Happy Healthy Birthday :D - شِفاخانة

ازاى تعمل عيد ميلاد healthy ^_^

عيد الميلاد اللى بنحتفل بيه كل سنة ^_^

الفرحة و الهيصة و الأحلام بتاعت السنة الجديدة  و التورتة  والبيبسي و اللمة و الصحاب 😀

كل دي حاجات حلوة طبعا

بس خلونا نقف عند التورتة و البيبسي

عمرك ركزتى فى التورتة و البيبسى هي دي حاجات حلوة فعلا نبدأ بيها السنة الجديدة ؟!  .. تفتكرى هما دول من الأكل الصحى؟

عمرك فكرت فى السؤال ده ؟!

اكيد لأ طبعا مفكرتيش .. لانك عارفة انه عمره ما كان صحي  🙁 
الموضوع مفيهوش فصال يعني 😛 بس بتقولي ده يوم يعني مش أزمة  😉

طب بما أنها سنة جديدة و سعادة و بهجة كده ما تاخد قرار تأكلى أكل صحى.. الأكل الصحي ده فن و متعة و طعمه الذ جدا من الأكل العادى اللي متعودين عليه

 

 بداية القرار تبدأ في يوم ميلادك نفسه .. تعمل تورتة healthy 😀

خلينا نتفق ان التورتة منقدرش نقول عليها مش صحية تماما .. بس فيها سعرات عالية اوي مع فوايد قليلة اوي ..  

و البيبسي ليه أضرار كتير لما تشربه كتير .. شربه القليل مش هيضرك ، بس احنا لسه بنتكلم عن البداية الجديدة فخلينا نمشى عالصح بس ^_^

الواحد كل ما بيكبر بيبعد فكره أكتر عن ايه صحى و ايه لأ .. فليه متبقاش بداية السنة الجديدة هى اللي بتفكرك انك تبقي صحي 😀

انك تبعدي عن التورتة و البيبسي و تعملي نفس الأكلات بطريقة صحية اكتر هيبقي عيد ميلادك مش زى أى عيد ميلاد ^_^ عيد ميلادك هيكون مميز 😉

 

نبدأ بالتورتة ^_^

هي اصلا التورتة اساسها دقيق، و الدقيق من النشويات اللي فايدتها قليلة و سعراتها عاليه، و كذلك السكر و الكريم شانتيه، سعرات عالية من غير فوايد

لكن  البيض و و اللبن اللي بيتخلطو مع الدقيق فيها فايدة صحية عالية .. و الشيكولاتة و الفاكهة اللي  بتتزوق بيها برده مفيدة

يبقي نفهم من كده إنك لما تيجي تعمل تورتة تبعد عن الدقيق و السكر و الكريم شانتيه ، بس ممكن يبقي فيها بيض و تشوكلات و فاكهة 😉

تورتة من غير دقيق اللي هو ازاى  😀 😀 هنهزر بقي 😀

التورت من غير دقيق لا تعد .. هنديكو وصفتين و جربو بنفسككو

 

تورتة البطييييخ

watermelon-tart

 

المقادير:

  • بطيخة 😀 متقشرة و متقطعة قطع كبيرة مثلثة
  • لوز متقشر و متحمص
  • زبادي لايت
  • فراولة متقطعة نصين
  • راسبيري (توت ارزق)

الطريقة:

  • هتحط قطع البطيخ المثلثة الكبيرة في شكل دايرة
  • و تغطيها بالزبادي
  • و تزوقها زي الصورة ^_^
  • حطها في التلاجة لحد ما تتلج 😉

متقولش يع انا سامعاك 😀

جرب بعدين احكم 😛

 

بلاش الفواكه خلينا تورتة الشيكولاتة
chocolate-tart1

المقادير:

  • تمر من غير نوة
  • بندق متحمص
  • زيت جوز هند
  • لبن جوز هند
  • شيكولاتة  غامقة  مطحونة
  • فراولة

الطريقة:

  • اطحني البندق لحد ما يبقي بودرة خالص
  • حطي زيت جوز الهند مع التمر و اطحنهم برده
  • هتجيبي الصنية اللي هتعملي فيها و تحطي ورقة زبدة اول حاجة تحت خالص ..
  • و بعدين تدهني الجوانب و القاعدة بالخليط (البندق و التمر و زيت جوز الهند) اللي علمتيه فوق .. و تغطيهم بطبقة كيس بلاستيك
  • و حطيهم في التلاجة ساعتين تلاتة كده
  • نرجع للبن جوز الهند .. تسخنيه عالنار  يدوب يغلي ..
  • تشيليه و تزودي عليه شيكولاتة بس تكون مطحونة .. و تقعد تقلبي فيه لحد ما قوامه يبقي تقيل
  • سيبيه ساعة
  • و بعد حطي اللبن بالشيكولاتة عند صينية الكيكية اللي فيها تمر و بندق و سيبيها طول الليل في التلاجة
  • تاني يوم طلعيها و زوقيها بالفراولة

و متنسيش الشمع 😀

 

طب و البيبسي

ممكن نستبدل البيبسي  بايه … يااااه ده احنا لو اتكلمنا مش هنخلص 😀

تعالى اكلمك عن العصاير الفريش اللذيذة المختلفة 😉

خلينا نتفق على حاجتين

1-  لازم يكون عندنا خمس حاجات .. خلاط .. تلج .. زبادي .. سكر أو عسل .. فواكه متعددة 😀  

متتخضش  من الزبادي ده أنت مش هتاكله كده و مش هتحس بطعمه زي ما أنت متخيل .. ده بس بيزود الـسُمك بتاع العصير كده  و بيخلي طعمه مدى على ايس كريم شوية كده 😀

2- تاني حاجة نتفق عليها .. السكر اللي بتزوده عليه .. السكر الغامق احسن صحيا و مسكر اكتر من السكر الأبيض .. سيبك انت  من الإعلانات اللي بتتباهى ان السكر بتاعها ابيض .. لان أصلا الصحي اكتر السكر الغامق .. بس انت بقى لو استبدلت السكر ده بعسل ابيض .. ياااه.. معلقة صغيرة هتخلى العصير مسكر حلو .. و كمية فوايد رهيبة .. و مفيش فرق بين الاتنين بعد ما يتخلطو و يطلعو عصير 😀

 

نعمل ايه بقي ؟

العصير .. بتحط ده على ده في خلاط و قلبّي  😀 سهلة دي .. أي فاكهة هتحطها و معاها السكر  .. او العسل 😉  .. و شوية مية و دوس 😀

عصير فراولة .. عصير موز .. عصير مانجو .. و انت عارف بقي  

 

بس ندخل في المهم و نطلع خلطات عصاير لذيذة ^_^

  • موز + فراولة + معلقة عسل + شوية مية جوه الخلاط ..  يعني الكالسيوم مكثف 😀  
  • توت + فراولة + مانحو ..
  • جريب فروت + برتقان + كيوي .. كل الفيتامين سي اللي ممكن تعوزه 😉
  • برتقان + تفاح + لوز

أي حاجة من اللي فات بتزود عليها زبادي و تلج هتحوله لحاجة تقيلة زي الايس كريم الذيذ .. ينفع بيه و ينفع من غيره 😉

و كده عملتي عيد ميلاد أخدتي فيه فوايد صحية و طعم لذيذ و بقى عيد ميلادك عيد ميلاد مميز و بكره تلاقي صحباتك بيقلدوكي و يبقي انتي اللي زرعتي فيهم الفكرة الحلوة ^_^ 

و لو عندك اطفال و عودتيهم من دلوقتى على العيد ميلاد الصحي فانتي بتأثري في جيل كامل 😀 و بداية السنة الجديدة تبقي بداية صحية و نية كويسة انك تحاولى تمشى على أكل صحي 😉

 

و احنا مش هنسيبكو اكيد هنفضل ننزل اكلات صحية لذيذة و سهلة لحد ما نبطل الاكل اللي بيضرنا اكتر ما بينفعنا 😉

 

ايه حلمك اللي هتحققيه قبل عيد ميلادك الجاى ^_^ ؟

شاركنا

عن الكاتب :

أحنا عملنا شِفاخانة عشان نخليك تعمل العادات الغلط بأكتر طريقة صحية او مع الوقت تغيرها خالص ونزود

تعليقان

شارك بتعليقك