين صوره الخليه دي في الاساس عشان الـReceptors يعني المستقبلات اللي بتدخّل النبضات الكهربائية و المواد الكميائية للخلية اللي هي زي ما تقول كده شعر الخلية اللي طالع من الحتة المكعبرة 😀

المهم ان الـReceptors دول في الطبيعي بتكون وظيفتهم استقبال النبضات و المواد الكميائية اللي بتنقلها كل خلية للتانية و ده بيكون في جزء صغير جداً من الثانية. 

فوائد الحشيش

الصوره التانيه صوره حقيقيه اكتر الي حدً ما و بتبين تواصل الخلايا العصبية دي مع بعض و تنقل النبضات الكهربائية من خلية للتانية  و هو ده اللي كنا بنتكلم عليه فوق.

تدمير الخلايا - اضرار الحشيش

 اثار الحشيش لاول مرة ، وايه الي بيعمله في جسمك مفعول الحشيش؟ : 

المرحلة الاولى

مع الدقايق الاولى لشرب الحشيش او انك تدخل ماده الـTHC لجسمك اياً كان الطريقة بتبتدي الـReceptors اللي لسه متكلمين عنها تستقبل ماده الـTHC اللي تأثيرها بيكون مختلف

عن المواد اللي متعودة عليها الـreceptors دي وبالتالي النتيجة بتكون مختلفة. 

اللي بيحصل هو ان الـReceptors اللي بتنقل النبضات و المواد الكميائية بدل ما تكون بتتحفز لجزء من الثانية كل ثانية، هي بتقضل متحفزه معظم الوقت 

(المرحله الاولى من مفعول الحشيش اللي بتكون في الاغلب 30 دقيقة) و ده معناه انتقال نبضات كتير و مواد كميائية اكتر بين الخلايا و بعضها.

النتيجة 

طبعاً الكلام ده مش معناه اننا بنكون بنفكر بطريقة خارقة للعادة و اننا  ممكن نستفاد من فوائد الحشيش و نخترع الة الزمن،

الفكرة كلها ان علمياً حدة التركيز بتزيد عشان السبب اللي احنا لسه قايلنه بس هايبرت الخلايا العصبية دي بتخلي تركيزك موجه علي حاجه واحدة بس،

يعني دماغك بالبلدي كده بتعلّق في التفكيرعلي موضوع واحد حتي لو الموضوع ده في منتهى التفاهة، زي مثلاً انك تفضل ربع ساعة باصص لدبانة و بتحاول تفهم ميكانزم الطيران بتاعها 😀

وممكن برضه تكون الحاجه دي هي معضلة رياضية وتلاقي نفسك حلّتها لمجرد انك علّقت في التفكير عليها، يعني موضوع التعليق ده بيكون علي حسب تحكمك في دماغك.

طبعاً لما الواحد بيكون اول مره يشرب مبيبقاش قادر يسيطرعلي الموضوع ده  بس بعد تعود الجسم علي المادة دي بيكون السيطره اسهل.

أعراض المرحلة الاولى

 سعادة مفرطة

و دي من فوائد الحشيش اللي بنشوفها في الافلام في مشهد المخدرات انهم بيضحكوا بهستيريا، طبعاً هم بيبالغوا بس الموضوع حقيقي.

  •  حماسة مفرطة

و دي بتترجم في صوره كلام كتير و صوت عالي و hyperactivity  

  •  زياده نبضات القلب و ضغط الدم

  •  انخفاض ضغط العين

و ده بقي اللي بيسبب حمران العين عند الناس اللي بتشرب، الموضوع يبان شكله مخيف بس ده اقل ضرر ممكن يخوف في الموضوع و بشويه بروزولين كل حاجه هترجع لطبيعتها، خطوره الموضوع في حاجات تانية خالص غير الشكل.

 

المرحلة التانية (مرحلة انتقالية)

اخر حاجة وقفنا عندها في العملية اللي بتحصل في مخنا هي ان الـReceptors لما بتستقبل مادة الـTHC بتعلق و بتهايبر لمده مش موثقة علمياً بس في حدود من نص ساعة لساعة، و بيتدي الجسم يفرز هرمونين اسمهم Dopamine و nor-epinephrine

الـDopamine : هو هرمون المتعة و الانجاز و الحماسة، الهرمون ده بيُفرز في جسمك في حالات كتير زي انك تنجز حاجة كنت عايز تعملها،

انك تجيب جون في ماتش كورة او انك تاخد غرزه بعربيتك و تظبط معاك و حاجات تانيه كتير، المهم ان دي الفكرة الرئيسية للهرمون ده و ليه دور كبير في فوائد الحشيش.

nor-epinephrine: ده هرمون ليه مشابه جداً للـAdrenaline المسئول عن الخوف و القلق عند البني آدم .

بعد كده بتبتدي الـReceptors تتخلص من الـTHC و ده بيكون مصاحب ليه شوية اعراض اكيد هتكون سمعت عنها قبل كده في الافلام .

  •  حساسيه ناحية درجة الحرارة 

يعني بيكون تأثرك بالبرد او بالحر ازيد من الطبيعي

  • (السحلة و السُطَل) يعني اختلال الاحساس بالوقت و المساحة

مع كل اللخبطة اللي اتكلمنا عنها و مع اضطراب الخلايا العصبية للمخ سواء بأنها تكون Hyper-Active او في حاله خمول بيبتدي احساس البني أدم بالوقت و المساحة و عشان كده تلاقي في الافلام برضه

الناس بتبتدي “تتطوح” بعد ما يشربوا بشوية و غير انهم بيتسحلو في حاجة و الوقت بيعدي من جنبهم ولا هم واخدين بالهم.

  • الجوع

الحشيش بيجوع، مقوله هتلاقيها منتشرة جداً بين الشباب، هو في الحقيقة بيجوع بس مش علي طول بعد ما تخلص المرحلة الاولى اللي هي زي ما قلنا قبل كده بتاخد تقريباً من 30 دقيقه لساعة،

بيبتدي بقي بعد المرحلة الاولى دي احساسك بجوع مش منطقي ممكن يوصل البني أدم انه يعك ويفضل ياكل اي حاجة تيجي قدامه ،

لأنه مش مدرك ان احساس الجوع مضاعف بدون سبب منطقي زي ان الجسم يكون محتاج الاكل ده فعلاً.

  • العطش

بعد المرحلة الاولى بيبتدي البُق يجف و الريق ينشف و ده بيكون تأثير وقتي بيروح اول ما تأثير الحشيش بيختفي،

وفي بعض الدراسات بره اكتشفوا ان شرب السوائل السكرية زي العصير بيزيد من تأثير المادة الفعالة اللي في الحشيش (THC) بس الدراسه دي احنا مش متأكدين منها لأننا مقدرناش نوصل هي اتعملت في انهي دولة و سنة كام علي الاقل.

 

المرحلة التالتة (الإنسحاب الوقتي)

بعد ما بتتم المرحلة الاولى و المرحلة التانية اللي هي تعتبر مرحلة انتقالية، بتبداً المادة الفعالة في الحشيش تسيب الـReceptors بتاعت الخلايا العصبية في حالها بعد ما كانت مهيبراها يجي ساعتين و كانت قالبة كيان الجسم كله،

المشكلة ان لما المادة دي بتوقف تأثيرها علي الـReceptors مبيرجعش الموضوع طبيعي و خلاص، لأ اطلاقاً.

زي ما كانت الخلايا العصبية اللي في مخك معلّقة علي وضعية التحفّز والهايبرة، بتبتدي تدخل في حالة خمول لان هي طلعان عينها من الصح و ساعتها بيكون مخ البني آدم معرض لحالة من 2،

 يا إما بيدخل في حالة من التسقيط اللي هي النعاس بالعربي  يعني، او الدخول في حالة من الإكتئاب والاضطراب النفسي.

بس في الاغلب الحالات اللي بتصاب بالاكتئاب بعد ما تأثير الحشيش بيروح بتكون قليلة جداً أو يمكن البني آدم بيكون مش عارف اصلاً انه في الحالة دي،

المهم ان بعد بحث و استقصاء شديد الدقه اكتشفت ان اغلب حالات الشرب بتنتهي في الاخر بتسقيط لأن كده كده كل اللي بيشربوا اصلاً عندهم اكتئاب مش مستنين الحشيش يكئبهم 😀

فوائد الحشيش :

طبعاً عنوان الفقرة دي يودينا في داهية، بس احنا عندنا مبدأ وهو مش علشان في حاجه مضرة و البني أدم المفروض ميعملهاش ابتدي اضخم في خطورتها و مش بعيد كمان اجوّد من عندي عشان اخوف الناس منها

و اخبي اي حاجه حلوة هي بتعملها عشان كده اكون كرهتهم فيها، بس احنا مقتنعين ان دا غلط،

لو عايز تقنع حد أنه يبطل حاجه لازم تكون محايد ، يعني متأفورش في ان الحاجه دي زي السجاير مثلا هتموته في خلال شهر ومينفعش برضه متوعيهوش للأضرار الفعلية اللي بتسببها السجاير بدون مبالغة

وتسيبه يشغل مخه بعدها و في الاغلب لو عملت معاه كده هتكون فرصة اقتناعه اكتر من لو بالغت و افورت.

“المهم دي كانت مقدمة عشان الناس متفتكرش اننا بتكلم عن فوائد الحشيش لأننا عايزنهم يشربوه “

مبدأياً كده فكرة ان في حاجة اسمها فوايد الحشيش،  فدي حاجه ماجبنهاش من عندنا، ربنا قايل عن الخمرة انه ليها اضرار ومنافع و اضرارها اكتر،

بالقياس احنا لقينا ان الحشيش تقريباً نفس الموضوع، ليه اضرار وفوائد و اضراره اكيييد اكتر، دلوقتي بقي هنقلك اي هي فوائد الحشيش .

1. فوائد الحشيش الطبية :  

مادة الـTHC والـCBD الاساسين في فوائد الحشيش و بيستخدمو في اغراض طبية كتير جداً و من اكتر الاستخدامات  اللي المادتين دول بيستخدموا فيهم هم:

1-مسكّن آلام

يعني بيستخدمو المادة الفعالة اللي في الحشيش و الماريجوانا في الادوية المسكنة بشكل كبير و ده مش معناه انك لما تكون مصدع تروح تشرب حشيش، الدكاتره و شركات الادوية بيستخدموه بطرق معينة.

2-PTSD او Post-traumatic stress disorder

أو اضطراب ما بعد الصدمة العصبية، و موضوع الـPTSD ده مرتبط بحاجات نفسية بحتة زي الذكريات المؤلمة اللي بتتمكن من الشخص بعد الصدمات العصبية،

و في دراسة مؤكدة بتقول ان استخدام مادة الـHTC عن طريق البق بيكون علاج قوي لكل عواقب الصدمات العصبية زي الكوابيس و الهواجس و ما شابه.

3-الغثيان و القيئ (الترجيع يعني)

بس مش اي ترجيع حضرتك، الترجيع الناتج عن بعض أدويه علاج السرطان

4-فواتح الشهية

و دا مش معناه انك تشرب عشان تجوع و بعد كده تاكل، لا خالص، أدويه فواتح الشهية هي اللي بتستخدم مادة الـTHC استخدام كبير لأنه اثبت علميا انه بيحفَز مستقبلات احساس الجوع.

5-الربو

بناءاً علي دراسات تمت في السبعينات اكتشف بعض الدكاترة ان الماريجوانا او المادة الفعالة اللي هي الـTHC بتساعد في تحسين التنفس،

بعد محاولات حصلت عشان تربط تدخين الحشيش و الماريجوانه بيهدي هيجان  الصدر في حالات الربو بس فشلو في اثبات نتايج موثقة في ده،

غير انهم حاولوا يعملوا بخاخ  متكون من الـTHC  بس فشلوا  للأسف 

6-مرض المياه الزرقا (في العين )

شكل السبعينات دي كانت خلبوصه جداً، عملوا دراسات كتير علي فكره انهم يحطوا ماده الـTHC في قطرة العيون بس فشلوا بعد ما اكتشفوا استحاله دوبان الماده دي في القطرة،

بس لحد وقتنا هذا الجمعية الامريكية للمياه الزرقاء بتستخدم الـTHC في علاج المرض ده بس للأسف معندناش معلومات عن الكيفية اللي بيعالجوا بيها.

7-الأرق

بص لو انت قاري المقال من الاول مش هتحتاج شرح، و لو انت من اللي بيدوروا علي الصور عشان مكسلين يبقي قدامك حل غلس واحد بس تطلع تقرأ

8-بيزود الأبداع

ايوه من فوائد الحشيش انه بيزود الابداع  ده مش كلامي ده كلام دراسه اتعملت في انجلترا سنه 2012 لغوا بيها نتايج بحث اتعمل في سنة 2001 بتقول ان  الحشيش و الماريجوانا مش بيزودوا الأبداع،

و بغض النظر عن ان الموضوع منطقي جداً لو حد ركز في فوائد الحشيش للمخ و اللي بيعمله الحشيش في عقل البني أدم هيلاقي ان اول ساعه في الموضوع الدماغ (في بعض الحالات)

ممكن تكون مؤهلة انها تبدع اكتر بكتير من العادي بسبب حاله الهيبرة اللي الخلايا العصبيه بتكون فيها في المرحلة الاولى من الشرب.

غير ان في دراسه فرنسية اتعملت سنه 2013 اثبتت  ان الانسان و هو في تحت تأثير ماده الـTHC بيكون اكتر تركيز و انتباه وملاحظه للألوان و الاصوات اللي حوليه و ده نتيجة لزيادة القدرة الحسيّه عنده بطريقه ملحوظة بعد الشرب.

ماكنش حد غِلب

ايوه لو كان الموضوع الاستفادة من فوائد الحشيش بالساهل كده مكنش حد غلب و كان مستوي الابداع ارتفع من ساعت ما لقوا اكتشفوا النبات المنيل ده 

بس للأسف برضه ان زي ما الموضوع بيكون محفّز للأبداع في الاول بيكون مايل للخمول في الاخر و ده معناه انك هتسخن في التفكير قوي و هوب هتلاقي نفسك نايم

و تيجي تاني يوم (لو انت بتشرب كل يوم ) تسخن علي التفكير قوي و هوب تلاقي نفسك بتسقّط

و النتيجة النهائية هي ان مفيش حاجه بتتعمل او بتكمل وده معنا ان الافكار اللي بتتطلع في وقت الشرب بتكون عبارة عن دخان بيطير اول ما الساعة الاولانية تنتهي.

اضرار الحشيش : 

انا مش هتكلم في الجزء دة كتير كده كده كلنا عارفين ان المخدرات مميتة، انا بس هقولك اضرار الحشيش  بتضرب ايه في المخ علميا عشان تبقي مدرك للوضع مش اكتر.

مبدائياً المخ ست فصوص، اكتر فصين في المخ احنا بنستخدمهم في حياتنا هم الفصين الامامين، 

الخبر الوحش بقي ان من اضرار الحشيش  انه بيدمر  الفصين الامامين دول ،

و للأسف بيطلع منهم وظايف كتير من اللي بتخلينا لينا لازمة في الدنيا زي سرعه البديهة و الذكاء و الادراك واتخاذ القرار و الاحساس بالوقت و المكان وحاجات تانيه كتير

بس لو جينا منعممش الكلام و نعرف بالظبط ايه الوظايف الدماغية اللي بتتأثر بها المخ لما يتعرّض للحشيش بقي.

  • الذاكرة القصيرة
  • القدره التنسيق و التنظيم
  • التحكم في الحركة
  • وظايف العقل الواعي عموماً

و انا بعمل بحث عشان اكتب المقال ده اكتشفت ان في إجماع علي حاجه واحدة، سواء من اللي بيشرب بقاله “50” سنه و ده والله حقيقي  لحد بعض الشباب الصغير الي لسه بادئ يشرب،

كلهم اجتمعوا ان الشرب كل يوم ملوش اي لازمة و ان اي شخص مهما كان مش محتاج اصلاً يشرب كل يوم، بس هو بيوهم نفسه انه محتاج يشرب كل يوم و ده بيخليه يتحول لروتين.

بغض النظر ان الشرب كل يوم صحياً مميت لخلايا المخ و ده علي المدي الطويل تأثيره اكبرمن تخيلك.

تحت هتلاقي نصايح تقلل اضرار الحشيش  بس ده مش بنقوله عشان الناس تشرب اكتر، احنا بنقول كده عشان اللي كده كده  مش هيبطل يتضر اقل لأن هي دي مهمتنا والله، اننا نرفع المستوي الصحي عند المصريين.

  • متشربش كل يوم
  • متشربش قبل النوم بساعتين علي الاقل (عشان الدماغ متكنش تحت التأثير وهي نايمه فا تعرف تستريح )
  • متشربش اول ما تصحي (لأن ده انتحار و من كل الكلام اللي فات تقدر تعرف ليه )
  • متخمسش مع حد في سيجاره (يعني مايبقاش نوم و خراب ديار، انت كده كده بتموت نفسك مش طالبة انتشار امراض )
  • متشربش اكتر من مره في نفس اليوم
  • متشربش و انت مكتئب (لأن ده بيزود من فرص تفاقم الاكتئب عندك )

نصايح اخيرة في علاج ادمان الحشيش تساعدك لو انت عايز تبطل

الفقره دي مافيهاش رغي كتير هم 3 حاجات… بس ده لو انت من جواك عايز تبطل

1- ربنا

2- هدف في الحياة

3- حياة اجتماعية سليمة (لان الحشيش مش اجتماعي خالص بالعكس يقال انه بيسبب الانطوائية،

و عشان كده مُحاربته بوجودك في حياة اجتماعية سليمة و صحية بيساعد جسمك يتخلص من ادمانك ليه)

طلب اخير 

متكنش متحامل و متعصب لرأيك و انت بتقنع حد يبطل لأن ده اقصر و اسهل طريق يخليك تساعده يكمل شرب،

حاول تكون معتدل و متأفورش و متحسسوش ان دي نهايه الدنيا، خلي بالك اصلاً ان اللي بيعمل كده عنده نوع من انواع الاضطراب يعني بيكون محتاج مساعدة منك اكتر من لوم و ضغط اجتماعي مش هيوصله غير لأنه يهرب منك.

مقالات ممكن تعجبك :

ما لا تعرفه عن القهوة 

أسطورة النوم 8 ساعات!

إيه علاقة الإكتئاب بالانتحار

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

تعليقان

شارك بتعليقك