ما لا تعرفه عن القهوة ! - شِفاخانة

كتير مننا شايف ان شغله مش هيمشي من غير القهوة و أن هى الحبر اللي بيخليه يكتب و مع ذلك مع أول شوية تعب إن شا الله لو حموضة يبقى من القهوة و تبتدي تسمع الجملة الشهيرة فى مجتمعنا ” ما هو من القهوة اللى بتشربها ”

الجدير بالذكر أن القهوة مش مُضرة اصلاً و ان زيها زى أى حاجة في الدنيا لو استخدمتها غلط يبقى اكيد هتضرك .. ما كل الناس بتاخد مُسكِنات و بينصحوا بعض بيها كمان مع أن المُسكِنات لها أعراض جانبية كتير و تعتبر إدمان برضه ، فالاستخدام الغلط لاي حاجة بيجيب نتايج سلبية كتير حتى القهوة علشان لو حد قالَك ان القهوة مُضرة و ان اضرار الكافيين كتيرة بس تعرف ترد عليه  😉

والله القهوة دي مظلومة معانا =D هقولك ازاى !

أنت جسمك سليم اصلاً يعني القهوة مش مُضرة طول ما أنت مواظب على كمية معينة
بتشربها… الصح أن الكمية دى تبقى من 200 مجم لـ300 مجم فى اليوم يعني تقريباً فنجانين ! فنجانين ها؟ مش ماجيين =P

أما بقى لو أنت تعبان و عندك الضغط ، السكر ، ضربات قلب سريعة أو أى حاجة من الحاجات دى فأنت مالكش في القهوة غير اللي الدكتور بتاعك يقولك عليه و لو مش بتعمل كده يبقى أنت من أول الناس اللي بيقولوا “ما هو من القهوة اللي بتشربها” =D

لأ بس برضه القهوة مضرة للقلب ، مش فيها كافيين يا عم !!

على فكرة اشاعة الكافيين دي غلط جداً و هقولك ليه ؟

هو آه القهوة ليها تأثير عالقلب بس مش بسبب المدى الطويل ، بسبب الإستخدام الغلط .

انما اللي بيعرض القلب للخطر هو مادة اسمها دايتربينس بتبقى موجودة فى القهوة ، و دى تأثريها على القلب عالى لأنها بتزود الكوليسترول ، و الكوليسترول معروف انه بيسد شرايين القلب ، مادة الدايتربينس دى المفروض انها بتختفى فى خطوة من خطوات عملية تصنيع القهوة ، الخطوة دي اسمها paper filtration .. القهوة التركي بقى و القهوة الفرنساوي و الإسبريسو مش بيتعملهم العملية دى لكن القهوة سريعة التحضير زى النسكافيه و غيره بيتعلهم paper filtration .

علشان كده في معتقد عند الناس كلها ان النسكافيه أخف و أصح شوية من القهوة السادة ، بس الناس فاكرة كده علشان لونه افتح بس =D

طب لما هو مش من الكافيين ، ليه بنقول للأطفال اوعوا تشربوا قهوة أو نسكافيه ؟

بص يا سيدي ، القهوة من تأثيرتها انها بتحفز الجسم و بتزود الانتباه و ده بيبقى بسبب الكافيين و في نفس الوقت بتسبب الأرق ده غير أن مفيهاش مواد غذائية للجسم. الدكاترة بينصحوا أن الاطفال يخففوا الشكولاتة و البيبسي و الكاكاو و ياريت لو بطلوها خالص و يشربوا مكانها مياه و ده علشان الأطفال محتاجة المواد الغذائية اللى جسمهم يتبني عليه و علشان كمان الأطفال مش محتاجة تحفيز ، و طبعاً كل ده كوم و أن الكافيين ادمان ده كوم تانى خالص.

 طيب صحيح هو ايه حكاية ان الكافيين ادمان ده ، و ليه ؟

احنا متفقين أن اللى تعبان ده طبيعي جداً الكافيين يتعبوا زيادة و خصوصاً لو مُركَز زي في القهوة كده .. انما تأثيرها بقى على الجسم السليم بيبقى ايه؟؟؟

عادةً تأثير القهوة على اللى جسمه سليم ده بيبقى “وقتي”. يعني أول مرة بتشرب فيها قهوة هتحس أن ضغطَك عالى بس شوية و هيهدى ده غير أن القهوة بتحفز النظام العصبى فى جسمك و بتسبب توتر و أريفة و أرق.

الحاجات دى كلها من تأثير القهوة على الجسم السليم اللى مش واخد على شرب القهوة و التأثير بيبقى فى ساعتها بس. مع الوقت بقى الجسم لما بياخد على القهوة الأعراض دى بتخف شوية أو بياخد عليها و جسمه بياخد فعلاً من مميزات القهوة بس مع الوقت بيحتاج يزود كمية القهوة اللي بيشربها … الحاجات دي كلها على المدى الطويل بتبقى إدمان و ده مش لأى سبب غير أن الجسم اتعود عليها.

 طيب و المدمن اللي عايز يبطل قهوة يعمل ايه؟

مدمن الكافيين لما يحب يبطل هيقعد من 12-48 ساعة بيخف من ادمانه و ممكن يطوّل لأسبوع ، الفترة الى هيبقى بيبطل فيها الكافيين هيواجه أعراض الانسحاب اللى هى:

1) الصداع

2) اريفة

3) عصبية

4) المعدة المقلوبة

5) الإمساك

6) شدة عضلات

لو قررت تبطل القهوة ماتنسحبش مرة واحدة لأن ده هيعرضك لأنك تفضل في الحالة دى لمدة أسبوع علشان كده كده معظم الدكاترة بينصحوا بأن الواحد يقلل الكافيين تدريجياً.

طيب ليه بيقولوا القهوة سبب في ان الواحد يجيله سكر ؟

دي من الاشاعات المغرضة اللي بتتنطور حوالينا و اللى للأسف بتبقى بتمِس حاجات حساسة اوي في  حياتنا و خوفنا من أننا نجازف فى اى حاجة خطيرة زى مرض السكر كده بيخلينا نصدق الإشاعات دي.

القهوة مش بتسبب السُكر نهائياً بالعكس ده في اجسام مُعينة القهوة بتقلِل السُكر فيها علشان بس الناس اللي بتقول القهوة بتجيب السكر. دول غالباً القهوة بالنسبة لهم بتبقى قاعدة في كافيه و order قهوة بالكراميل او بالكريمة … يعني حضرتك تضرب سكريات قد كده مع القهوة و بعد كده تقولي القهوة بتجيب السكر ، مش عيب!!! 😀

المشكلة مش هنا بس.الحاجات دي بتتخن و زيادة الوزن دى بتبقى غلط على القلب فترجع تــــــاني لموال. القهوة بتضر القلب.

أمال ليه كل الناس بتقول أن القهوة مُضرة ، ما هو مفيش دخان من غير نار برضه ؟!

معظم الناس اللي بتشرب قهوة نظام حياتهم غلط في حاجات كتير

أولاً:- بيشربوا سجاير و دي مش بتدمر الصحة ، دي بتجيبها من جذورها يعني من اول النفس اللي بتاخده لغاية دقات قلبَك.

ثانياً:-نظامهم الغذائي غلط ، يعني ماتقومش من النوم تضرب مَج قهوة كامل قال ايه علشان تركز ، الفطار اصح على فكرة :/

أشخاص ممنوعة من القهوة :-

1) الحامل :

لو الست متعودة تشرب قهوة فلازم فترة الحمل تبطلها لأن الكافيين بيخترق الغشاء اللى بيكون حوالين الجنين و الجنين بيبقى حساس جداً في فترة الحمل لأنه بيكون جسمه.

2) اللى ضغطه عالى ” فى وقتها “

ماينفعش ضغطك يبقى عالي و تقول لحد “روح اعملي فنجان قهوة” لأن القهوة اصلاً بتخلي الضغط يعلى فى وقتها و ده لو زاد ممكن يأثر عالواحد جامد.

3) مريض القلب .

أمراض القلب مقسومة لنوعين:-

-coronary الشريان التاجي و ده اساسي جداً في القلب

-cardiovascular يعني الأوعية الدموية اللي جوا القلب.

المفروض أن القهوة مش بتأثر لا على الشريان التاجى ولا على الأوعية الدموية فى القلب, انما لو فى حاجة منهم تعبانة بالفعل يبقى القهوة هتأثر عليهم.

قصة حياتك مع القهوة من الآخر

القهوة لها مميزاتها زى ما لها عيوبها ، و طول ما أنت ذكى و بتعرف تاخد منها الفايدة اللى أنت محتاجها من غير ما تضر نفسك هتضمَن ان الحِبر اللي قولنا عليه في الاول هيفضل معاك علشان تنتِج كويس 😉

قولنا بتشرب قد ايه قهوة في اليوم؟

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك