ازاى اظبط ضغطى

عزيزي مريض الضغط العالى : الطبيعي انك من يوم ما عرفت أن عندك ضغط عالى فأنت بتاخد الدوا بانتظام و بتتابع مع دكتور، و اكيد الدكتور بيقولك على حاجات كتير تعملها عشان ضغطك ميعلاش بس فى بعض المعلومات المستخبية اللى الدكاترة مش بيـstressــــوا عليها أوى و ممكن تكون مفهمتهاش من وسط كلام كتير ..

تعالى افهمك بعض المصطلحات اللي بيقصدها الدكتور .. مثلا يعني :))

لما كان بيتكلم عن بعض التصرفات اللى ياريت تحاول تعملها.. قالك ..

1- أن الضغط أوقات كتير بيتعلق بالوزن الثقيل .. عايز تحافظ على ضغطك لازم تبذل مجهود فى انك تخس ، فلما قالك اعمل رياضة اكيد مكنش قصده انك تطلع السلم مرة واحدة فى اليوم ..

2- قالك تقيس الضغط بانتظام ، مكنش قصده انك تقيس الضغط تلات مرات في اليوم بأجهزة ضغط مختلفة و تقعد تتوتر لما تلاقى ضغطك علّى و شوية تقيسه تاني تلاقي ضغطك نزل ، التوتر ده بيعلى ضغطك أكتر لأن الحالة النفسية فى حالة الضغط بتأثر جدا على الحالة العضوية و ساعتها كل ما تقيس ضغطك هيكون برده عالى ..

امال يعني ايه تقيس ضغطك بانتظام ؟؟ يعني تقيسه مرة واحدة فى اليوم فى نفس المواعيد و ياريت لو نفس جهاز الضغط ، عشان الأرقام دى بتحدد اذا  العلاج اللى أنت ماشى عليه مظبوط و لا محتاج تعديل .. فاهتم بالموضوع ده كويس جدا

3- فاكر لما كلمك عن العصبية و قالك أن بعد ما تتعصب هتحس بصداع كبير .. صح ؟؟ ده حقيقى عشان العصبية ليها تأثير كبير جدا على الضغط ، العصبية متسببش مرض الضغط بس بتعلي الضغط مؤقتا ، و مريض الضغط مش المفروض يكون عرضة أن ضغطه يعلى مؤقتا .. حافظ على أعصابك و اشرب كركديه ^_^

قالك عن الأكل ايه بقي .. فاكر ؟؟

4-لما كان الدكتور بيقولك تقلل الملح فى الأكل .. مكنش قصده تقلل ملح الشوربة و الطبيخ بس تاكل مخلل و بسطرمه او رنجة عادى -_-

5- الكافيين بيعلي الضغط و المعلومة دى فى كتير مننا عارفينها .. فلازم حضرتك تبطل تشرب قهوة ، و اكيد ده مش معناه انك تشرب شاي .. الشاى فيه كافيين زى ما موجود في القهوة، طبعا مع اختلاف التركيز ، فلو زنقت معاك اشرب شاي .. بس أخضر ^_^
الشاى الأخضر فيه كافيين برده ، بس في فايدة اكبر انه فيه مضادات اكسده بتساعد على صحة القلب

6- لما قالك تشرب كركديه قعدت تحتار منقوع و لا مغلي .. ساقع و لا سخن .. بسكر و لا من غير؟؟  ببساطة شديدة بتشتري باكيت كركديه و تعاملها معاملة الشاي .. بتحب سكر حط سكر ، مش بيأثر على الضغط متقلقش ، و اكيد لازم تكون ميه سخنة و لو سبتها تبرد مش ازمة .

اما لو انت بتجيب كركديه زهر ده برده بتنقعه في ميه سخنه و بتحليه أو مبتحلهوش براحتك ..  دى كانت محاولة للإجابة على سؤال منقوع و لا مغلي ، هو كده يعتبر منقوع  و مفيش حد بيغلي الكركديه اساسا.

7- مريض الضغط العالى للأسف مينفعش يتسلى بلب عشان مملح ، بس حقه يتسلى بفشار ^_^ الفشار من الحاجات الصحية لمريض الضغط .. بس متنساش أنه من غير ملح

8-  الضغط و الكوليسترول و القلب اخوات .. لو أنت مريض ضغط ركز انك متاكلش اكلات تأثر على الكوليسترول ، طبعا معروف ان الاكلات  المقلية و الاكل اللي فيه دهون الكتيرة بيعلّي الكوليستيرول  .. بس زود عليهم كمان اللحوم .. حاول متكترش منها .. و يا ريت تبعد عن اللبن ..

9-  اللبن حلو جداا .. اشرب لبن كتير :))

الله !! ايه الدوخة دي ؟؟ .. يعني ابعد عن اللبن كامل الدسم و خليك في اللبن منزوع الدسم ^_^

هو كله ممنوع ممنوع .. لا استني متنكرش 😀 هو قالك على كذا حاجة حلوة ..

10- طبعا كلمة موالح جاية من الملح ، بس ده ملوش علاقة بالملح اللى احنا بنقلله .. الليمون و البرتقان موالح بس حلوين جدا  ^_^ الليمون ممكن تستخدمه بدل الملح عشان يدى نكهة للأكل ، و البرتقان فيه بوتاسيوم و كل حاجة فيها بوتاسيوم حلوة لتقليل الضغط 😉 .. ابقى زود على البرتقان الموز كمان .

11- سلطة كتير بزيت زيتون .. الدكتور قالك عليها ؟؟ اكيد طبعا ، و الصيدلى اللى بتقيس عنده الضغط قالك عليها؟! وش يعني .. طب أنا بس حبيت أأكد على المعلومة 😉

12- بالنسبة للغدا نفسه بقي .. متنساش تكتر من البطاطس و السبانخ

و بالهنا و الشفا 😀

13- و اهم من كل ده تاخد دواك .. جرعته مظبوطة .. معاده مظبوط 😉

عزيزي مريض الضغط .. خد بالك من صحتك ، الموضوع اهم من انك تطنشه. و أسهل من انك تتعب نفسك فيه ، شوية خطوات صغيرة هتنظم حياتك و تخلى الدنيا بسيطة في نفس الوقت اللى أنت واخد بالك فيه من نفسك ..

في حاجة دكتور الضغط قالهالك و احنا نسيناها 😀 ؟؟

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

شارك بتعليقك