مخاطر التابلت

 

تبص يمين تبص شمال تلاقى الناس فى المواصلات أو ماشيين فى الشارع يا ماسكين الـتابلت  يا ماسكين الموبيل و دة طبعا لأن الموبيل و التابلت ليه مميزات كتير منها..

1- مش بياخد مكان و ممكن أحط أكثر من 2.000 كتاب عليه و اروح بيهم في اي حتة

2- فى السفرمش بيعملى وزن زيادة

3- أقدر أقرا فى أى مكان عشان مش بحتاج نور

مع الوقت الناس كلها هتحب تقرا من على التابلت او الموبيل اكتر، عشان كدة مشاكل و امراض العين هتزيد اكتر برضوا!، لأن التابلت بيأذي العين مع الوقت.

طب مش ساعات بتحس أن عينك كمان وجعاك كأنها مانمتش هى كمان ؟ ده بيكون بسبب الـتابلت اللى ممكن يخليك تحس بحاجة من دول:

 

1-  الـEye Strain:


لما بتحس أن عينك مشدودة و متنشنة كده ده عشان لما بتقعد تقرا فترة طويلة على الـتابلت  اللى بيحصل أن الـنوربتاع الـتابلت لما بيكون عالى بيأذي عينك هقولك ليه بس الأول افتح قدام عينك دلوقتي على google صور للون هادى و لون فاقع زى الفسفورى مثلاً، شوف عينك هتضايق ازاى.

أهو دة اللي بيحصل بالظبط عشان الخلفية بيضا والكلام مكتوب بالأسود ده بيخلق فرق قوى بيخلي عينك مش مرتاحة كأنك بالظبط بتتفرج على اللون الفيسفورى و وراه علطول لون لبني.

2- الـEye Fatigue:


=أنت تقدر تفضل صاحي طول اليوم و متنمش ؟
-أكيد لاء!

افرض أن عينك دى انسان و محتاج ينام ، اهو النوم بالنسبة للعين ده هو انها ترمش! :D، و لو العين مرمشتش ده بيسبب ارهاق للعين غير عادى ممكن تحسه على صورة جفاف في العين لأن طول ما العين مفتوحة المياة اللى جوا عنيك بتتبخر، أو انك تشوفهُ على صورة احمرار فى العين و تحس باحتكاك فيها. معدل رمش العين المفروض من 6-8 مرات في الدقيقة. أقل من كدة هتبدأ تحس بأرهاق في العين و طبعا حضرتك مبترمش طول ما انت قاعد تقرا على الـتابلت.

 

ليه التابلت متعب للعين:


1- أنت بتفضل مركز عينك على الـتابلت،  فطبعاًَ عضلات عينك بتفضل ثابتة على وضع واحد و ده معناه أن عدسة العين حركتها ثابتة ، ده مُجِهد جداً، كأنك قاعد تلعب فى الـgym لمدة 8 ساعات متواصلة بدون اى break.

2- فى الأغلب الناس اللى بتقرا من على الـتابلت بتستخدم الـfont العادى ، و ده مرهق للعين علشان بيخليها تعمل مجهود زيادة و خاصة لو لمدة طويلة. و الـsmall font بيخليك تلقائي تقدم الـتابلت منك بزيادة و اهو ده السبب أننا بيكون عندنا وجع في الرقبة و بيسببلنا صداع.

عشان كده و أنت بتستخدم الـتابلت خد بالك انه يكون تحت مستوى عينك عشان العين متتعبش.
الحاجات البسيطة دى هتخليك دايما عندك صداع و متنشن و مش عارف تركز فى شغلك، يعنى أنت علشان تشتغل على نفسك و تستغل وقتك بأحسن شكل هتضر نفسك و أنت مش حاسس :).

معلومة على الماشي: العدسات بتزود الإحساس بالجفاف و لو حد لابس عدسات و بيقرأ ده بيتعب العين أكتر.

 

طب الحل ايه؟

هتقولى أن الكتاب برضو صعب تستخدمه مش كدة؟ عندك حلين:

أولاُ: تاخدها من قاصرها و تشترى kindle اللى بيديك ميزة انك تقرأ ebook و فى نفس الوقت مميزات الكتاب العادي. بص على الصورة هتفهم ليه، هو اصلا كتاب متخفى فى تابلت ، شايف المشكلة بتاعة النور الجامد اللي بيوجع العين مبقتش موجودة.

الكيندل في منه اكتر من نوع، تقدر تشتريه من Kindle Egypt لكن لو اشتريت kindle fire يبقى انت كدة معملتش حاجة يعني بتأذي عينيك لسة، لأنه ميفرقش حاجة عن التابلت العادي.


ثانياً:
لو مش هتقدر تشتري kindle يبقى قلل مخاطر الـتابلت بالكام حاجة دي:

 

1- أفصل كل ساعة.

2- كبر خط الكتاب و متقراش في الخط الصغير خالص.

3- الّزق anti-reflective screen

4- تاخد بالك ان عينك دايماً هي اللي يكون مستواها اعلى من الـتابلت. ( زى الراجل اللى فى الصورة ده )

 

person-using-tablet1

في الأخر أحب أقولك ان المشكلة مش في انك تستخدم كتاب ولا تابلت المشكلة في أنك متخادش بالك من نفسك، اي حاجة هتستخدمها ممكن تضرك لو محتطش صحتك في الاول و عرفت ازاي تبعد عن اضرار اي اختراع جديدة. دايما خلينا نتعلم ازاي نستخدم الـحاجات الجديدة بطريقة تفيدنا اكثرما تضرنا.

التكنولوجيه بتسهّل حياتنا و في نفس الوقت بتدمره, كل اللي مطلوب منك تركز و انت بتتعامل معاها

 

 

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

تعليق واحد

شارك بتعليقك