نفس واحد لا يكفي - شِفاخانة

فاكر اول مرة شربت سجاير .. انا فاكر .. فاكر طعمها بالمللي .. على عكس كلام ناس من  المدخنين .. بس معايا كان طعمها دخان .. دخان محشور .. سيبك من طعمها دلوقتي و انت متعود عليها .. كانت مختلفة في الأول .. ساعة لما طعمها مكنش بيروح ، لا بأكل و لا بشرب هي كده شوية دخان دخلو اتحشرو و مش طالعين .. فاكر بقي لما قلت دي عشان اول مرة، اجرب تاني .. بالنسبالي الطعم اتغير :)) .. بس برده وحش .. السجاير طعمها وحش .. بس منكرش اخف من الوحاشة اللي فاتت في المرة الاولي .. كل مرة بتشرب فيها سجاير وحاشتها بتقل سِنة سِنة .. الموضوع محتاج شوية إصرار على شوية وقت ..

 سعادة أول مرة بطلت تكح ..

 فاكر اول سيجارة مكحتش و انت بتشربها ..  فاكر احساسك بالانجاز .. انت بقيت برنس .. انت قدرت تموت الـcillia الحارس اللي على بوابة الرئة .. اللي مسئولة انها تحافظ علي صحتها و كانت بتحاول تطرد كل شيء ضار بيدخلها .. فكانت في الأول بتطرد دخان السجاير و تخليك تكح .. لحد ما الدخان و المجهود زاد عليها و ماتت .. لما بتبطل تكح من دخان السجاير فانت بتبطل تكح من حاجات تانية كتير بتدخل رئتك و انت معتدش بتحس بيها خلاص ..

 الكحة بترجع تاني ليه ؟؟

 فاكر بقي مع الوقت لما الكحة رجعت تاني .. بس نوع الكحة مختلف .. الكحة مكنتش شارقة زي في الاول دي كانت كحة ببلغم .. و البلغم ده عبارة ان رئتك مازالت بتحاول بكل جهدها انها تمنع البكتريا تدخل جواها و تتكاثر جوه و تسببلك امراض في رئتك بالهبل ..

 معلومة متجربة 😉 .. متحاولش تاخد دوا يوقف الكحة .. خد دوا مذيب للبلغم عشان تكح بطريقة اسهل .. لان دوا الكحة مش هيوقفها و انت لسه بتشرب سجاير ..

في واحد سألناه عن احساسه بأول سيجارة .. بس يا خسارة مكنش احساسه وحش .. لانه اول مرة شرب 20 سيجارة في يوم واحد .. ملحقش يستمتع بطعم اول سيجارة في بقه أول مرة عشان تفضل ذكرى معاه  .. لو مش فاكر احساسك بتاع أول نفس مش هتلاقي سبب مقنع يشجعك انك تفكر توصل لآخر نفس ..

 السجاير حلوة .. و مبتموتش بسرعة .. بس بتموت ببطئ .. خد بالك

 

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك