موضة الإنتحار ! - شِفاخانة

معظمنا فكر في الإنتحار قبل كده بس بشكل بسيط كان مجرد تفكير أو كان سننا صغير ومكناش فاهمين اوي .

كنت فاكره إن كلنا كده بس اكتشفت ان معدل الإنتحار في مصر بيزيد وإنه مش مجرد  الكام حالة اللي شفناها الفتره الاخيرة، بس اتصدمت لما عرفت الإحصائيات وأرقامها قد ايه ومحدش مسلط الضوء علي الظاهرة دي بالشكل الكافي، احب اقولك ان كل 40 ثانيه فى حالة إنتحار يعني سنويا في 800 ألف حالة في العالم، هتقولي يا عم دا في العالم، لكن مصر هنا زي الفل والعدد دا مش موجود عندنا خالص ، احب اقولك انك غلط احنا فعلا مش من آعلى البلاد نسبة في الإنتحار بس خلينا نعرف أكتر عن الاحصائيات .

الأرقام دي فكر فيها قبل ما نكمل كلامنا :

سنه 2009 كان في 104 ألف محاوله إنتحار في مصر نجح منها 5 آلاف

  • في2011 في 18 ألف حاله وصلت لمركز السموم في محاولة للانتحار، طيب يعني مصر سنويا فيها من 3 – 5 آلاف حاله إنتحار
  • نسبه البنات 68% منهم والسبب الرئيسي العنوسة.
  • والولاد 32%  والسبب الرئيسي البطالة .

دي شوية أرقام حطها في دماغك عن الإنتحار يعني الموضوع مش قليل ولا حالات نادرة بالعكس الموضوع بيزيد كل فتره  لكن مش متسلط عليه الضوء .

الإنتحار السبب الاساسى فيه العامل النفسي الناتج عن سبب مادي أو سبب سياسي أو  سبب رفض مجتمعي ( أهل / صحاب )  .

وبيبقي في اكتر من شكل، يعني الإنتحار بيبقي نتيجة عامل مادي ونفسي في نفس الوقت وممكن نتيجة صدمة نفسية او الادمان لمخدرات او كحول .

الإنتحار هو نهاية الاكتئاب الحاد:

الإنتحار بيجي بعد فترة اكتئاب حاد لو متعالجش بيوصل للانتحار ..

طيب هو عشان واحد مكتئبلي حبيتين ينتحر !!!! 

طيب انت عارف ايه هو مرض الاكتئاب ؟

لو قولتلي يعني واحد مضابق عشان حصلتله مشكلة او ازمة او ظروف هقولك تمام اووي دي كآبه انا بسألك عن مرض الاكتئاب !

مرض الاكتئاب دا مرحلة ما بعد الكآبة ودي بتبقي من بعد أسبوعين لتلاتة من مرحلة الكآبة .

ومرض الاكتئاب بيبقي نتيجة نقص او عدم توازن فى المواد الكيميائيه الموجودة بالمخ و الجسم ولازم وقتها يتعالج مش علاج نفسي بس لا علاج عضوي بالادوية  كمان ودا لو محصلش حتي لو زال السبب اللي كان سبب المرض النفسي دا بيفضلوا عندهم اكتئاب لانه متعالجش !!

افهم الموضوع اكتر عن طريق الـCase-study دي :

David Letterman : دا مذيع كوميدي ساخر علي قناه سي بي سي الامريكية ..  ده النسخة الامريكية من باسم يوسف مهمته انه يناقش قضايا مهمه بطريقة ساخرة يعني عايز يضحك الناس حتي في المشاكل ..

حلو اوي الكلام دا احب اقولك انه عنده اكتئاب حاد !

وبيتعالج منه ورافض انه ياخد يوم اجازة لان بالنسباله اليوم دا بيقربه من الانتحار، فالبرنامج بقي حلمه اللي متمسك بيه عشان يبعده عن الإنتحار .

قبل الإنتحار بيوم :

طيب فكرت قبل كده ايه احساس الشخص اللي بينتحر قبليها بيوم او بفترة وايه اللي بيوصلوهم لكده ..

الرفض المجتمعي :

في حاله في فرنسا مامتها قالت ان قبل يوم الانتحار بيوم رفضت تكلم اي حد او تاكل او تشرب مع انها بتحب الاكل، ومردتش تلعب مع بنت اختها مع تعلقها بيها ، كأنها دخلت جوه قوقعه ومبقتش تفكر بس دا كان بعد حالة اكتئاب استمرت شهور ، دا كله كان نتيجة تريقة زمايلها في المدرسة علي شكلها ودا اللي دخلها حالة الاكتئاب نتيجة رفض المجتمع ليها فبالتالي هي وصلت انها رفضت المجتمع دا ورفضت العيشه فيه فقررت تنتحر.

صدمة الثانوية العامة :

في حاله تانية في مصر وكان الانتحار نتيجة صدمة بعد نتيجة الثانوية العامة ، حس ان بعد كل الضغط النفسي والمذاكرة مستقبله ملوش ملامح فقرر انه هينهي حياته لانه فقد مستقبله من وجهه نظرة ودا كان من غير الدخول في حاله اكتئاب طويلة، خصوصا ان السن صغير والتفكير قليل في المرحله دي .

انتوا متخيلين  انه قرر اليوم دا ميبقاش موجود مع الناس اللي بيحبها وانه مش هيصحي تاني يوم اصلا ساب كل حاجه اهله وصحابه سكنه وموبايله وعربيته يعني كل تفاصيل حياته ، ساب كل حاجه واختار انه يكون لوحده بشكل حقيقي بالنسباله ويموت ، وصل لمرحلة من فقد ثقه وضعف خلوه يقرر ياذي نفسه اكتر من انه يقرر ياذي اللي كان السبب في الحاله اللي وصلها .

من وجهه نظري التفكير في الانتحار اكبر من اننا نتكلم عن مشاكل واجهته، اللي قرر انه ينتحر مبقاش مؤمن بنفسه، مش مؤمن انه يقدر يضيف حاجه في الدنيا، مش مؤمن ان في حد بيحبه او انه بيحب حد ،  بيفقد الثقه في كل الناس وكل الظروف، بيفضل عايش في وحده لفترة قبليها حتي لو قاعد مع اهله او صحابه بيقي وحيد فبيوصل انه بيشوف ان الوحده مش هتختلف من هنا لفوق بالعكس بيبقي شايف انه فوق مش مضطر يشوف الناس اللي بيشوفهم هنا .

الأصعب في ناس بتشوف الإنتحار انه طريقه الوصول لربنا انهم تعبوا من الظلم اللي موجود في الدنيا وعايزين يروحوا للعدل .

الخلاصة:

مش عايز تنتحر اتمسك بحاجه اووي وعيش عشانها وياريت تكون اكتر من حاجه لان حاجة واحدة مش مضمونة، مش كلام نظريات والله بس لو انت فكرت في الانتحار قبل كده ومنفذتوش افتكر كدا حتي لو كنت وقتها صغير انت منفذتوش ليه ؟ عشان اهلك، عشان دراستك ، صحابك، مبدأ ديني، أياً كان السبب انت محتاج اتنين تلاتة من دول موجودين علي طوول ولو فشلت دا مش هيوقفك لانك عايش عشان فكرة مش عشان مكسب، و الفكرة مش بتموت .

طلب بسيط لو وصلت لمرحلة الإكتئاب اقف عند المرحلة دي و فلاش  باك حياتك ارمي كل حاجة ضايقتك وابتدي كأنك لسه مولود امبارح 🙂

و من قبل ما تبتدى مرحله الاكتئاب قرر من النهارده انك كل يوم هتصحي فيه هتعتبر نفسك مولود جديد و هتقرر انك تبقى مبسوط . عشان السعاده قرار .

صح ولا ايه ؟ 🙂

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك